နေပြည်တော် ၊ ဩဂုတ် ၂၃
မြန်မာနိုင်ငံအနေနဲ့ ပြည်တွင်းရှိ တရုတ်စီမံကိန်းနဲ့ ဝန်ထမ်းတွေရဲ့ ဘေးကင်းလုံခြုံမှုကို အစွမ်းကုန်ထိန်းသိမ်းကာကွယ်သွားမယ်လို့ စစ်ခေါင်းဆောင်က တရုတ်သံအမတ်ကြီး မစ္စမာကျားကို ပြောပါတယ်။
ဩဂုတ် ၂၁ ရက်နေ့မှာ ဗိုလ်ချုပ်မှူးကြီး မင်းအောင်လှိုင်ထံ မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျားက သူ့ရဲ့သံအမတ်ခန့်အပ်လွှာပေးအပ်ချိန်မှာ စစ်ခေါင်းဆောင်က ပြောကြားခဲ့တာပါ။
မြန်မာနိုင်ငံဆိုင်ရာ တရုတ်သံရုံးရဲ့ ထုတ်ပြန်ချက်အရ စစ်ခေါင်းဆောင်က မြန်မာ-တရုတ် နယ်စပ်ဒေသတည်ငြိမ်အေးချမ်းရေးကို လက်တွေ့ကျကျ ကာကွယ်စောင့်ရှောက်သွားမယ်လို့ ဆိုပါတယ်။
ဒါကြောင့် တရုတ်နိုင်ငံလုံခြုံရေးနဲ့ အကျိုးစီးပွားကို ထိခိုက်ပျက်ပြားစေမယ့် ဘယ်ကိစ္စရပ်ကိုမဆို ခွင့်ပြု မှာမဟုတ်ဘူးလို့ ပြောကြားခဲ့တာ ဖြစ်ပါတယ်။
ဒါပေမယ့် မြန်မာနိုင်ငံမှာ ရှိတဲ့ တရုတ်ရဲ့ ရင်းနှီးမြှုပ်နှံမှုစီမံကိန်းတွေထဲက တိုက်ပွဲဖြစ်ပွားတဲ့ ဒေသနဲ့ ဆက်စပ်ဒေသတွင်းက စီမံကိန်းတွေကိုတော့ တော်လှန်ရေးအဖွဲ့တွေ လက်ထဲထိန်းချုပ်ခံထားရတာပါ။
ISP-Myanmar ရဲ့ အချက်အလက်အရ ရှမ်းမြောက်အပါအဝင် ဆက်စပ်နေတဲ့ မြန်မာနိုင်ငံအလယ်ပိုင်းဒေသတွေမှာ တရုတ်ရင်းနှီးမြှုပ်နှံမှု ၁၉ ခုရှိတဲ့ထဲက ၁၀ ခုကို EAOs တွေနဲ့ PDF တွေက အ ပြည့်အဝ ထိန်းချုပ်ထားပါတယ်။
ရှမ်းမြောက်အတွင်းရှိ တရုတ်-မြန်မာ ရေနံနဲ့ သဘာဝဓာတ်ငွေ့ပိုက်လိုင်း၊ နယ်စပ်ဖြတ်ကျော် ဓာတ် အားလိုင်းနဲ့ အပြည်ပြည်ဆိုင်ရာ ကုန်းတွင်း – ရေကြောင်းကုန်သွယ်ရေး စင်္ကြံသစ်တို့အပြင် မူဆယ် -မန္တလေးရထားလမ်းနဲ့ ကုန်သွယ်ရေးလမ်းကြောင်းတွေကိုလည်း EAOs တွေက ထိန်းချုပ်ထားတာပါ။
ရခိုင်ပြည်နယ်မှာလည်း တရုတ်ရင်းနှီးမြှုပ်နှံမှုစီမံကိန်း ၁၁ ခုရှိတဲ့ထဲက ၉ ခုကို အာရက္ခတပ်တော် AA က တစ်စိတ်တစ်ပိုင်း ထိန်းချုပ်ထားတယ်လို့ ISP – Myanmar ရဲ့ အချက်အလက်တွေက ဖော် ပြပါတယ်။
အဲဒီထဲမှာ ကျောက်ဖြူရေနက်ဆိပ်ကမ်းနဲ့ အထူးစီးပွားရေးဇုန်စီမံကိန်း၊ မန္တလေး-ကျောက်ဖြူ ရ ထားလမ်း၊ ရေနံနဲ့သဘာဝဓာတ်ငွေ့ပိုက်လိုင်းအပါအဝင် ကုန်သွယ်ရေးလမ်းကြောင်းတွေ ပါဝင်တယ်လို့ ဆိုပါတယ်။
မြန်မာ-တရုတ်နယ်စပ်ရှိ တရားဝင်ကုန်သွယ်ရေးစခန်းနဲ့ ဂိတ် ၈ ခုထဲက ၆ ခုကို တိုင်းရင်းသားလက် နက်ကိုင်အဖွဲ့အစည်း EAOs တွေက ထိန်းချုပ်ထားတယ်လို့ ISP-Myanmar က ဩဂုတ် ၁၉ ရက်နေ့မှာ ထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ-MOI/Social Media