လောင်းလုံး၊ ဇူလိုင် ၁၄
တနင်္သာရီတိုင်း လောင်းလုံးမြို့နယ် မင်းရပ်ကျေးရွာဘက်ကို စစ်ကောင်စီတပ် စစ်ကြောင်းထိုးဝင်ရောက်လာတာကြောင့် ဒေသခံထောင်ချီ နေရပ်စွန့်ခွာ ထွက်ပြေးတိမ်းရှောင်နေရတယ်လို့ စစ်ရှောင်ဒေသခံတွေထံက သိရပါတယ်။
စစ်ကောင်စီတပ်ဟာ ဇူလိုင် ၁၃ ရက်နေ့ မနက်ပိုင်းကစပြီး မင်းရပ်ကျေးရွာဘက်ကို စစ်ကြောင်းနှစ်ကြောင်းခွဲပြီး စစ်ကြောင်းထိုးလာတဲ့အတွက် လမ်းတလျှောက်က ကျေးရွာနေ ဒေသခံပြည်သူတွေ ထွက်ပြေးတိမ်းရှောင်နေရတာပါ။
စစ်ကြောင်းဝင်ရောက်လာတာကြောင့် မင်းရပ်၊ သဲပုံ၊ သာယာကုန်း၊ သဗျာ၊ ပန္နဲလဲနဲ့ အင်းဇောက်ကျေးရွာတို့က ဒေသခံထောင်နဲ့ချီ နေရပ်စွန့်ခွာ ထွက်ပြေးတိမ်းရှောင်နေရတာ ဖြစ်ပါတယ်။
စစ်ရှောင်ဒေသခံတွေဟာ လက်ရှိမှာတော့ လောင်းလုံးမြို့ပေါ်နဲ့ ဘေးလွတ်ရာနေရာတွေကို အရေးပေါ် တိမ်းရှောင်လာရတာကြောင့် လူသားချင်းစာနာမှု အကူအညီတွေ လိုအပ်နေတယ်လို့ ဆိုပါတယ်။
စစ်ရှောင်ဒေသခံတွေရဲ့ ပြောပြချက်အရ အဲဒီစစ်ကြောင်းဟာ ပြီးခဲ့တဲ့ရက်ပိုင်းက ဖြစ်ပွားခဲ့တဲ့ သဗျာကျေးရွာတိုက်ပွဲအတွင်း အထိနာခဲ့တဲ့အတွက် အင်အားဖြည့်တင်းပြီး ထပ်မံစစ်ကြောင်းထိုးလာတာ ဖြစ်တယ်လို့ သိရပါတယ်။
ပြီးခဲ့တဲ့ ဇူလိုင် ၁၀ ရက်နေ့က သဗျာကျေးရွာထဲ စစ်ကြောင်းဝင်လာတဲ့ စစ်ကောင်စီတပ်နဲ့ဒေသကာ ကွယ်ရေးပူးပေါင်းတပ်တို့ တိုက်ပွဲဖြစ်ပွားခဲ့ပြီး စစ်ကောင်စီဘက်က ၃ ဦးထက်မနည်းသေဆုံးခဲ့ပါတယ်။
အဲဒီတိုက်ပွဲအတွင်း ဗုံးခိုးကျင်းထဲကနေ ထွက်လာတဲ့ သဗျာကျေးရွာနေ အသက် ၁၄ နှစ်အရွယ် မသက်ထားစံ (ခေါ်) ဝိုင်းဝိုင်းလေးဟာ စစ်ကောင်စီတပ်ရဲ့ အကြောင်းမဲ့သေနတ်နဲ့ပစ်ခတ်မှုကြောင့် သေဆုံးခဲ့တယ်လို့ သိရပါတယ်။
ဒေသအခြေစိုက်သုတေသနအဖွဲ့ဖြစ်တဲ့ FE5 Tanintharyi ရဲ့ ဇွန် ၁၂ ရက်နေ့ထုတ် အစီရင်ခံစာအရ နှစ်ဖက်တိုက်ပွဲတွေ ပြန်လည်ပြင်းထန်လာတဲ့ တနင်္သာရီတိုင်းမှာ နေရပ်စွန့်ခွာထွက်ပြေးတိမ်း ရှောင်နေရတဲ့ စစ်ဘေးဒုက္ခသည် ခြောက်သောင်းနီးပါးအထိ ရှိလာခဲ့ပါတယ်။
သတင်း – သံလွင်တိုင်းမ်
ဓာတ်ပုံ-CJ