ရန်ကုန်၊ နိုဝင်ဘာ(၄)
အာဏာသိမ်းစစ်ကောင်စီက အမျိုးသားပညာရေးဥပဒေကို ပြန်လည်ပြင်ဆင်လိုက်တာဟာ စစ်အာဏာ ရှင်စနစ်ကို အပြီးသွတ်သွင်းဖို့ လုပ်ဆောင်မှု ဖြစ်ပြီး ပညာရေးကဏ္ဍမှာ တိုင်းရင်းသားတွေရဲ့ ဘာသာ စကားစာပေကို ဗမာ ကိုလိုနီပြုတာလို့ တိုင်းရင်းသားခေါင်းဆောင်တွေနဲ့ ကျောင်းသားသမဂ္ဂတွေက ဝေဖန်လိုက်ပါတယ်။
ပြည်ထောင်စုလွှတ်တော်ကနေ ၂၀၁၄ ခုနှစ်မှာ အတည်ပြုပြဌာန်းထားတဲ့ အမျိုးသားပညာရေးဥပဒေကို အာဏာသိမ်း စစ်ကောင်စီက ပြန်လည် ပြင်ဆင်ပြဌာန်းလိုက်တယ်လို့ ပြီးခဲ့တဲ့ အောက်တိုဘာ ၂၉ ရက်နေ့မှာ ထုတ်ပြန်လာပါတယ်။
စစ်ကောင်စီပြင်ဆင်လိုက်တဲ့ ပုဒ်မ ၄၃၊ ပုဒ်မခွဲ (ခ) မှာ “အခြေခံပညာအဆင့်တွင် မြန်မာဘာသာစကားကို စာသင်ခန်းသုံး ဘာသာစကားအဖြစ် အသုံးပြုရမည်” ဆိုပြီး အစားထိုးလိုက်တာပါ။အဲဒီပုဒ်မဟာ ဦးသိန်းစိန်အစိုးရလက်ထက် ၂၀၁၅ ခုနှစ် ဇွန်လမှာ ပြင်ဆင်လိုက်တဲ့ အမျိုးသားပညာရေးဥပဒေပါ ပုဒ်မ ၄၃၊ ပုဒ်မခွဲ (ခ) အရ “အခြေခံပညာအဆင့်တွင် တိုင်းရင်းသားဘာသာစကားကို မြန်မာ ဘာသာစကားနှင့်အတူ စာသင်ခန်းသုံး ဘာသာစကားအဖြစ် တွဲဖက်အသုံးပြုနိုင်သည်”လို့ ပြဋ္ဌာန်းခဲ့တာပါ။
ပြည်ထောင်စုလွှတ်တော်ကနေ အတည်ပြုပြဋ္ဌာန်းလိုက်တဲ့ အမျိုးသားပညာရေးဥပဒေဟာ ပညာရေးလွတ်လပ်ခွင့်တွေ မရှိတဲ့အတွက် ပြင်ဆင်ပေးဖို့ ၂၀၁၅ ခုနှစ် မတ်လမှာ ဒီမိုကရေစီပညာရေးသပိတ် ပေါ်ပေါက်ခဲ့ပြီး အချက် ၁၁ ချက်ကို တောင်းဆိုခဲ့ကြတာပါ။
ဒီမိုကရေစီပညာရေးသပိတ်မှာ ပါဝင်ခဲ့သူ ဗကသအဖွဲ့ချုပ်၊ ကျောင်းသားခေါင်းဆောင်ဟောင်းဖြစ်တဲ့ ကိုမင်းသွေးသစ်ကတော့ စစ်ကောင်စီပြင်ဆင်လိုက်တဲ့ ဥပဒေဟာ ပညာရေးကဏ္ဍမှာ တိုင်းရင်းသားတွေရဲ့ ဘာသာစကားစာပေကို ဗမာကိုလိုနီပြုတာလို့ ဝေဖန်တာပါ။
