မော်လမြိုင်၊ နိုဝင်ဘာ ၈
မွန်ပြည်နယ် မော်လမြိုင်မြို့ ရိုးဂိုးကျေးရွာရှိ မင်းသန့်စက်သုံးဆီဆိုင် မီးလောင်ပေါက်ကွဲမှု ဖြစ်စဉ်အတွင်း လူ တစ်ဦး သေဆုံးပြီး လူ ၂၂ ဦး ထိခိုက်ဒဏ်ရာရရှိခဲ့တယ်လို့ လူမှုကယ်ဆယ်ရေးအဖွဲ့တွေက သံလွင်တိုင်းမ်ကို ပြောပါတယ်။
အဲဒီမီးလောင်မှုဟာ စက်သုံးဆီဆိုင်အနောက်ဘက်ရှိ ဆီသိုလှောင်ကန်အတွင်းသို့ ဆီဘောက်ဆာယာဉ်မှ ဆီချနေစဉ် မီးလောင်မှု စတင်ဖြစ်ပွားခဲ့တာ ဖြစ်ပြီး မီးငြှိမ်းသတ်နေစဉ် ပေါက်ကွဲမှု ထပ်မံဖြစ်ပွားခဲ့တဲ့အတွက် လူထိခိုက်သေဆုံးမှုတွေ ရှိခဲ့တာပါ။
“မီးလောင်မှုမှာ ဒဏ်ရာရထားတဲ့ ဆီဘောက်ဆာယာဉ်မောင်းက ဒီနေ့ မနက်ပိုင်းမှာပဲ ဆုံးသွားတယ်။ စိုးရိမ်ရတဲ့ လူနာ သုံးဦးကလည်း အခြေအနေ ပြန်ကောင်းသွားပြီ။ အကုန်လုံးက မော်လမြိုင်ဆေးရုံမှာပဲ ကုသနေတယ်”လို့ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးက ပြောပါတယ်။
စက်သုံးဆီဆိုင် မီးလောင်ပေါက်ကွဲမှု မီးသတ်တပ်ဖွဲ့ဝင် ရှစ်ဦး၊ လူမှုကယ်ဆယ်ရေးအဖွဲ့ဝင် ၁၂ ဦး၊ ဆိုင်ဝန်ထမ်း နှစ်ဦး ၊ စုစုပေါင်း ၂၂ ဦး ထိခိုက်ဒဏ်ရာရရှိခဲ့တာပါ။
စက်သုံးဆီဆိုင် မီးလောင်မှုဟာ မနေ့ နိုဝင်ဘာ ၇ ရက်နေ့ ညနေ့ ၅ နာရီကျော်လောက်မှာ ဖြစ်ပွားခဲ့တာ ဖြစ်ပြီး ည ၁၀ နာရီလောက်မှသာ မီးငြှိမ်းနိုင်ခဲ့တယ်လို့ မြန်မာမီးသတ်တပ်ဖွဲ့က ထုတ်ပြန်ထားပါတယ်။
သတင်း- သံလွင်တိုင်းမ်
ဓာတ်ပုံ – MFSD/Bo Bo Win