လောင်းလုံး၊ ဒီဇင်ဘာ(၆)
တနင်္သာရီတိုင်းဒေသကြီး၊ လောင်းလုံးမြို့နယ်၊ မောင်းမကန်ကျေးရွာရှိ မောင်းမကန်နယ်မြေရဲစခန်းကို ပြည်သူ့ကာကွယ်ရေးပူးပေါင်းတပ်ဖွဲ့က ဝင်ရောက်တိုက်ခိုက်ခဲ့တယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကောင်စီ မောင်းမကန်နယ်မြေရဲစခန်းကို ပြီးခဲ့တဲ့ ဒီဇင်ဘာ ၄ ရက်နေ့ ည ၈ နာရီအချိန်လောက်မှာ ဒေသပြည်သူ့ကာကွယ်ရေး ပူးပေါင်းတပ်ဖွဲ့က ဝင်ရောက် တိုက်ခိုက်ခဲ့တာပါ။
ရဲစခန်းတိုက်ခိုက်ခံရတာကြောင့် နှစ်ဖက်အပြန်အလှန် ပစ်ခတ်မှု တစ်နာရီနီးပါးအကြာ ဖြစ်ပွားခဲ့သလို စစ်ကူလာတဲ့ စစ်ကောင်စီ ကားတစ်စီးကိုလည်း သုံးထပ်ကွေ့မှာ ဒေသခံ PDF တွေက ထပ်မံမိုင်းဆွဲတိုက်ခိုက်ခဲ့ပါတယ်။
ရဲစခန်းတိုက်ခိုက်ခံရပြီးနောက် ထိခိုက်သေဆုံးနိုင်တဲ့ စစ်ကောင်စီ ရဲတပ်ဖွဲ့ဝင်တွေကို အရေးပေါ်ကားတစ်စီးနဲ့ ညတွင်းချင်း လာရောက်သယ်ဆောင်သွားသလို ဒီဇင်ဘာ ၅ ရက်နေ့ မနက်ပိုင်းမှာ စခန်းထဲကို လူနာတင်ယာဉ်တွေ ထပ်မံရောက်ရှိတယ်လို့ ဒေသခံတစ်ဦးက ပြောပါတယ်။
အဲဒီရဲစခန်းတိုက်ခိုက်မှုအတွင်း စစ်ကောင်စီ ရဲတပ်ဖွဲ့ဝင် ၅ ဦးထက်မနည်း ထိခိုက်သေဆုံးနိုင်တယ်လို့ ပြည်သူ့ကာကွယ်ရေးတပ်ဖွဲ့နဲ့ နီးစပ်သူတွေက ပြောဆိုကြပေမယ့် သံလွင်တိုင်းမ်အနေနဲ့ သီးခြား အတည်မပြုနိုင်သေးပါဘူး။
စစ်ကောင်စီ ရဲစခန်း တိုက်ခိုက်ခံရပြီးနောက် ဒီနေ့မနက်ပိုင်းကစပြီး စစ်ကောင်စီတပ်ဖွဲ့ဝင်တွေက မောင်းမကန်ကျေးရွာအနီးတဝိုက်မှာ တောနင်းရှာဖွေတာတွေ လုပ်ဆောင်နေတဲ့အတွက် တိုက်ပွဲဖြစ်ပွားမှာကို ဒေသခံတွေ စိုးရိမ်နေကြတာပါ။
မောင်းမကန်နယ်မြေရဲစခန်းဟာ စစ်တပ်အာဏာသိမ်းပြီးနောက် ပထမဆုံးအကြိမ် တိုက်ခိုက်ခံလိုက်ရတာ ဖြစ်ပါတယ်။
သတင်း – သံလွင်တိုင်းမ်