မကွေး စက်တင်ဘာ ၆
မကွေးတိုင်း မြိုင်မြို့နယ်က လက်ယက်မရွာကို စစ်ကောင်စီကလေကြောင်းနဲ့ တိုက်ခိုက်လို့ ၅ နှစ်အရွယ် ကလေးတစ်ဦး အပါအဝင် ၆ ဦးသေဆုံးတယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကောင်စီက စက်တင်ဘာလ ၆ ရက် နေ့လယ် ၁၂ နာရီ ၅၇ မိနစ်မှာ ဂျက်ဖိုက်တာ နဲ့ နှစ်ကြိမ် ဗုံး လေးလုံးကြဲပြီး၊ စက်သေနတ်နဲ့ ၃ ကြိမ်ပစ်ခတ်သွားတာလို့ သိရပါတယ်။
“တိုက်ပွဲမရှိဘဲနဲ့ ပြည်သူတွေ စစ်ရှောင်တွေကို ရည်ရွယ်ချက်ရှိရှိ ပစ်သွားတာ။ မိသားစုငါးယောက်မှာ ဖအေကြီး တစ်ယောက်ပဲ ကျန်တယ်။အကုန်သေတာပဲ” လို့ ဒေသခံတစ်ဦးက သံလွင်တိုင်းမ်ကို ပြောပါတယ်။
အဲဒီဒေသမှာ တိုက်ပွဲဖြစ်ပွားခြင်း မရှိဘဲ စစ်ရှောင်တွေနေထိုင်တဲ့ စာသင်ကျောင်းကို ရည်ရွယ်ချက်ရှိရှိ ဦးတည်တိုက်ခိုက်သွားတာ ဖြစ်တယ်လို့ ဒေသခံတွေက ပြောပါတယ်။
အဲဒီလို ပစ်ခတ်တာကြောင့် စာသင်ကျောင်းဘေးကနေ အိမ်တွေကို ထိမှန်ပြီး အသက် ၅ နှစ်အရွယ် ကလေးငယ်တစ်ဦး၊ ဆယ်တန်းဖြေဆိုထားတဲ့ အရွယ်မရောက်သေးသူတစ်ဦးအပါအဝင် ၆ ဦးသေဆုံးပြီး ၅ ဦးဒဏ်ရာရရှိခဲ့တယ်လို့ သိရပါတယ်။
စစ်ကောင်စီဟာ ကရင်နီပြည်နယ် ဘန်ကောက်စစ်ရှောင်စခန်းနဲ့ နမ့်ခမ်းက စစ်ရှောင်စခန်းတွေကိုလည်း စက်တင်ဘာလ ၅၊ ၆ ရက်မှာ ရည်ရွယ်ချက်ရှိရှိ ပစ်ခတ်ခဲ့တာကြောင့် ၁၉ ဦးထက်မနည်း သေဆုံးပြီး ထိခိုက်ဒဏ်ရာရသူ များပြားခဲ့ပါတယ်။
သတင်း – သံလွင်းတိုင်းမ်
ဓာတ်ပုံ – We Love Myaing
ပုံစာ – ၂၀၂၂ ခုနှစ်၊ မေလ ၁၄ ရက်နေ့မှာ လက်ယက်မရွာ မီးရှို့ဖျက်ဆီးခံခဲ့ရစဉ်