ထားဝယ်၊ စက်တင်ဘာ ၂၂
တနင်္သာရီတိုင်းဒေသကြီး၊ ထားဝယ်မြို့မှာ စစ်ကောင်စီတပ်ရဲ့ ဖမ်းဆီးစစ်ဆေးမှုကို ခံနေရသည့် ထားဝယ်တက္ကသိုလ် အင်္ဂလိပ်မေဂျာကျောင်းသူဟောင်း တစ်ဦး အရက်ပြန်ကို သောက်ပြီး သေကြောင်းကြံစည်မှုဖြစ်ပွားခဲ့တယ်လို့ ထားဝယ်တက္ကသိုလ်ကျောင်းသားများ သမဂ္ဂက ဒီကနေ့ ထုတ်ပြန်ပါတယ်။
စက်တင်ဘာလ ၂၀ ရက်နေ့မှာ မစိုးမီမီကျော်၊ ကိုစိုးပြည့်အောင်နှင့်မသျှားပြည့်ခင်တို့ ၃ ဦးကို စစ်ကောင်စီ တပ်တွေက ဖမ်းဆီးခဲ့တာပါ။
စစ်အာဏာရှင်ဆန့်ကျင်ရေး လှုပ်ရှားမှုမှာ ပါဝင်သည်ဟုဆိုကာ အကြောင်းပြ ဖမ်းဆီးသွားတာ ဖြစ်ပါတယ်။
ဖမ်းဆီးခံရသူ ၃ ဦးစလုံးကို စစ်ကြောရေးသို့ပိုပြီး ကိုစိုးပြည့်အောင်နှင့်မသျှားပြည့်ခင်တို့ ၂ ဦးကို စစ်ကောင်စီတပ်ဖွဲ့ဝင်တွေက စစ်ဆေးမေးမြန်းပြီးနောက် မစိုးမီမီကျော်ကို စစ်ဆေးမေးမြန်းခဲ့တယ်လို့ သိရပါတယ်။
မစိုးမီမီကျော်ကို စာရင်းစာအုပ်တွေပြပြီး ရိုက်နှက်စစ်ဆေးခဲ့တယ်လို့ ဆိုပါတယ်။
မစိုးမီမီကျော်မှာ စစ်ဆေးမေးမြန်းခံရပြီးနောက် အိမ်သာသို့သွားကာ ၎င်းထံမှ ပါလာသော အရက်ပြန်ကို သောက်ကာ သေကြောင်းကြံစည်ခဲ့တယ်လို့ သိရပါတယ်။
မစိုးမီမီကျော် အရက်ပြန်ကို သောက်ပြီး သေကြောင်းကြံစည်မှုကို စစ်ကောင်စီတပ်ဖွဲ့ဝင်တွေက သိရှိပြီးနောက် ထားဝယ်စစ်ဆေးရုံကို တင်ပို့ကာ ဆေးကုသမှုခံယူ
စေခဲ့ပါတယ်။
မစိုးမီမီကျော်ရဲ့ လတ်တလော ကျန်းမာရေး အခြေအနေကိုတော့ အတည်မပြုနိုင်သေးပါဘူး။
မစိုးမီမီကျော်နှင့်အတူ ဖမ်းဆီးခံထားရတဲ့ ကိုစိုးပြည့်အောင်နှင့်မသျှားပြည့်ခင်တို့ ၂ ဦးကိုတော့ ထားဝယ်မြို့မရဲစခန်းတွင် ဖမ်းဆီးချုပ်နှောင်ထားတယ်လို့ သိရပါတယ်။
သတင်း – သံလွင်တိုင်းမ်
