မော်လမြိုင် ၊ ဧပြီ ၂
စစ်အာဏာရှင်စနစ်ကို တော်လှန်နေကြတဲ့ မွန်အဖွဲ့အစည်းတွေ မပါဝင်ဘဲ စစ်ကောင်စီ အပြည့်အဝထိန်းချုပ်ထားတဲ့ မော်လမြိုင်မြို့ပေါ်မှာ ကျင်းပမယ့် မွန်အမျိုးသားညီလာခံကို ကန့်ကွက်တယ်လို့ မွန်တော်လှန်ရေးအဖွဲ့တွေက သဘောထားထုတ်ပြန်ပါတယ်။
အမျိုးသားရေးဆိုင်ရာ မူဝါဒတွေကို အတည်ပြုသုံးသပ်ဖို့ ရည်ရွယ်ချက်တွေနဲ့ ၂၀၂၅ မွန်အမျိုးသားညီလာခံကို မွန်ပြည်သစ်ပါတီ ဗဟိုကနေ ဦးဆောင်ပြီး ဧပြီ ၂ ရက်နေ့ကနေ ၅ ရက်နေ့အထိ မော်လမြိုင်မြို့ပေါ်မှာ ကျင်းပဖို့ ရှိနေတာပါ။
စစ်ကောင်စီနဲ့ ဆွေးနွေးမှုရှိနေတဲ့ မွန်ပြည်သစ်ပါတီ ဗဟိုက ဦးဆောင်တာဖြစ်လို့ ပြည်တွင်းရှိ မွန်နိုင်ငံရေးအင်အားစုတွေ မွန်နိုင်ငံရေးပါတီတွေ မွန်အရပ်ဘက်အဖွဲ့အစည်းတွေ မွန်သံဃာတော်တွေနဲ့ ဖိတ်ကြားသင့်တဲ့အဖွဲ့အစည်း လူပုဂ္ဂိုလ်တွေ တက်ရောက်ကြမှာ ဖြစ်ပါတယ်။
ရာမညဖက်ဒရယ်အင်အားစုသစ် NRFF တာဝန်ခံ မင်းသံလွင်က စစ်တပ်ဟာ မွန်နိုင်ငံရေးအင်အား စုတွေ တစ်စုတစ်စည်းတည်းမဖြစ်အောင် လုပ်ဆောင်နေတဲ့အချက်ကို ဒီညီလာခံက စစ်ကောင်စီလုပ်ရမယ့် အလုပ်ကို လုပ်ပေးလိုက်တာလို့ သံလွင်တိုင်းမ်ကို ပါတယ်။
“မွန်အမျိုးသားညီလာခံဆိုတာ နိုင်ငံရေးကိုယ်စားပြုမှု စုံလင်စွာပါရှိရမယ်၊ လွတ်လပ်ရမယ်၊ ပြည်သူကို မျက်နှာမူဖို့ လိုအပ်တယ်။ ဒါပေမယ့် အခုညီလာခံက နိုင်ငံရေးကိုယ်စားပြုမှု မစုံလင်နေတဲ့အပြင် စစ်ကောင်စီ အပြည့်အဝ ထိန်းချုပ်ထားတဲ့ မြို့ ပေါ်မှာ ကျင်းပမှာဖြစ်တာကြောင့် မွန်ပြည်သူကို မျက်နှာမမူတဲ့အပြင် မွန်နိုင်ငံရေးကို ဂုဏ်သိက္ခာကျဆင်းအောင် လုပ်ဖို့နဲ့ မွန်နိုင်ငံရေးကို ပိုမိုရှုပ် ထွေးစေမယ့် ညီလာခံလို့ပဲ ကျွန်တော့်အနေနဲ့ သုံးသပ်ချင်ပါတယ်” လို့ ဆိုပါတယ်။
မွန်ပြည်သစ်ပါတီ စစ်အာဏာရှင်တိုက်ဖျက်ရေး NMSP AD ကလည်း မော်လမြိုင်မြို့ပေါ်မှာ မွန်အ မျိုးသားညီလာခံကျင်းပတာဟာ နယ်ပယ်အစုံက ကိုယ်စားလှယ်တွေ တက်ရောက်နိုင်မှာ မဟုတ်တာကြောင့် မွန်တမျိုးသားလုံးရဲ့အသံကို ကိုယ်စားပြုနိုင်မှာ မဟုတ်ဘူးလို့ ပြောပါတယ်။
