မနီလာ၊ ဖေဖော်ဝါရီ ၂၁
မနီလာမြို့ရှိ တရုတ်နိုင်ငံသားတွေ ဖွင့်ထားတဲ့ ပြည်ပဂိမ်းလုပ်ငန်းလို့ နာမည်တပ်ထားတဲ့ဂိုဏ်းကို ရဲတပ်ဖွဲ့ ဝင်ရောက် စီးနင်းပြီး လူ ၄၅၀ ကျော်ကို ဖမ်းဆီးခဲ့တယ်လို့ ဖိလစ်ပိုင် ရာဇဝတ်ဂိုဏ်း တိုက်ဖျက်ရေး ကော်မရှင်က ပြောကြားလိုက်ပါတယ်။
အားကစားဆိုင်ရာ လောင်းကစား လုပ်ငန်း၊ ရင်းနှီးမြှုပ်နှံရေး အစီအစဉ်တွေနဲ့အတူ တရုတ်နဲ့ အိန္ဒိယနိုင်ငံသားတွေကို ပစ်မှတ်ထားနေတဲ့ ငွေလိမ်ဂိုဏ်းကို ဆင်ခြေဖုံးဒေသမှာ ဖွင့်လှစ်ထားတယ်လို့ ကနဦး စုံစမ်း စစ်ဆေးမှုအရ သိရကြောင်း ဖေဖော်ဝါရီ ၂၀ ရက်မှာ စီးနင်းမှုအပြီး ကော်မရှင်က ပြောဆိုထားတာပါ။
ဖိလစ်ပိုင် ရဲတပ်ဖွဲ့က ဖမ်းဆီးခဲ့တဲ့ လူ ၄၅၀ ကျော်ထဲမှာ တရုတ် နိုင်ငံသား ၁၃၇ ဦး ပါဝင်နေပါတယ်။
တရုတ်သူဌေး ၅ ဦးကို မိမိတို့ ဖမ်းဆီးထားပြီး သူတို့ကို လူကုန်ကူးမှုနဲ့ စွဲချက်တင်နိုင်တယ်လို့ ကော်မရှင် အကြီးအကဲ ဂီလ်ဘာတိုက ပြောဆိုပါတယ်။
ပြီးခဲ့တဲ့နှစ်က သမ္မတ ဖာဒီနန် မားကို့စ် ဂျူနီယာက တားမြစ်ခဲ့ပြီးနောက် ရာဇဝတ်ဂိုဏ်းတွေက ဖိလစ်ပိုင် အွန်လိုင်း ဂိမ်းလုပ်ငန်းတွေ အဖြစ် ဟန်ဆောင်ပြီး လူကုန်ကူးမှု၊ ငွေကြေးခဝါချမှု၊ အွန်လိုင်း လိမ်လည်မှု၊ ပြန်ပေးဆွဲမှုနဲ့ လူသတ်မှုတို့ ကျူးလွန်နေတယ်လို့ သိရပါတယ်။
တရားဝင် တားမြစ်ထားပြီးဖြစ်ပေမယ့် အဲဒီ အွန်လိုင်း ဂိမ်းလုပ်ငန်း အလုပ်သမားတွေ ဆက်လက် လုပ်ကိုင်နေဆဲ ဖြစ်ကြောင်း စစ်ဆေးတွေ့ရှိခဲ့တယ်လို့ ကော်မရှင် အကြီးအကဲက ပြောပါတယ်။
အွန်လိုင်း ဂိမ်းလုပ်ငန်းတွေကို တားမြစ်လိုက်ပြီးနောက်ပိုင်း ဖိလစ်ပိုင်မှာ အသေးစား ကျားဖြန့်လုပ်ငန်းတွေ လုပ်ကိုင်နေတဲ့ တရုတ် နိုင်ငံသား ၂၁၀၀၀ လောက်ရှိတယ်လို့ သူက အရင်က ပြောခဲ့ဖူးပါတယ်။
အခြား အာရှနိုင်ငံတွေမှာလည်း လူကုန်ကူးခံရသူတွေကို အသုံးချ စေခိုင်းပြီး ဖွင့်လှစ်ထားတဲ့ ကျားဖြန့်လုပ်ငန်းတွေအကြောင်း ထွက်ပေါ်လာပြီးနောက် နိုင်ငံတကာရဲ့ စိုးရိမ်မှုတွေ မြင့်တက်လာခဲ့ပါတယ်။
ဖိလစ်ပိုင် ရဲတပ်ဖွဲ့က ဇန်နဝါရီလအတွင်း တရားမဝင် လုပ်ငန်းတွေ လုပ်ကိုင်နေတဲ့ နိုင်ငံခြားသား ၄၀၀ ကျော်ကို ဖမ်းဆီးရမိခဲ့ပြီး အဲဒီအထဲမှာလည်း တရုတ်နိုင်ငံသား အများစု ပါဝင်နေတာပါ။
ဝါရှင်တန် အခြေစိုက် တတ်သိပညာရှင်အဖွဲ့ USIP ရဲ့ ၂၀၂၄ ခုနှစ် မေလက ထုတ်ပြန်ခဲ့တဲ့ အစီရင်ခံစာမှာ ကျားဖြန့်လုပ်ငန်းတွေဟာ ကမ္ဘာတဝန်း လူသန်းပေါင်းများစွာကို ပစ်မှတ်ထား လိမ်လည်နေပြီး နှစ်စဉ် ဝင်ငွေ ကန်ဒေါ်လာ ၆၄ ဘီလီယံ အထိ ရရှိနေတယ်လို့ ဖော်ပြထားပါတယ်။
Ref:AFP