ဆိုးလ်၊ ဖေဖော်ဝါရီ ၂၇
စစ်ပညာ သင်ကြားရေးအကယ်ဒမီ တစ်ခုဆီ သွားရောက်ခဲ့တဲ့ ခရီးစဉ်အတွင်း မြောက်ကိုရီးယားခေါင်းဆောင် ကင်ဂျုံအန်က စစ်ပွဲဖြစ်လာရင် နိုင်အောင် တိုက်ခိုက်နိုင်မယ့် အင်အားတောင့်တင်းတဲ့ ခေတ်မီစစ်တပ် တည်ဆောက်ရေး တိုက်တွန်း ပြောကြားခဲ့ကြောင်း နိုင်ငံပိုင်သတင်းဌာန KCNA က ဖေဖော်ဝါရီ ၂၆ ရက်မှာ ဖော်ပြပါတယ်။
ယူကရိန်းကို တိုက်ခိုက်နေတဲ့ ရုရှားဘက်က ပါဝင်ကူညီ တိုက်ခိုက်ရေး မြောက်ကိုရီးယားက တပ်ဖွဲ့ဝင် ထောင်ချီ ထပ်မံ စေလွှတ်ခဲ့ပြီးနောက် ကင်ဂျုံအန်ရဲ့ ကန်ကွန် စစ်ဖက်ဆိုင်ရာ အကယ်ဒမီခရီးစဉ် ထွက်ပေါ်လာတာ ဖြစ်ပါတယ်။
အခု သီတင်းပတ်အတွင်း စစ်ဗိုလ်လောင်းတွေ မွေးထုတ်ပေးနေတဲ့ နောက်ထပ် စစ်ဖက်ဆိုင်ရာ အင်စတီကျုတစ်ခု ဖြစ်တဲ့ ကင်အီဆောင် နိုင်ငံရေးတက္ကသိုလ်ဆီကိုလည်း ကင်ဂျုံအန် သွားရောက်ခဲ့ပြီး စစ်တပ်အပေါ် သစ္စာစောင့်သိကြဖို့နဲ့ စွန့်လွှတ် အနစ်နာခံကြဖို့ တိုက်တွန်း ပြောဆိုခဲ့ပါတယ်။
အရင်က စစ်ဖက်ဆိုင်ရာ တပ်ဖွဲ့ဆီ ကင်ဂျုံအန် သွားရောက်ခဲ့တာက ရုရှားသို့ နောက်ထပ် တပ်ဖွဲ့ဝင်တွေ စေလွှတ်ရေး ကြိုတင် စနည်းနာမှု ဖြစ်နိုင်တယ်လို့ တောင်ကိုရီးယား ထောက်လှမ်းရေးက ပြောကြားထားပါတယ်။
စစ်သင်တန်း အကယ်ဒမီဆီ နောက်ဆုံးသွားရောက်ခဲ့တဲ့ ခရီးစဉ်အတွင်း ကင်ဂျုံအန်က အဲဒီသင်တန်းကျောင်းရဲ့ စီမံခန့်ခွဲမှု ညံ့ဖျင်းပုံနဲ့ ပညာရပ်ဆိုင်ရာဌာနတွေရဲ့ လည်ပတ်ပုံ မကောင်းတာကြောင့် ခေတ်မီ စစ်တပ် တည်ဆောက်ရေး အများကြီး လိုအပ်ချက်ရှိနေကြောင်း ဆူပူ ကြိမ်းမောင်းခဲ့တယ်လို့ ဆိုပါတယ်။
ကျောင်းသားတွေအနေနဲ့လည်း ခေတ်မီ စစ်ရေး အတွေ့အကြုံတွေကို အရှိန်မြှင့် လေ့လာ သင်ယူရမယ်လို့လည်း ကင်ဂျုံအန်က ပြောပါတယ်။
ရန်လိုမှုတွေ ပိုများလာနေတဲ့ နိုင်ငံတကာအခြေအနေတွေ၊ ရာဇဝင်နဲ့ စစ်ပွဲတွေက သွေးချောင်းစီးမှုတွေ နေရာတိုင်း ဖြစ်လာမယ် ဆိုတာကို ဖော်ပြနေတာကြောင့် မိမိတို့ စစ်တပ်အနေနဲ့ စစ်ပွဲကို နိုင်နင်းအောင် တိုက်ခိုက်နိုင်ဖို့ အရေးကြီးတယ်လို့ ကင်ဂျုံအန်က ပြောပါတယ်။
လက်နက်နဲ့ နည်းပညာ ခေတ်မီ အဆင့်မြင့်ဖို့ လိုအပ်သလို ရုရှားတပ်တွေနဲ့အတူ သွားရောက် တိုက်ပွဲဝင်နေကြတဲ့ မြောက်ကိုရီးယားတပ်ဖွဲ့ဝင်တွေအနေနဲ့ ခေတ်မီ စစ်ပွဲတစ်ခုရဲ့ အတွေ့အကြုံတွေ ရရှိမှာ ဖြစ်တယ်လို့ သူက ပြောပါတယ်။
နှစ်နိုင်ငံနယ်စပ်မှာတော့ ရုရှားနိုင်ငံ ကာ့စ်ဒေသကို ကာကွယ်ဖို့ ကြိုးပမ်းနေတဲ့ မြောက်ကိုရီးယား စစ်သားတွေ ထိခိုက်သေဆုံးမှုများနေတယ်လို့ ယူကရိန်းက ပြောဆိုထားပါတယ်။
Ref:Reuters