မော်လမြိုင် ၊ ဖေဖော်ဝါရီ (၁၈)
စစ်ကောင်စီလက်အောက်ခံ ရွေးကောက်ပွဲကော်မရှင် အရာရှိ ဝန်ထမ်း ၂၄၆ ဦးကို အမည်ပျက်စာရင်းသွင်းပြီး ဝန်ထမ်းအဖြစ်မှ ထုတ်ပယ်လိုက်တယ်လို့ အမျိုးသားညီညွတ်ရေးအစိုးရ NUG ၊ ပြည်ထောင်စုဝန်ကြီးချုပ်ရုံးက ထုတ်ပြန်ကြေငြာလိုက်ပါတယ်။
ဝန်ထမ်းအဖြစ်က ထုတ်ပယ်လိုက်တဲ့ ရွေးကော် အရာရှိတွေဟာ ပြည်ထောင်စုရွေးကောက်ပွဲကော်မရှင် ဥပဒေ၊ ရွေးကောက်ပွဲ ဥပဒေတွေနဲ့ ကိုက်ညီမှုမရှိခဲ့တဲ့ စစ်ကောင်စီရဲ့ လုပ်ဆောင်ချက်တွေအပေါ် ကန့်ကွက်၊ငြင်းပယ်တာမရှိဘဲ ဆက်လက်တာဝန်ထမ်းဆောင်နေတယ်လို့ ထုတ်ပြန်ထားပါတယ်။
ဒါ့အပြင် အမျိုးသားညီညွတ်ရေးအစိုးရ NUG က နိုင်ငံ့ဝန်ထမ်းတွေအနေနဲ့ စစ်ကောင်စီလက်အောက်မှာ ဆက်လက်တာဝန်မထမ်းဆောင်ဘဲ ဓမ္မဘက်မှရပ်တည်ပြီး ပြည်သူနဲ့တစ်သားတည်းဖြစ်စေရေး အာဏာဖီဆန်ရေးလှုပ်ရှားမှု CDM မှာ ပါဝင်ကြဖို့ အကြိမ်ကြိမ် ကမ်းလှမ်းခဲ့တယ်လို့ ဆိုထားပါတယ်။
NUG အစိုးရက ဝန်ထမ်းအဖြစ်မှ ထုတ်ပယ်လိုက်တဲ့ ရွေးကော် အရာရှိ ၂၄၀ ကျော်မှာ မွန်ပြည်နယ် ရွေးကောက်ပွဲ ကော်မရှင်အဖွဲ့ခွဲက ဒုတိယညွှန်ကြားရေးမှူး၊လက်ထက်ညွှန်ကြားရေးမှူးနဲ့ ဦးစီးအရာရှိ ၉ ဦး ပါဝင်ပါတယ်။
အမျိုးသားညီညွတ်ရေးအစိုးရ NUG ပြည်ထောင်စုဝန်ကြီးချုပ်ရုံးကတော့ အောက်တိုဘာလမှစတင်ပြီး အာဏာဖီဆန်ရေးလှုပ်ရှားမှု CDM မှာ ပါဝင်ခဲ့ကြတဲ့ ဌာနအသီးသီးက နိုင်ငံ့ဝန်ထမ်းသူရဲကောင်းတွေရဲ့ လူမှုဖူလုံ့ရေး၊ လုံခြုံဘေးကင်းရေးနဲ့ ဖိအားကင်းစင်ရေးတို့အတွက် အလေးထားဆောင်ရွက်လျက်ရှိတယ်လို့ ကြေညာချက်မှာ ဖော်ပြထားပါတယ်။
သတင်း – သံလွင်တိုင်းမ်