မော်လမြိုင်၊ အောက်တိုဘာ ၁
မွန်ပြည်နယ်ရဲ့ မြို့နယ်တချို့က ဈေးတွေကို ပုံမှန်အတိုင်း ပြန်လည် ဖွင့်လှစ် ရောင်းခွင့်ပေးအပ်လိုက်ပေမယ့် မော်လမြိုင်ရဲ့ အဓိက ဈေးတွေဖြစ်တဲ့ အမှတ် ၁ ဈေးနဲ့ မြိုင်ရတနာဈေးတွေ မပါဝင်သေးဘူးလို့ သိရပါတယ်။
နေအိမ်အတွင်း နေထိုင်ဖို့ Stay at Home မသတ်မှတ်ထားတဲ့ ကျိုက်ထို၊ ပေါင်၊ ကျိုက်မရော၊ မုဒုံနဲ့ရေးမြို့နယ်တွေမှာရှိတဲ့ စည်ပင်သာယာဈေးတွေကို ပုံမှန်အတိုင်း ရောင်းချခွင့် ပေးအပ်လိုက်တာ ဖြစ်ပါတယ်။
စစ်ကောင်စီဟာ ကိုဗစ်ကပ်ရောဂါကြောင့် ဈေးတွေမှာ အခြေခံစားသောကုန်နဲ့ ဆေးဝါးတွေကိုသာ ရောင်းချဖို့နဲ့ ကျန်ကုန်ပစ္စည်းဆိုင်တွေကို ဖွင့်လှစ်ရောင်းချခွင့် ကန့်သတ်ထားတာ ဖြစ်ပါတယ်။
“မနေ့ညကမှ ဆိုင်ခန်းတွေပြန်ဖွင့်ခွင့်ရပြီးလို့ သိရတယ်။ ဒီနေ့မနက်မှာတော့ ဆိုင်သွားပြန်ဖွင့်တယ်၊ ဆိုင်တွေအတော်များများလည်း ပြန်ဖွင့်ကြပါတယ်”လို့ ကျိုက်ထိုမြို့ ပြည်သူ့ဈေးက ဆိုင်ခန်းပိုင်ရှင် တစ်ဦးက ပြောပါတယ်။
နေအိမ်အတွင်း နေထိုင်ဖို့ Stay at Home သတ်မှတ်ထားတဲ့ မော်လမြိုင်၊ သထုံ၊ ဘီးလင်း၊ သံဖြူဇရပ် နဲ့ ချောင်းဆုံမြို့နယ်က ဈေးတွေကတော့ ပုံမှန်အတိုင်း ဖွင့်လှစ်ရောင်းချခွင့်မရသေးပါဘူး။
ပုံမှန်အတိုင်း ရောင်းချခွင့်မရသေးတဲ့ ဈေးတွေကိုတော့ စစ်ကောင်စီ ကျန်းမာရေးဝန်ကြီးဌာနက Stay at Home အစီအစဉ်က ပယ်ဖျက်ပေးမယ်ဆိုရင် ပြန်လည် ဖွင့်လှစ်ခွင့်ပေးအပ်သွားမယ်လို့ မွန်ပြည်နယ်စည်ပင်သာယာရေးအဖွဲ့ တာဝန်ရှိသူ တစ်ဦးက ပြောပါတယ်။
ဈေးတွေအားလုံး ပုံမှန်အတိုင်း ဖွင့်လှစ်ရောင်းချခွင့် မရသေးတဲ့အတွက်ကြောင့် ဈေးတွေအပေါ် မှီခိုလုပ်ကိုင်စားသောက်နေရတဲ့ မိသားစု ထောင်ချီ စားဝတ်နေရေး အခက်အခဲ ရှိလာကြတာ ဖြစ်ပါတယ်။
သတင်း- သံလွင်တိုင်းမ်