“တကယ်တမ်းကျတော့ စစ်အာဏာရှင်စနစ်ပြန် အကောင်အထည်ဖော်တယ်။အဲဒီ နိုင်ငံအုပ်ချုပ်တဲ့ စစ်အာဏာရှင်စနစ်အောက်မှာ ပညာရေးကဏ္ဍမှာ ဗမာလူမျိုးကြီးဝါဒကို ပြန်ပြီးအကောင်အထည်ဖော်ပြီးတော့ ကျန်တဲ့ တိုင်းရင်းသားတွေရဲ့ ယဉ်ကျေးမှု ဓလေ့ထုံးတမ်းအစဉ်အလာတွေနဲ့ ဘာသာစကားစာပေတွေကို ဗမာကိုလိုနီပြုလိုက်တယ်လို့ပဲ သုံးသပ်ချင်ပါတယ်။ဒါမျိုးက ဒီမိုကရေစီစစ်စစ်စနစ်မှာ ရှိမလာနိုင်ပါဘူး။ရှိနေတဲ့ အစုအဖွဲ့တွေ တော်လှန်ရေးအင်အားစုတွေအားလုံး စစ်အာဏာရှင်စနစ်ကို အမြစ်ပြတ်ကျဆုံးအောင် တော်လှန်ပြီးတော့ တိုက်ထုတ်နိုင်ရင်တော့ ဒီဟာတွေ အားလုံးက ဖက်ဒရယ်ဒီမိုကရေစီစနစ်နဲ့ လျော်ညီတဲ့ ပုံစံမျိုး မဖြစ်မနေ အကုန်လုံး ပြန်ပြောင်းရမှာ” လို့ သူက ဆိုပါတယ်။
ဒါ့အပြင် စစ်ကောင်စီက ၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၁၉ အရဆိုပြီး အမျိုးသားပညာရေးဥပဒေကို ပြင်ဆင်နေတာဟာ ဥပဒေအရ ခွင့်ပြုထားတာ မဟုတ်သလို စစ်အာဏာရှင်အဆက်ဆက် ကျင့်သုံးတဲ့ ကျန်းမာရေး၊ ပညာရေး၊ အုပ်ချုပ်ရေး၊ ဥပဒေပြုရေး စတဲ့ကဏ္ဍအားလုံးကို အာဏာရှင်ပုံစံ သွတ်သွင်းတဲ့သဘောမျိုး ဖြစ်တယ်လို့ ဆိုပါတယ်။
ရခိုင်ပြည်ကျောင်းသားသမဂ္ဂကလည်း စစ်ကောင်စီပြင်ဆင်လိုက်တဲ့ ပုဒ်မ ၄၃၊ ပုဒ်မခွဲ (ခ) ဟာ မြန်မာ နိုင်ငံရှိ ဗမာမဟုတ်တဲ့ အခြားတိုင်းရင်းသားလူမျိုးတွေရဲ့ မိခင်ဘာသာစကားတွေကို ပပျောက်စေဖို့ ရည်ရွယ်ချက်နဲ့ လူမျိုးကြီးဝါဒဆန်ဆန် လုပ်ဆောင်တာဖြစ်တဲ့အတွက် လုံးဝ ကန့်ကွက်ကြောင်း ပြီးခဲ့တဲ့ အောက်တိုဘာ ၃၀ ရက်နေ့မှာ သဘောထား ထုတ်ပြန်ခဲ့တာပါ။
မော်လမြိုင်တက္ကသိုလ် ကျောင်းသားများသမဂ္ဂ၊ ဥက္ကဋ္ဌ မင်းသံစဉ်ဦးကတော့ ၂၀၀၈ ဖွဲ့စည်းပုံအခြေခံဥပဒေကို အခြေခံပြီး ပြဌာန်းထားတဲ့ အမျိုးသားပညာရေးဥပဒေကို ဘယ်တုန်းကမှ လက်မခံခဲ့သလို အခုလိုမျိုး စစ်ကောင်စီကနေ ပြန်လည် ပြင်ဆင်တာဟာ ဗမာမှုပြုတာလို့ ပြောပါတယ်။
