မော်လမြိုင်၊ ဇန်နဝါရီ ၄
နိုင်ငံတဝန်းရှိ အကျဉ်းထောင်၊အချုပ်ထောင်နဲ့ အကျဉ်းစခန်းအသီးသီးမှာ ပြစ်ဒဏ်ကျခံနေရတဲ့ အကျဉ်းသူ၊အကျဉ်းသား ၉၆၅၂ ဦးကို လွတ်ငြိမ်းချမ်းသာခွင့်ပြုလိုက်တယ်လို့ စစ်ကောင်စီက ဒီနေ့ မနက်ပိုင်းမှာ ကြေညာပါတယ်။
လွတ်ငြိမ်းချမ်းသာခွင့်ပြုလိုက်တဲ့ အကျဉ်သားတွေဟာ နောက်တစ်ကြိမ် ပြစ်မှုကျူးလွန်ပါက အရင်ပြစ်ဒဏ်ကိုပါ တစ်ပေါင်းတစ်စည်း ကျခံရမယ်ဆိုတဲ့ ကန့်သတ်ချက်နဲ့ ပြန်လွှတ်ပေးခဲ့တာ ဖြစ်ပါတယ်။
ပြန်လွှတ်ပေးတဲ့ အကျဉ်းသားတွေထဲမှာ နိုင်ငံခြားသား အကျဉ်းသူ၊အကျဉ်းသား ၁၁၄ ဦး ပါဝင်ပြီး သူတို့ကို ပြည်နှင်ဒဏ်ပေးလိုက်တယ်လို့ စစ်ကောင်စီရဲ့ ကြေညာချက်အရ သိရပါတယ်။
စစ်ကောင်စီကတော့ ဒီနေ့မှာ ကျရောက်တဲ့ ၇၆ ကြိမ်မြောက် လွတ်လပ်ရေးနေ့ အထိမ်းအမှတ်အဖြစ် အကျဉ်းသူ၊အကျဉ်းသားတွေကို လွတ်ငြိမ်းချမ်းသာခွင့် ပေးအပ်ခဲ့တာ ဖြစ်တယ်လို့ ဆိုပါတယ်။
စစ်ကောင်စီ ပြန်လွှတ်ပေးတဲ့ အကျဉ်းသားတွေထဲမှာ နိုင်ငံရေးအကျဉ်းသား ဘယ်နှစ်ဦး ပါဝင်လဲဆိုတာ သံလွင်တိုင်းမ်အနေနဲ့ ဆက်လက်စုံစမ်းနေဆဲ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ – MOI