ပေါက်၊ ဧပြီ ၃

မကွေးတိုင်းမှာ သုံးလအတွင်း စစ်ကောင်စီတပ်ကြောင့် အပြစ်မဲ့အရပ်သားပြည်သူ စုစုပေါင်း ၉၅ ဦး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ဧပြီ ၃ ရက်နေ့မှာ ထုတ်ပြန်ထားပါတယ်။

ဇန်နဝါရီလ ၁ ရက်နေ့မှ မတ်လ ၃၁ ရက်နေ့အထိ မကွေးတိုင်းမှာ စစ်ကောင်စီလက်ချက်ကြောင့် အမျိုးသမီး ၂၉ ဦးနဲ့ အမျိုးသား ၆၆ ဦး သေဆုံးခဲ့တာကို အမည်နဲ့တကွ အတည်ပြုနိုင်ခဲ့တယ်လို့ ဆိုပါတယ်။

အဲဒီထဲမှာ အသက် ၁၈ နှစ်အောက် ကလေးငယ် ၁၂ ဦး ပါဝင်ပြီး သေဆုံးသူတွေထဲမှ ၅၃ ဦးဟာ စစ်ကောင်စီရဲ့ လေကြောင်းတိုက်ခိုက်မှုကြောင့် အများဆုံးသေဆုံးခဲ့ပြီး လက်နက်ကြီး ပစ်ခတ်မှုကြောင့် ၁၀ ဦး သေဆုံးခဲ့တယ်လို့ ဖော်ပြထားပါတယ်။

ပြီးခဲ့တဲ့ မတ်လ ၃၁ ရက်နေ့ နေ့လယ် ၂ နာရီခွဲအချိန်ခန့်မှာ မကွေးတိုင်း ပေါက်မြို့နယ် ပလောင်းကျေးရွာကို ပေါက်မြို့နယ် အခြေစိုက် အမှတ် ၂၄ ကာကွယ်ရေးပစ္စည်းစက်ရုံမှ စစ်ကောင်စီက လက်နက်ကြီးဖြင့် ပစ်ခတ်ခဲ့တာကြောင့် မဧကရီဟာ ဝမ်းဗိုက်ထိမှန်ပြီး သေဆုံးခဲ့တယ်လို့ ဆိုပါတယ်

မြန်မာနိုင်ငံမှာ အာဏာသိမ်းထားတဲ့ ၂၀၂၁ ခုနှစ် ဖေ‌ဖော်ဝါရီလ ၁ ရက်နေ့မှ ၂၀၂၅ ခုနှစ် ဧပြီလ ၂ ရက်နေ့အထိ AAPP ရဲ့ စာရင်းတွေအရ နိုင်ငံတဝန်းမှာ စစ်ကောင်စီတပ်ကြောင့် အပြစ်မဲ့အရပ် သား ပြည်သူစုစုပေါင်း ၆၄၈၀ ဦး သေဆုံးခဲ့တယ်လို့ သိရပါတယ်။

သတင်း – သံလွင်တိုင်းမ်

ဓာတ်ပုံ – Social Media

Leave a Reply

This site uses Akismet to reduce spam. Learn how your comment data is processed.