“ဒါက လူမျိုးတစ်မျိုးရဲ့ စာပေ၊လူမျိုးတစ်မျိုးရဲ့ ဘာသာစကားကို ပိတ်ပင်ခြင်းဟာ လက်နက်ကိုင်ပြီး လူမျိုးတုံး မသတ်သော်ငြားလည်း ဒါတစ်ဖက်တစ်လမ်းနဲ့ ဂျီနိုဆိုက် လူမျိုးတစ်မျိုးကို ပြုန်းတီးအောင် ဂျီနိုဆိုက်ဖြစ်အောင် (လူမျိုးတုံးအောင်) လုပ်တယ်လို့ မှတ်ယူတယ်။လူမျိုးတစ်မျိုးမှာ ဘာသာစကားမရှိရင် သေတာပဲလေ။ဆိုတော့ ဒါက ဂျီနိုဆိုက်လို့ ထင်တယ်။လုံဝ အတင်းအဖျင်းကြီးကို Burmanization (ဗမာမှုပြုခြင်း) လုပ်တဲ့ သဘောလို့ မြင်တယ်” လို့ သူက ပြောပါတယ်။
မူလအမျိုးသားပညာရေးဥပဒေပါ ပုဒ်မ ၄၄ အရ “တိုင်းဒေသကြီး သို့မဟုတ် ပြည်နယ်များတွင် တိုင်းရင်း သားစာပေနှင့် ဘာသာစကားသင်ကြားသင်ယူမှုကို သက်ဆိုင်ရာတိုင်းဒေသကြီး သို့မဟုတ် ပြည် နယ်အစိုး ရအဖွဲ့၏ အစီအစဉ်ဖြင့် အခြေခံပညာမူလတန်းအဆင့်မှ စတင်၍ အကောင်အထည်ဖော်ပြီး အဆင့်ဆင့်တိုးချဲ့ ဆောင်ရွက်နိုင်သည်”လို့ ပြဌာန်းထားပါတယ်။
ဒါကို စစ်ကောင်စီပြင်ဆင်လိုက်တဲ့ ဥပဒေမှာတော့ “တိုင်းဒေသကြီး သို့မဟုတ် ပြည်နယ်များတွင် တိုင်းရင်း သားစာပေနှင့် ဘာသာစကားသင်ကြားသင်ယူမှုကို သက်ဆိုင်ရာတိုင်းဒေသကြီး သို့မဟုတ် ပြည် နယ်အစိုးရ အဖွဲ့၏ အစီအစဉ်ဖြင့် အခြေခံပညာမူလတန်းအဆင့်တွင် ဆောင်ရွက်နိုင်သည်” ဆိုပြီး အဆင့်ဆင့် တိုးချဲ့ဆောင်ရွက်မှုတွေကို ကန့်သတ်လိုက်တာပါ။
ပအိုဝ့်အမျိုးသားဖက်ဒရယ်ကောင်စီ(PNFC) ၊ ဥက္ကဋ္ဌ ခွန်မြင့်ထွန်းကတော့ စစ်ကောင်စီဟာ တရားမဝင် အာဏာသိမ်းထားတာဖြစ်တဲ့အတွက် လွှတ်တော်မရှိဘဲ ဥပဒေကို ပြဋ္ဌာန်းလို့ မရသလို တိုင်းရင်းသားဘာသာစကားကို ပိတ်ပင်တာဟာ ဖက်ဒရယ်ပြည်ထောင်စုတည်ဆောက်ရေးမှာ ထိခိုက်စေတယ်လို့ ဝေဖန်တာပါ။
