ဘားအံ၊ ဧပြီ ၂
နိုင်ငံတဝန်းက ဒေသခြောက်ခုမှာ ငလျင်ဒဏ်အပြင်းအထန်ကြုံနေရချိန် ကရင်ပြည်နယ် ဘားအံမြို့မှာ ပြည်နယ်စစ်ကောင်စီအဖွဲ့က သင်္ကြန်ပွဲတော်ကျင်းပပြုလုပ်ဖို့အတွက် သဲသောင်ပြင်သင်္ကြန်အ ပါအဝင် ကမ်းနားလမ်းမှာ သင်္ကြန်မဏ္ဍပ်တည်ဆောက်တာတွေကို ဆက်လက်လုပ်ဆောင်နေတယ်လို့ ဒေသခံတွေဆီကနေ သိရပါတယ်။
ဘားအံမြို့မှာ လာမယ့်မဟာသင်္ကြန်ပွဲတော်အတွက် ကရင်ပြည်နယ်စစ်ကောင်စီအဖွဲ့က ကမ်းနားလမ်းညဈေးတန်းအနီး သဲသောင်ပြင်မှာ သင်္ကြန်ကို တစ်လကြာ ကျင်းပပြုလုပ်မှာဖြစ်သလို လမ်း လျှောက်သင်္ကြန်အပါအဝင် ကမ်းနားလမ်းမှာ ရေကစားမဏ္ဍပ်တွေနဲ့ စတုဒီသာကျွေးမွေးတာကို စည်ကားစွာ ထည့်သွင်းကျင်းပပြုလုပ်သွားမှာဖြစ်တယ်လို့ ဆိုထားပါတယ်။
ပြည်နယ်စစ်ကောင်စီအဖွဲ့က သဲသောင်ပြင်သင်္ကြန်အတွက် ပြီးခဲ့တဲ့ မတ်လပိုင်းကစလို့ သဲသောင်ပြင်ပေါ်မှာ စက်ယန္တရားတွေနဲ့ ညှိယူရှင်းလင်းတာတွေ လုပ်ဆောင်နေပြီး အဲဒီသောင်ပြင်ပေါ်မှာ အ နားယူအပန်းဖြေတဲတွေ၊ ရေကစားဘောကွင်းတွေ၊ ဆိုင်ခန်းစတာတွေကို ထည့်သွင်းဆောက်လုပ်ထားပါတယ်။
ဒါ့အပြင် ကမ်းနားလမ်းမှာ ဗဟိုမဏ္ဍပ်အပါအဝင် ဌာနဆိုင်ရာမဏ္ဍပ်အချို့ကို စတင်ပြုလုပ်နေတာတွေကိုလည်း တွေ့နေရပြီး သင်္ကြန်ပွဲတော်အတွက် ရပ်ကွက်အုပ်ချုပ်ရေးအဖွဲ့က ရပ်ကွက်ထဲမှာ အိမ်တစ်အိမ်ကို ငွေကျပ် ၅၀၀၀ ကောက်ခံတာတွေ လုပ်ဆောင်နေပြီးဖြစ်တယ်လို့ ဘားအံဒေသခံတစ်ဦးက ဆိုပါတယ်။
မြန်မာပြည်အထက်ပိုင်း နေပြည်တော် မန္တလေး စစ်ကိုင်း စတဲ့နေရာတွေမှာ သဘာဝဘေးအန္တရာယ်ကို ဆိုးဆိုးဝါးဝါး ကြုံတွေ့ရင်ဆိုင်နေရပြီး လူပေါင်းထောင်ချီ သေဆုံးနေရတဲ့အချိန် ကရင်ပြည်နယ်စစ်ကောင်စီအဖွဲ့က သင်္ကြန်ပွဲတော်ကို စည်စည်ကားကား ဆက်လက်ကျင်းပပြုလုပ်သွားမယ်ဆိုတဲ့အပေါ် ဝေဖန်မှုတွေလည်း ရှိနေခဲ့ပါတယ်။
အခုလို မြေငလျင်ဘေးဒဏ်ကို ကြုံတွေ့နေရတဲ့အချိန်မှာ သင်္ကြန်ပွဲတော်ကို မကျင်းပတော့ဘဲ င လျင်ဒဏ်သင့်ခံ ပြည်သူတွေအတွက် အခုချိန်ကာလမှာ ငလျင်ကယ်ဆယ်ရေးသာ လုပ်ဆောင်သင့်တော့ကြောင်း ဒေသခံတွေက ဆိုကြပါတယ်။
ဒါ့အပြင် ဘားအံသင်္ကြန်ပွဲတော်ကာလအတွင်း သွားရောက်လည်ပတ်ကြမယ့် လူငယ်တွေအတွက် စစ်ကောင်စီအဖွဲ့က စစ်မှုထမ်းဖမ်းဆီးခေါ်ဆောင်မှာကိုလည်း စိုးရိမ်နေကြတာရှိသလို တချို့က တော့ သင်္ကြန်ပွဲတော်မှာ သွားရောက်လည်ပတ်ကြမှာဖြစ်တယ်လို့ ပြောဆိုမှုတွေလည်း ရှိနေခဲ့တာဖြစ်ပါတယ်။
မနှစ်က ကျင်းပပြုလုပ်ခဲ့တဲ့ ဘားအံသင်္ကြန်ပွဲတော်မှာတော့ ကမ်းနားလမ်းတလျှောက်မှာ ဌာနဆိုင် ရာမဏ္ဍပ်တွေသာ တည်ရှိတာဖြစ်ပြီး လမ်းလျှောက်သင်္ကြန်နဲ့ စတုဒီသာမဏ္ဍပ်တွေ ရှိနေသလို အရင်သင်္ကြန်ပွဲတော်ကာလလို့ စည်ကားမှုသိပ်မရှိတော့ဘဲ လာရောက်ရေကစားလည်ပတ်သူ အထိုက် အလျောက်သာ ရှိနေတော့တာဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