ဓားစာခံ တစ်ဦးလျှင် ဒေါ်လာ တစ်သန်း ပေးမယ်လို့ အစ္စရေးဝန်ကြီးချုပ် ကမ်းလှမ်း

တဲလ်အဗစ်၊ နိုဝင်ဘာ ၆

ပြီးခဲ့တဲ့နှစ် အောက်တိုဘာ ၇ ရက်မှာ ဖမ်းဆီးခံခဲ့ရတဲ့ ဓားစာခံတွေထဲက အသက်ရှင်ကျန်သူ တယောက်ချင်းစီအတွက် အစ္စရေးက ဒေါ်လာ ၁ သန်း ပေးမှာ ဖြစ်ပြီး ပြန်ပေးသမားတွေကို ပြစ်ဒဏ်ကင်းလွတ်ခွင့် ပေးမယ့် သဘောတူညီ တစ်ရပ်ကို ဝန်ကြီးချုပ် နေတန်ညာဟုက ဟားမာ့စ်အဖွဲ့ထံ ကမ်းလှမ်းလိုက်ပါတယ်။

အစ္စရေး ဝန်ကြီးချုပ်ရဲ့ အစီအစဉ်မှာ ပါလက်စတိုင်း လက်နက်ကိုင်တွေ ထိန်းသိမ်းထားတဲ့ အစ္စရေး ဓားစာခံတွေအတွက် ဂါဇာကနေ သူ့ရဲ့ တပ်ဖွဲ့တွေ ဘေးကင်းစွာထွက်ခွာရေး လမ်းကြောင်း အာမခံချက်လည်း ပါဝင်မှာ ဖြစ်ပါတယ်။

သဘောတူညီမှအရ ပြန်ပေးသမားတွေနဲ့ သူတို့ရဲ့ မိသားစုတွေကို ဂါဇာက ထွက်သွားခွင့် ပြုမှာ ဖြစ်ပြီး ဖမ်းဆီးမှာ၊ အပြစ်ပေးမှာလည်း မဟုတ်ဘူးလို့ အစ္စရေး အရာရှိ တစ်ဦးက ပြောကြားခဲ့ပါတယ်။

နိုဝင်ဘာ ၃ ရက်မှာလုပ်တဲ့ အစ္စရေး လုံခြုံရေးဝန်ကြီး အစည်းအဝေးမှာ ဓားစာခံတွေ ကိစ္စကို ဆွေးနွေးခဲ့ကြပြီးနောက် အခုလို အစီအစဉ် ထွက်ပေါ်လာတာ ဖြစ်ပါတယ်။

အစ္စရေးသတင်းဌာန Channel 12 က ပထမဆုံး ဖော်ပြခဲ့တဲ့ အဲဒီ အဆိုပြုချက်ကို ဟားမာ့စ်အဖွဲ့က မတုံ့ပြန်သေးပါဘူး။

အစ္စရေး ဓားစာခံ လေးဦးကို လွှတ်ပေးရင် ဂါဇာမှာ နှစ်ရက် အပစ်အခတ်ရပ်စဲဖို့ဆိုတဲ့ အီဂျစ်ရဲ့ အဆိုပြုချက်ကို ဟားမာ့စ် အဖွဲ့က ပယ်ချထားပါတယ်။

အစ္စရေး ညှိနှိုင်းရေးအဖွဲ့ ခေါင်းဆောင်၊ ထောက်လှမ်းရေးဌာနရဲ့ ညွှန်ကြားရေးမှူး ဒေးဗစ် ဘာနီယာက သဘောတူညီမှု ရရှိနိုင်ခြေ နည်းနည်းလေးပဲ ရှိတယ်လို့ ဓားစာခံတွေရဲ့ မိသားစုတွေကို ပြောဆိုထားပါတယ်။

ဒီအတောအတွင်း ဝန်ကြီးချုပ် နေတန်ညာဟုက အကြီးအကဲ နှစ်ဦးကြား ယုံကြည်မှု ပြဿနာရှိတယ်ဆိုပြီး ကာကွယ်ရေးဝန်ကြီး ဂေါလန့်ကို ထုတ်ပယ်လိုက်ပြီးနောက် အစ္စရေးမှာ ဆန္ဒပြပွဲတွေ ဖြစ်ပွားနေပါတယ်။

ဝန်ကြီး ဂေါလန့် အပေါ် ထားရှိခဲ့တဲ့ မိမိရဲ့ ယုံကြည်မှုဟာ မကြာသေးခင်က ယုတ်လျော့လာခဲ့တယ်လို့ ဝန်ကြီးချုပ် နေတန်ညာဟုက ပြောကြားပြီး ကာကွယ်ရေးဝန်ကြီး နေရာကို နိုင်ငံခြားရေးဝန်ကြီးက အစားထိုး တာဝန်ယူမယ်လို့ ပြောပါတယ်။

ဆန္ဒပြသူတွေက နေတန်ညာဟု ရာထူးက နုတ်ထွက်ပေးရေး၊ အသစ် တက်လာမယ့် ကာကွယ်ရေးဝန်ကြီး အနေနဲ့ ဓားစာခံတွေ ကိစ္စကို ဦးစားပေး ဆောင်ရွက်ရေး တောင်းဆိုခဲ့ကြပါတယ်။

အစ္စရေးရဲ့ စစ်ဆင်ရေးတွေနဲ့ ပတ်သက်လို့ ဝန်ကြီးချုပ် နေတန်ညာဟုနဲ့ ဝန်ကြီး ဂေါလန့်ကြား သဘောထား ကွဲလွဲမှုတွေ ရှိနေခဲ့တာ ကြာပြီလို့ သိရပါတယ်။

Ref:The Telegraph/BBC