ရန်ကုန် ဖေဖော်ဝါရီ ၂၇
ပြီးခဲ့တဲ့ ဖေဖော်ဝါရီ ၁၃ ရက်နေ့မှာ ထုတ်ပြန်ခဲ့တဲ့ အာဂျင်တီးနားနိုင်ငံ တရားရုံးရဲ့ ဖမ်းဝရမ်းမှာ ပါဝင်နေတဲ့ ဒေါ်အောင်ဆန်းစုကြည်နဲ့ သမ္မတဟောင်း ဦးထင်ကျော်တို့အတွက် အဲဒီဝရမ်းထုတ်ခံထားရမှုကနေ ဖယ်ရှားနိုင်ရေး တရားမျှတမှု ရှာဖွေဖော်ထုတ်ရေး ကော်မတီကို အမျိုးသားဒီမိုကရေစီအဖွဲ့ချုပ် NLD ပါတီက ဖွဲ့စည်းမယ်လို့ ဒီနေ့ ဖေဖော်ဝါရီ ၂၇ ရက်စွဲနဲ့ ထုတ်ပြန်ကြေညာပါတယ်။
အပြည်ပြည်ဆိုင်ရာတရားရုံး ICJ မှာ ဂမ်ဘီယာနိုင်ငံ မြန်မာနိုင်ငံအပေါ် တရားစွဲဆိုခဲ့တဲ့ အမှုနဲ့ပတ်သက်လို့ ၂၀၁၉ ခုနှစ် ဒီဇင်ဘာ ၁၁ ရက်မှာ အဲဒီအချိန်က နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင် တက်ရောက်ရှင်းလင်းခဲ့ပေမယ့်လည်း မြန်မာစစ်တပ်ဟာ ရွေးကောက်ခံအစိုးရအောက်တွင် ရှိမနေကြောင်း အချက် ၃ ချက်နဲ့ NLD ရဲ့ ထုတ်ပြန်ချက်မှာ ထောက်ပြထားပါတယ်။
အဲဒီလို တရားရုံးမှာ တက်ရောက်ရှင်းလင်းခဲ့ပေမယ့်လည်း ဒေါ်အောင်ဆန်းစုကြည်နဲ့ ဦးထေင်ကျော်တို့ကို စစ်တပ်ရဲ့ ကျူးလွန်မှုတွေမှာတာဝန်ရှိသူဆိုပြီး သတ်မှတ် စွဲဆိုခြင်းဟာ စစ်တပ်ခေါင်းဆောင်တွေရဲ့ တာဝန်ခံမှုကို မှေးမှိန်သွားစေကာ တရားမျှတမှု ဖော်ထုတ်ရေးမှာ မေးခွန်းထုတ်စရာဖြစ်တယ်လို့ NLD က ဆိုပါတယ်။
အာဂျင်တီးနားတရားရုံးမှာ ရိုဟင်ဂျာ လူမျိုးတုံးသတ်ဖြတ်မှု စွဲချက်ကို မူရင်းတိုင်ကြားသူဖြစ်တဲ့ ဗြိတိန်အခြေစိုက် BROUK အဖွဲ့က အဲဒီအချိန်က နိုင်ငံ့ခေါင်းဆောင် ၂ ဦးတို့ရဲ့ အမှုမှာ ပါဝင်ပတ်သက်မှု သက်သေအခိုင်အလုံမရှိိတဲ့အတွက် ဖမ်းဝရမ်းစာရင်းမှာ ထည့်သွင်းခြင်း မပြုဖို့ လျှောက်ထားပေးတဲ့ကိစ္စကိုလည်း အသိအမှတ်ပြုတယ်လို့ ထုတ်ပြန်ချက်မှာ ဖော်ပြပါတယ်။
ဒါပေမယ့်လည်း BROUK အဖွဲ့ရဲ့ လျှောက်ထားချက်ကို အာဂျင်တီးနား တရားရုံးက လျစ်လျူရှုခဲ့ပြီး မြန်မာနိုင်ငံရဲ့ ဖွဲ့စည်းပုံအရ စစ်တပ်ရဲ့အခန်းကဏ္ဍကို ထည့်သွင်းစဉ်းစားခြင်းမရှိဘဲ ခေါင်းဆောင် ၂ ဦးအပေါ် ဖမ်းဝရမ်း ထုတ်လိုက်တာဟာ တရားရုံးရဲ့ ဆင်ခြင်တုံတရားနဲ့ အဂတိအစွဲကင်းမှုအပေါ် ထိခိုက်အားနည်းစေနိုင်တယ်လို့ ဆိုပါတယ်။
ဒါကြောင့် ငြိမ်းချမ်းရေးနိုဘယ်ဆုရှင်၊ ပါတီခေါင်းဆောင်၊ လူထုခေါင်းဆောင် ဒေါ်အောင်ဆန်းစုကြည်ကို အခုလိုမျိုး ဖမ်းဝရမ်းထုတ်လိုက်တာဟာ စစ်အာဏာရှင်ကို တွန်းလှန်နေကြတဲ့ မြန်မာပြည်သူ တစ်ရပ်လုံး စိတ်မချမ်းမြေ့ရတဲ့အတွက် ခေါင်းဆောင် ၂ ဦးအပေါ် ဖမ်းဝရမ်းထုတ်ထားမှုနဲ့ ပတ်သက်လို့ ပြန်လည်သုံးသပ်ပေးရေး အာဂျင်တီးနားတရားရုံးကို NLD က မေတ္တာရပ်ခံထားပါတယ်။
မကြာမီ ဖွဲ့စည်းမယ့် တရားမျှတမှု ရှာဖွေဖော်ထုတ်ရေး ကော်မတီအနေနဲ့လည်း ရည်ရွယ်ချက်တူတဲ့ လူပုဂ္ဂိုလ်အဖွဲ့အစည်းတွေအားလုံးနဲ့ ပူးပေါင်းဆောင်ရွက်သွားမယ်လို့ ထုတ်ပြန်ချက်ထဲမှာ ဖော်ပြထားပါတယ်။
သံလွင်တိုင်းမ်