လက်ရှိအခြေအနေဟာ မွန်အမျိုးသားတွေရဲ့ ကိုယ့်ကြမ္မာကိုယ်ဖန်တီးပိုင်ခွင့်ရရှိဖို့ ရုန်းကန်တိုက်ပွဲဝင်နေချိန်ဖြစ်ပြီး နိုင်ငံရေးအမြင်တွေလည်း ကွဲပြားနေတဲ့အတွက် အမျိုးသားရေးလုပ်ငန်းစဉ်တွေကို တစ်ဘက်တည်းအမြင်နဲ့ ဆုံးဖြတ်နေတာက အမျိုးသားညီညွတ်ရေးကို ပိုမို ပျက်ပြားစေနိုင်တယ်လို့ ဆိုပါတယ်။
အဲဒီညီလာခံမှာ အမျိုးသားစည်းလုံးညီညွတ်ရေးကို တည်ဆောက်ဖို့နဲ့ ဖက်ဒရယ်ပြည်ထောင်စု အ ခြေခံမူအပါအဝင် ဖက်ဒရယ်ပြည်ထောင်စုနဲ့ ကိုက်ညီတဲ့ ရာမညမွန်ပြည်ဖွဲ့စည်းပုံအခြေခံဥပဒေကို သုံးသပ်ဆွေးနွေးဖို့ ရည်ရွယ်ထားတာပါ။
ဒီအခြေခံမူတွေ ဥပဒေတွေကို ညီလာခံမှာ တင်ပြဖို့ နယ်ပယ်အစုံကိုယ်စားမပြုနိုင်သေးတဲ့အတွက် ပြန်လည်သုံးသပ်ဆွေးနွေးဖို့ မသင့်သလို မွန်အမျိုးသားရေးဆိုင်ရာ မူဝါဒတွေကိုလည်း အတည်ပြုဖို့ မသင့်ဘူးလို့ မွန်ပြည်သစ်ပါတီ AD က ထောက်ပြပါတယ်။
ဒါ့အပြင် မိမိတို့ ပြည်တွင်းရေးအခြေအနေကို အခြေခံပြီး မွန်အမျိုးသားညီလာခံကနေတဆင့် ချ မှတ်မယ့် ဆုံးဖြတ်ချက်တွေဟာ စစ်ကောင်စီအတွက် အသက်ရှူပေါက်ဖြစ်သွားနိုင်တယ်ဆိုတာ အလွန်စိုးရိမ်မိတယ်လို့ ဆိုပါတယ်။
မွန်အမျိုးသားညီလာခံဟာ အခြေအနေပေးရင် ဒါမှမဟုတ် ကဏ္ဍနယ်ပယ်အစုံက ကိုယ်စားလှယ်တွေ တက်ရောက်နိုင်ဖို့ အချိန်အခါဖန်တီးပေးနိုင်မှသာ ကျင်းပသင့်တယ်လို့ သဘောထားထုတ်ပြန်ချက်မှာ ဖော်ပြပါတယ်။
ဒါကြောင့် မွန်အမျိုးသားညီလာခံဟာ မွန်တမျိုးသားလုံးဆိုင်ရာ ကိစ္စရပ်တွေနဲ့ အနာဂတ်လိုလား ချက်တွေကို နယ်ပယ်အစုံက မွန်အမျိုးသားကိုယ်စားလှယ်တွေ စုစည်းတက်ရောက်ပြီး သုံးသပ်ဆွေးနွေးဆုံးဖြတ်ဖို့ အရေးကြီးတယ်လို့ ထောက်ပြထားတာပါ။
မွန်အမျိုးသားလွတ်မြောက်ရေးတပ်တော် MLA ကတော့ စစ်ကောင်စီသက်ဆိုးရှည်အောင် မွန်အမျိုးသားညီလာခံဖြစ်မြောက်ရေး ဦးစီးဦးဆောင်ကော်မတီကနေ ကျင်းပတဲ့ မွန်အမျိုးသားညီ လာခံကို ရှုတ်ချကန့်ကွက်တယ်လို့ အသိပေးကြေညာထားပါတယ်။
သတင်း – သံလွင်တိုင်းမ်
ဓာတ်ပုံ-NMSP