မော်လမြိုင် ၊ ဇွန် ၁၀
မွန်ပြည်နယ်က လိုင်စင်မဲ့ယာဉ် ဖမ်းဆီးမှုမှာ စစ်ကောင်စီဝန်ထမ်းတွေရဲ့ အကျင့်ပျက်လာဘ်စားမှုကြီး ဆိုးဆိုးရွားရွား ဖြစ်ပွားနေပြီး သူတို့အတွက် ငွေရပေါက်ကြီး ဖြစ်လာတယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကောင်စီဟာ ဇွန် ၁ ရက်နေ့ကစလို့ လိုင်စင်မဲ့ယာဉ်တွေကို စီမံချက်နဲ့ အကြီးအကျယ် ဖမ်းဆီးနေပြီး လိုင်စင်မဲ့ယာဉ် ဖမ်းဆီးရာမှာတော့ စစ်တပ်၊ ရဲတပ်ဖွဲ့၊ ယာဉ်ထိန်းရဲ၊ ပြည်သူ့စစ်အပါအဝင် တ ခြားဌာနဆိုင်ရာတွေလည်း ပါဝင်ပါတယ်။
စစ်ကောင်စီဝန်ထမ်းတွေဟာ လိုင်စင်မဲ့ယာဉ် ဖမ်းဆီးရမိပါက လိုင်စင်မဲ့ယာဉ်နဲ့ လိုင်စင်မဲ့ယာဉ် စီး နင်းသူတွေကို ငွေကြေးအဆမတန် တောင်းခံတာတွေ ရှိနေပါတယ်။
အမည်မဖော်လိုတဲ့ မွန်ပြည်နယ် ဒေသခံတစ်ဦးကတော့ လိုင်စင်မဲ့ယာဉ်ဖမ်းဆီးရမိပါက တစ်စီးလျှင် အနည်းဆုံး ကျပ် သိန်း ၃၀ ထက်မနည်း တောင်းခံတာတွေ ရှိနေတယ်လို့ ပြောပါတယ်။
“ဟိုပိုက်ဆံပေးပြီး ရွေးရတာတွေ ဘာတွေရှိတယ်။ အများကြီးပါပဲပေါ့။ ကားလမ်းဘေးနေရာတွေ ညနေဘက်အလုပ်သိမ်းတဲ့အချိန်တွေ ဖမ်းတယ်။ သိန်း ၃၀ တို့ ဘာတို့ တောင်းတယ်” လို့ ဆိုပါတယ်။
လိုင်စင်မဲ့ယာဉ်ဖမ်းဆီးရမိတဲ့ တချို့ဖြစ်စဉ်တွေမှာတော့ ထောင်ဒဏ်ပြစ်ဒဏ်ချမှတ်မှု နည်းပါးရေးဆိုတဲ့ အကြောင်းပြချက်နဲ့ စစ်ကောင်စီတောင်းသလောက် ငွေကြေးပေးဆောင်ရတာတွေ ရှိနေတာ ဖြစ်ပါတယ်။
အမည်မဖော်လိုတဲ့ မွန်ပြည်နယ် ဒေသခံ တစ်ဦးကလည်း လိုင်စင်မဲ့ယာဉ် ဖမ်းဆီးရမိပါက စစ်ကောင်စီနဲ့ နီးစပ်သူတွေကတော့ ငွေကြေးပေးဆောင်ပြီး ပြန်လည်လွတ်တာတွေ ရှိနေတယ်လို့ ပြောပါတယ်။
“တချို့ကတော့လည်း အိမ်ကလိုက်လာတဲ့ ဥစ္စာကျတော့ ထောင်တစ်လချတယ်။ ဆိုင်ကယ်သိမ်းလိုက်တယ်။ ဖမ်းခံထိတဲ့ လူအပေါ်မှာ မူတည်တာပေါ့။ နည်းနည်း ပတ်သက်ရာ ပတ်သက်ကြောင်း ရှိရင်တော့ ဆိုင်ကယ်သိမ်းလိုက်တယ်။ လူကိုမဖမ်းဘူး” လို့ ဆိုပါတယ်။
လိုင်စင်မဲ့ယာဉ်ကို ဖမ်းဆီးရမိပါက လိုင်စင်မဲ့ယာဉ်ကိုပါ သိမ်းတဲ့အပြင် လိုင်စင်မဲ့ယာဉ်စီးနင်းတဲ့ ဒေသခံတွေကိုပါ ပို့ကုန်၊ သွင်းကုန် ဥပဒေ တွေနဲ့ အနည်းဆုံး ထောင်ဒဏ်တစ်လချပေမယ့် စစ်ကောင်စီနဲ့ နီးစပ်သူတွေကိုတော့ ငွေကြေးရယူပြီး ပြန်လွှတ်ပေးနေတာကြောင့် ဒေသခံတွေအကြား ဝေဖန်မှုတွေ မြင့်တက်နေပါတယ်။
မွန်ပြည်နယ်မှာတော့ လိုင်စင်မဲ့ယာဉ် ဖမ်းဆီးမှုစတင်တဲ့နေ့ကစပြီး လိုင်စင်မဲ့ယာဉ်အစီးရေ ရာနဲ့ချီ ဖမ်းဆီးထားကာ လိုင်စင်မဲ့ယာဉ် စီးနင်းသူတွေကိုတော့ ပို့ကုန်၊ သွင်းကုန် ဥပဒေတွေနဲ့ အရေးယူလျက် ရှိတယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ-CJ