ကော်သူးလေ – ဩဂုတ်(၁၂)
စစ်အာဏာရှင်ရဲ့ လမ်းစဉ်နဲ့အုပ်ချုပ်ရေး လုပ်ငန်းတွေအားလုံး အဆုံးသတ်နိုင်ဖို့အတွက် တိုင်းရင်းသားတော်လှန်ရေး အဖွဲ့အစည်းတွေ၊ ဒီမိုကရေစီအစုအဖွဲ့တွေအပြင် လူထုအခြေ ပြုအဖွဲ့အစည်းတွေနဲ့ လက်တွဲလုပ်ဆောင်ရမယ်လို့ ကရင်အမျိုးသားအစည်းအရုံး(KNU) ဥက္ကဋ္ဌက ပြောကြားလိုက်ပါတယ်။
ဩဂုတ် ၁၂ ရက်နေ့မှာ ကျရောက်တဲ့ ၇၃ နှစ်မြောက် ကရင့်အမျိုးသားအာဇာနည်နေ့ မိန့်ခွန့်းမှာ ကရင်အမျိုးသားအစည်းအရုံး(KNU)ဥက္ကဋ္ဌ ပဒိုစောကွယ်ထူးဝင်းက ပြောကြားသွားခဲ့တာဖြစ်ပြီး စစ်အုပ်စုဟာ ဗမာလူမျိုးကြီးဝါဒကို အသုံးချကာ အာဏာရှင်စနစ်ကို တည်ဆောက်ပြီး ကိုယ်ကျိုးရှာနေကြတဲ့ အုပ်စုဖြစ်တယ်လို့ ပြောဆိုသွားခဲ့တာပါ။
၂၀၂၁ ခုနှစ် ဖေဖော်ဝါရီ ၁ ရက်နေ့မှစလို့ စစ်အာဏာရှင်အုပ်စုဟာ နိုင်ငံရဲ့အာဏာကို နောက်ထပ် တဖန် အတင်းအဓမ္မရယူလာပြီး နိုင်ငံ့အာဏာကို အခုလို အတင်းအဓမ္မရယူလာတဲ့အပေါ် ပြည်သူလူထုက လုံးဝလက်ခံနိုင်ခြင်းမရှိဘဲ နည်းလမ်းမျိုးစုံနဲ့ ဆန့်ကျင်ကာ လက်နက်ကိုင်တော်လှန်ရတဲ့ အဆင့်ကို ရောက်ရှိသွားခဲ့သလို ပြည်သူလူထုရဲ့ ဆန့်ကျင်တော်လှန် မှုတွေကို ဖြိုခွဲဖျက်ဆီးနိုင်ဖို့ အာဏာရှင်စစ်အုပ်စုက စစ်တပ်ကိုအသုံးချပြီး စစ်ရေးအရ အကြမ်း ဖက်တဲ့နည်းလမ်းတွေကို ဆိုးဆိုးရွားရွားလုပ်ဆောင်နေတယ်လို့ ပဒိုစောကွယ်ထူးဝင်းက ပြောပါတယ်။
စစ်အုပ်စုက လက်နက်ကြီးတွေ၊ အမြောက်ကြီးတွေအပြင် တိုက်လေယာဉ်တွေကိုပါ အသုံးပြု တိုက်ခိုက်နေပေမယ့် တိုင်းရင်းသားပြည်သူလူထုတွေအနေနဲ့ အညံ့ခံခြင်း အလျဉ်းမရှိဘဲ လက်ရှိ အခြေအနေမှာ တိုင်းရင်းသားလူမျိုးအားလုံးဟာ နေ့စဉ်ဘဝအသက်တာမှာ အခက်အခဲတွေ၊ စိုးရိမ်ကြောင့်ကြမှုတွေနဲ့ ကြောက်ရွံ့မှုပုံစံအမျိုးမျိုးကို ရင်ဆိုင်နေကြရတယ်လို့လည်း ဆိုပါတယ်။
အာဏာသိမ်းစစ်အုပ်စုဟာ အဖက်ဖက်က ဖိအားတွေကို ခံစားနေရသလို လူမျိုးကြီးဝါဒကို စွဲကိုင်အသုံးချနေတဲ့ စစ်အုပ်စုဟာ တိုင်းရင်းသားလူမျိုးတွေနဲ့ ပြည်သူလူထုအပေါ် အကြမ်းဖက် ဖိနှိပ်မှုတွေကို ဆက်လက်လုပ်ဆောင်နေဆဲဖြစ်ပြီး စစ်အုပ်ချုပ်ရေးကို ဆက်လက်ကိုင်စွဲကာ နည်းပရိယာယ်မျိုးစုံနဲ့ လှည့်စားနေတယ်လို့လည်း KNU ဥက္ကဋ္ဌက ပြောပါတယ်။
ဒါ့အပြင် အစုအဖွဲ့အားလုံးရဲ့ အင်အားတွေကို စုစည်းပြီး စစ်တပ်ရဲ့ကံကြမ္မာကို ပြည်သူလူထုရဲ့ လက်ဝယ်ထဲကို ပြန်လည်လွဲအပ်ကာ တိုင်းရင်းသားလူမျိုးတွေနဲ့ ပြည်သူလူထုရဲ့ လိုအင်ဆန္ဒအတိုင်း လိုက်နာလုပ်ဆောင်နိုင်တဲ့အထိ ရှေ့ဆက်ကြိုးပမ်းရမယ်လို့ KNU ဥက္ကဋ္ဌ ပဒိုစောကွယ်ထူးဝင်းက တိုက်တွန်းပြောကြားလိုက်ပါတယ်။
ကရင်အမျိုးသားအစည်းအရုံး(KNU) လက်အောက်မှာရှိတဲ့ ကရင်အမျိုးသားလွတ်မြောက်ရေးတပ်မတော်(KNLA)ကလည်း ကရင်တော်လှန်ရေးခေါင်းဆောင်တွေ၊ ရဲဘော်တွေအနေနဲ့ လူထုဆန့်ကျင်ရေး လုပ်ရပ်မှန်သမျှကို ရှောင်ရှားကြရမှာဖြစ်ပြီး ရှေ့ဆက်ပြီး မပြီးဆုံးသေးတဲ့ သမိုင်းပေးတာဝန်တွေကို ဆက်လက်ထမ်းရွက်ဖို့၊ မိမိတို့ရဲ့ လမ်းစဉ်လုပ်ငန်းစဉ်တွေအပေါ် မားမားမတ်မတ်ရပ်တည်ကြဖို့ (၇၃)နှစ်မြောက် ကရင်အမျိုးသားအာဇာနည်နေ့ အထိမ်းအမှတ် အခမ်းအနားကို သဝဏ်လွှာပေးပို့ခဲ့ပြီး အသိပေးတိုက်တွန်းပြောကြားခဲ့ပါတယ်။
သတင်း – သံလွင်တိုင်းမ်
ဓာတ်ပုံ – KNU