“ဒီကနေ့ ကျွန်တော်တို့ တိုင်းပြည်မှာ တိုင်းရင်းသားပေါင်းစုံ လူထုတစ်ရပ်လုံးက ဖွဲ့ဆိုတဲ့ ငြိမ်းချမ်းရေးအဓိပ္ပာယ်က စစ်အာဏာရှင်စနစ် ချုပ်ငြိမ်းပြီးတော့ ဖက်ဒရယ်ပြည်ထောင်စု တည်ဆောက်ရေးဖြစ်ပါတယ်။အဲဒီတော့ ဖက်ဒရယ်ပြည်ထောင်စုကို တည်ဆောက်မယ်ဆိုရင်တော့ တိုင်းရင်းသားဘာသာ စကားတွေကလည်း မြန်မာစကားလိုပဲ အသုံးပြုခွင့်ရှိရမယ်၊ ဖွံ့ဖြိုးတိုးတက်ခွင့် ရှိရမယ်။ကျွန်တော်တို့ မိမိဘာသာစကားအသုံးပြုခွင့်တွေကို အခုလိုပိတ်ပင်တာက ငြိမ်းချမ်းရေးရော ဖက်ဒရယ်ပြည်ထောင်စု တည်ဆောက်ရေးပါ ထိခိုက်စေတယ်” လို့ သူက ပြောပါတယ်။
စစ်ကောင်စီ ပြင်ဆင်လိုက်တဲ့ ပုဒ်မ ၅ မှာဆိုရင်လည်း အမျိုးသားပညာရေးကော်မရှင်ကို အစိုးရက ဖွဲ့ စည်းရမှာဖြစ်သလို အစိုးရ၊ဝန်ကြီးဌာန၊ အခြေခံပညာရေးနဲ့ ဆရာအတတ်သင်ပညာရေး စတဲ့ အစိုးရကဏ္ဍမှာပါဝင်နေသူတွေကို ကော်မရှင်မှာ ပါဝင်ခွင့် ပေးထားတာပါ။
အမျိုးသားပညာရေးကော်မရှင် ဖွဲ့စည်းမှုနဲ့ ပတ်သက်ပြီး အစိုးရမဟုတ်တဲ့ တိုင်းရင်းသားလူမျိုးစု ကိုယ် စားပြုသူတွေ၊ ကျောင်းသားသမဂ္ဂ ကိုယ်စားပြုသူတွေနဲ့ ဆရာ၊ဆရာမ သမဂ္ဂ ကိုယ်စားပြုသူတွေကို ချန်လှပ်ထားတာ ဖြစ်ပါတယ်။
စစ်တပ်အာဏာသိမ်းပြီးနောက်ပိုင်း ပြည်ထောင်စုလွှတ်တော်ကနေ အတည်ပြုပြီးတဲ့ ဥပဒေတွေကို စစ်ကောင်စီက လွှတ်တော်မရှိဘဲ ၂၀၀၈ ဖွဲ့စည်းပုံအခြေခံဥပဒေပုဒ်မ ၄၁၉ အရ ပြင်ဆင်ပြဌာန်းတာတွေ ဆက်တိုက်လုပ်ဆောင်နေပါတယ်။
ပြီးခဲ့တဲ့ အောက်တိုဘာ ၂၈ ရက်နေ့ကလည်း အမြင့်ဆုံးထောင်ဒဏ် ငါးနှစ်နဲ့ ငွေဒဏ် ကျပ်သိန်းငါးဆယ်အထိ ပြစ်ဒဏ်ချမှတ်နိုင်တဲ့အပြင် အသင်းအဖွဲ့ပိုင် ငွေကြေးနဲ့ပစ္စည်းတွေကို နိုင်ငံတော်ဘဏ္ဍာအဖြစ် သိမ်းဆည်းနိုင်တဲ့ အသင်းအဖွဲ့မှတ်ပုံတင်ခြင်းဆိုင်ရာ ဥပဒေကို စစ်ကောင်စီက ပြဋ္ဌာန်းခဲ့ပါသေးတယ်။
သတင်း- သံလွင်တိုင်းမ်