မော်လမြိုင် ၊ အောက်တိုဘာ (၁၅)
Stay at Home သတ်မှတ်ထားတဲ့ မော်လမြိုင်မြို့မှာ USDP နှင့် NLD ပါတီဝန်းရံသူတွေက လှည့်လည် အင်အားပြခဲ့ပါတယ်။
အောက်တိုဘာလ (၁၄)ရက်နေ့မှာ NLD ပါတီဝန်းရံသူတွေဟာ ကားတွေ ၊ ဆိုင်ကယ်တွေနဲ့ မော်လမြိုင်မြို့ပေါ် ရပ်ကွက်တစ်ချို့ကို စီတန်းလှည့်လည် အင်အားပြခဲ့ပြီး အောက်တိုဘာလ (၁၅)ရက်နေ့မှာတော့ USDP ပါတီဝန်းရံသူတွေက လှည့်လည် အင်းအာပြခဲ့ကြတာပါ။
ကျန်းမာရေးနှင့်အားကစားဝန်ကြီးကတော့ Stay at home သတ်မှတ်ထားတဲ့ဒေသ နဲ့ အဆောက်အဦးတွေမှာ လည့်လှည်မဲဆွယ်စည်းရုံးတာတွေနဲ့ အိမ်တိုင်ရာရောက် မဲဆွယ်စည်းရုံးတာတွေကို လုံးဝမလုပ်ဖို့ ညွှန်ကြားချက် ထုတ်ပြန်ထားပါတယ်။
လတ်တလောမှာတော့ ဒီလိုလှည့်လည်အင်အားပြသူတွေကို အရေးယူဆောင်ရွက်ထားတာ မရှိဘဲ ပထမအကြိမ်အနေနဲ့ သတိပေးပြောဆိုသွားမယ်လို့ မွန်ပြည်နယ် ပြည်သူ့ကျန်းမာရေးဦးစီးမှူး ဒေါက်တာထွန်းအောင်ကြည်က ပြောပါတယ်။
“ အဲဒါတွေကတော့ သက်ဆိုင်ရာမြို့နယ်တွေကို အကြောင်းကြားထားတယ်၊ သက်ဆိုင်ရာ ကျန်းမာရေးဌာနမှူးတွေကို၊ ဒါတွေကတော့ ဖြစ်လာနိုင်ခြေရှိတာပေါ့၊ ဖြစ်လည်းဖြစ်နေတာပဲ၊ ဘယ်လိုလုပ်မလဲဆိုတော့ အမှန်ကအရေးယူလို့ရတယ်ပေါ့၊ ကျွန်တော်တို့ ဝန်ကြီးဌာနကတော့ ဒါဟာ ပထမအကြိမ်ဆိုရင်တော့ သတိပေးဖို့ လုပ်သွားတယ်၊ ဒုတိယအကြိမ်အရေးယူရင်တော့ အုပ်ချုပ်ရေးအဖွဲ့အစည်းကို တင်ပြပြီးတော့ အမိန့်နာခံရမှာပေါ့”လို့ ဆိုပါတယ်။
မွန်ပြည်နယ်အတွင်းမှာတော့ ကျိုက်ထို ၊ ဘီးလင်း နဲ့ မော်လမြိုင်မြိုတို့ကို stay at home နေထိုင်ဖို့ ညွှန်ကြားထားပြီး ညမထွက်ရ အမိန့်တွေကို ထုတ်ပြန်ထားတာပါ။
ပြီးခဲ့တဲ့ ရက်ပိုင်းအတွင်းမှာလည်း သောင်းနဲ့ချီတဲ့ NLD နဲ့ မွန်ပါတီဝန်းရံသူတွေဟာ သထုံ နဲ့ ချောင်းဆုံ မြို့နယ်တို့မှာ လှည့်လည်အင်အားပြခဲ့ကြပါတယ်။
သတင်း – နွန်နွန်