ကမမောင်း၊ ဖေဖော်ဝါရီ ၂၂
ကရင်ပြည်နယ် ကမမောင်းမြို့ကို တော်လှန်ရေးတပ်ဖွဲ့တွေ ဝင်ရောက်တိုက်ခိုက်မယ်ဆိုတဲ့ သတင်းတွေကြောင့် စစ်ကောင်စီတပ်ဟာ မြို့မကျရေးအတွက် ခံစစ်ပြင်ဆင်မှု အရှိန်မြှင့်လုပ်ဆောင်နေတယ်လို့ KNU တပ်မဟာ ၅ ပြောခွင့်ရ ဗိုလ်မှူးကြီးစောကလယ်ဒိုက သံလွင်တိုင်းမ်ကို ပြောပါတယ် ။
စစ်ဗျူဟာစခန်းတစ်ခုရှိတဲ့ ကမမောင်းမြို့ကို ကရင်အမျိုးသားလွတ်မြောက်ရေးတပ်မတော် KNLA ဦးဆောင်တဲ့ တော်လှန်ရေးတပ်ဖွဲ့တွေ ဝင်ရောက်တိုက်ခိုက်မယ်လို့ သတင်းတွေထွက်ပေါ်နေတာကြောင့် စစ်ကောင်စီတပ်ဟာ ကမမောင်းမြို့ တိုက်ခိုက်သိမ်းပိုက်မခံရဖို့အတွက် ဖေဖော်ဝါရီ ၁၇ ရက်နေ့ကစလို့ ကမမောင်းကို တပ်အင်အားဖြည့်ဆည်းလာပြီး ခံစစ်ပြင်ဆင်မှုတွေ ပြုလုပ်နေတာပါ။
လက်ရှိမှာလည်း မြိုင်ကြီးငူ-မယ်သဝေါ လမ်းပိုင်းမှာရှိတဲ့ စစ်ကောင်စီတပ်အင်အား ၇၀ ဝန်းကျင်ဟာ မြိုင်ကြီးငူကနေတစ်ဆင့် သံလွင်မြစ်ကို ကူးဖြတ်လာပြီး ကမမောင်းမြို့ကို တပ်အင်အားဖြည့် ဆည်းလာတာဖြစ်တယ်လို့ KNU ဖာပွန်ခရိုင် တပ်မဟာ ၅ ပြောခွင့်ရ ဗိုလ်မှူးကြီးစောကလယ်ဒိုက ဆိုပါတယ်။
ကမမောင်းမြို့မှာ နှစ်ဖက်ထိတွေ့တိုက်ပွဲတွေ စဖြစ်တာမရှိသေးပေမယ့် ကမမောင်းမြို့နဲ့ အနီးပတ် ဝန်းကျင်ကျေးရွာတွေမှာ နေထိုင်ကြတဲ့ ဒေသခံပြည်သူတွေဟာ တိုက်ပွဲဖြစ်ပွားလာမှာကို စိုးရိမ်တာနဲ့ စစ်ကောင်စီတပ်ရဲ့ လက်နက်ကြီးနဲ့ လေကြောင်းတိုက်ခိုက်မှုတွေကြောင့် မြိုင်ကြီးငူဘက်ကို အလုံးအရင်းနဲ့ ထွက်ပြေးလာနေကြတာပါ။
ကမမောင်းမြို့ဟာ KNU ဖာပွန်ခရိုင်ရဲ့ တောင်ဘက်ခြမ်းအဆုံးမှာရှိပြီး ကမမောင်း-ဖာပွန်ကားလမ်း မကြီးပေါ်မှာ စစ်ကောင်စီတပ်ရဲ့ ကမမောင်းစစ်ဗျူဟာနဲ့ ကတိုင်တိဒေသက ကရင်နယ်ခြားစောင့်တပ် BGF ရဲ့ ၁၀၁၃ တပ်ရင်းဌာနချုပ်ထဲ ခုခံတိုက်ခိုက်နေတဲ့ စစ်ကောင်စီတပ်တို့အပြင် ဖာပွန်စစ်ဗျူဟာကိုလည်း တပ်မဟာ ၅ က ဆက်လက်သိမ်းပိုက်ဖို့ ကျန်ရှိနေသေးတာ ဖြစ်ပါတယ်။
ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ ဦးဆောင်တဲ့ မဟာမိတ်တော် လှန်ရေးပူးပေါင်းအဖွဲ့တို့ဟာ ဖာပွန်ခရိုင်ထဲမှာရှိတဲ့ စစ်ကောင်စီတပ်စခန်းတွေကို ပြီးခဲ့တဲ့ ၂၀၂၄ ခုနှစ်ကုန်ပိုင်းကစပြီး စခန်းတစ်ခုပြီးတစ်ခု ဆက်တိုက်သိမ်းပိုက်ရရှိခဲ့ရာ တပ်မဟာ ၁ နယ်မြေ ဘီးလင်းမြို့နယ်၊ နတ်ကြီးကျေးရွာအနီးအပြင် တပ်မဟာ ၁ နဲ့ တပ်မဟာ ၇ ထိစပ်နယ်မြေဖြစ်တဲ့ ကမမောင်းမြို့အထိပါ ရောက်ရှိလာနေတာဖြစ်ပါတယ်။
ကမမောင်းမြို့အရှေ့ဘက် မြိုင်ကြီးငူဒေသဟာ KNU ဖားအံခရိုင် တပ်မဟာ ၇ နယ်မြေဖြစ်ပြီး မြို့အနောက်ဘက်နဲ့ တောင်ဘက်ခြမ်းဟာ သထုံခရိုင် တပ်မဟာ ၁ နယ်မြေ ၊ မြို့ပေါ်နဲ့ မြို့မြောက်ဘက်ခြမ်းဟာ တပ်မဟာ ၅ နယ်မြေထဲမှာပါရှိတာဖြစ်ပြီး ကမမောင်းမြို့ဟာ ကရင်ပြည်နယ်မြို့ တော် ဘားအံမြို့နဲ့ မိုင် ၅၀ နီးပါး အကွာအဝေးရှိတာဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-Social Media