မော်လမြိုင်၊ ဧပြီ ၄
ရက်ပေါင်း ၂၁ ရက်အကြာ ပစ်ခတ်တိုက်ခိုက်မှု ရပ်စဲကြောင်း စစ်ကောင်စီဘက်က ကြေညာထားပေမယ့် မွန်ပြည်နယ်မှာ လေကြောင်းနဲ့ ကင်းထောက်မှုတွေ ဆက်ရှိနေတယ်လို့ တော်လှန်ရေးအင် အားစုတွေထံကနေ သိရပါတယ်။
စစ်ကောင်စီဟာ နိုင်ငံတဝန်း ငလျင်ကယ်ဆယ်ရေးနဲ့ ပြန်လည်ထူထောင်ရေး လုပ်ငန်းတွေကို အရှိန်ဟုန်မြှင့် ဆောင်ရွက်နိုင်ဖို့အတွက် ဧပြီ ၂ ရက်နေ့ကနေ ဧပြီ ၂၂ ရက်နေ့ထိ သုံးပတ်ကြာ အပစ်ရပ်မယ်လို့ ကြေညာထားပါတယ်။
အပစ်ရပ်ကြေညာထားပေမယ့် မွန်ပြည်နယ် သထုံခရိုင်ရဲ့ မြို့နယ်တွေဖြစ်တဲ့ သထုံ၊ ဘီးလင်းနဲ့ ကျိုက်ထိုမြို့နယ်တို့မှာ လေယာဉ်နဲ့ကင်းထောက်မှုတွေ နေ့စဉ်နဲ့အမျှ ဆက်ရှိနေတယ်လို့ KNU သထုံခရိုင်ပြောခွင့်ရ ပဒိုစောအေးနိုင်က သံလွင်တိုင်းမ်ကို ပြောပါတယ်။
ငလျင်ဒဏ်ကြောင့် လူသားချင်းစာနာထောက်တဲ့အနေနဲ့ ကရင်အမျိုးသားအစည်းအရုံး KNU သထုံခရိုင်မှာ ပစ်ခတ်တိုက်ခိုက်မှုတွေ ဆိုင်းငံ့ထားပေမယ့် စစ်ကောင်စီဘက်က ထိုးဆင်စစ်လာပါက ပြန်လည်ခုခံတိုက်ခိုက်သွားမယ်လို့ ဆိုပါတယ်။
အလားတူ တော်လှန်ရေးအင်အားစုတွေ လှုပ်ရှားမှု အားကောင်းတဲ့ မွန်ပြည်နယ်ရဲ့ ရေး၊ ကျိုက်မရော၊ သံဖြူဇရပ်မြို့နယ်တို့မှာလည်း စစ်ကောင်စီဘက်က လေကြောင်းကနေ ကင်းထောက်မှုတွေ ဆက်လက်လုပ်ဆောင်နေတယ်လို့ ဒေသအခြေစိုက် တော်လှန်ရေးတပ်ဖွဲ့တွေရဲ့ ပြောပြချက်အရ သိရပါတယ်။
ယာယီပစ်ခတ်တိုက်ခိုက်မှု ရပ်စဲရေးကာလအဖြစ် ကြေညာခဲ့ပေမယ့် ချွင်းချက်အနေနဲ့ လက်မခံတဲ့ လုပ်ရပ်တွေကို လုပ်ဆောင်ပါက အရေးယူတုံ့ပြန်မှုတွေ ဆောင်ရွက်သွားမယ်လို့ စစ်ကောင်စီရဲ့ ထုတ်ပြန်ချက်မှာ ဖော်ပြထားပါတယ်။
ငလျင်ကယ်ဆယ်ရေးလုပ်ငန်းတွေ အမြန်ဆုံးထိရောက်စွာ ဆောင်ရွက်နိုင်ဖို့ ထိုးစစ်တွေကို ပြုလုပ်မှာမဟုတ်ဘဲ ဧပြီတစ်လတာ တစ်ဖက်သတ် အပစ်ရပ်ကြောင်း MNDAA ၊ TNLA နဲ့ AA ညီနောင်မဟာမိတ် ၃ ဖွဲ့က ဧပြီ ၁ရက်နေ့မှာ ထုတ်ပြန်ကြေညာထားပါတယ်။
အမျိုးသားညီညွတ်ရေးအစိုးရ NUG ကလည်း ငလျင်ဖြစ်ပွားရာဒေသတွေမှာ ထိုးစစ်နှစ်ပတ်ရပ်နားမယ်လို့ ကြေညာထားတာပါ။
လွတ်လပ်တဲ့ သုတေသနအဖွဲ့အစည်းဖြစ်တဲ့ ဉာဏ်လင်းသစ်သုတေသနအဖွဲ့ရဲ့ အချက်အလက်တွေအရ အင်အားပြင်း ငလျင်လှုပ်ခတ်ပြီးနောက် မတ် ၂၈ ရက်နေ့ကနေ ၃၁ ရက်နေ့အထိ စစ်ကောက်စီတပ်ရဲ့ လက်နက်ကြီးအပါအဝင် လေကြောင်းတိုက်ခိုက်မှုတွေကြောင့် အရပ်သားလေးဦး သေဆုံးပြီး ၁၂ ဦး ထိခိုက်ဒဏ်ရာရရှိခဲ့ပါတယ်။
သတင်း – သံလွင်တိုင်းမ်
ဓာတ်ပုံ-AFP