မန္တလေး၊ နိုဝင်ဘာ ၉
မန္တလေးမြို့ အိုးဘိုအကျဉ်းထောင်မှာ လျှပ်စစ်မီး ပြတ်တောက်တာကို အကြောင်းပြပြီး ရေချိုးခွင့် ကန့်သတ်ထားတာကြောင့် အကျဉ်းသားတွေမှာ အရေးပြားရောဂါ ဆိုးဆိုးဝါးဝါး ခံစားနေရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် PPNM ထံက သိရပါတယ်။
အိုးဘိုအကျဉ်းထောင်မှာ ပြီးခဲ့တဲ့ အောက်တိုဘာလကစပြီး ရေလုံလောက်စွာ သုံးစွဲခွင့်မရရှိတော့သလို အခုနိုဝင်ဘာလမှာလည်း ချိုးရေတွေနဲ့ အိမ်သာရေတွေပါ မလုံလောက်တဲ့ ပြဿနာတွေနဲ့ ဆိုးဆိုးဝါးဝါး ကြုံတွေ့ နေရတာပါ။
အကျဉ်းထောင်ထဲမှာ ရေအသုံးပြုခွင့်ကို ခွက်ရေတွေနဲ့ သတ်မှတ်ထားပြီး လျှော်ဖွတ်ရာမှာလည်း ရေအသုံးပြုခွင့် ကန့်သတ်ထားတာကြောင့် အနံ့အသက် အနည်းငယ်ပျောက်ကင်းရုံသာ လျှော်ဖွတ်နေကြရပါတယ်။
PPNM ပြောခွင့်ရ ကိုသိုက်ထွန်ဦးက အရေပြားရောဂါ ဖြစ်ပွားနေပေမယ့် ထောင်အာဏာပိုင်တွေဘက်က လုံလောက်တဲ့ ဆေးဝါးမပေးတာကြောင့် ပျောက်ကင်းသင့်သလောက် မပျောက်ကင်းတာတွေလည်း ရှိနေတယ်လို့ သံလွင်တိုင်းမ်ကို ပြောပါတယ်။
အကျဉ်းထောင်ထဲမှာ အကျဉ်းသားတွေ အရေပြားရောဂါ ဖြစ်ပွားမှုအပေါ် ထောင်အာဏာပိုင်တွေဘက်က လက်ရှိအချိန်အထိ ရောဂါပျောက်ကင်းသွားအောင် ဖြေရှင်းနိုင်တာ မတွေ့ရသေးဘူးလို့ ဆိုပါတယ်။
ဒါအပြင် အိမ်သာရေ အလုံအလောက် မသုံးရတာကြောင့် အကျဉ်းသားအကျဉ်းသူတွေ အခက်အခဲ ကြုံတွေ့ နေရပြီး နောက်ဆက်တွဲ ကျန်းမာရေး ထိခိုက်မှုတွေပါ ဖြစ်ပေါ်နေပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ နိုဝင်ဘာ ၈ ရက်နေ့အထိ စာ ရင်းတွေအရ နိုင်ငံတဝန်းမှာ အာဏာသိမ်း သုံနှစ်ကျော်ကာလအတွင်း ဆက်လက်ဖမ်းဆီးခံထားရသူ ၂၁၀၀၀ ကျော်ရှိနေပါတယ်။
သတင်း – သံလွင်တိုင်းမ်
ဓာတ်ပုံ – PPNM