ကျိုက်မရော၊ ဖေဖော်ဝါရီ ၁၃
မွန်ပြည်နယ် ကျိူက်မရောမြို့နယ် ချောင်းနှစ်ခွကျေးရွာမှာ တပ်စွဲထားတဲ့ စစ်ကောင်စီပူးပေါင်းအဖွဲ့တွေရဲ့ ဖြုတ်ယူရောင်းစားမှုကြောင့် နေအိမ် ၂၀၀ နီးပါး အကောင်းတိုင်းမရှိတော့ဘဲ ပျက်စီးသွားပြီလို့ ဒေသခံတွေက သံလွင်တိုင်းမ်ကို ပြောပါတယ်။
ချောင်းနှစ်ခွရဲစခန်းမှာ တပ်စွဲထားတဲ့ စစ်ကောင်စီပူးပေါင်းအဖွဲ့ဟာ ပစ္စည်းအဟောင်းရောင်းဝယ်သူတွေနဲ့ပေါင်းပြီး နေအိမ်တွေက အမိုးသွပ်၊ အိမ်တံခါးမ၊ ပြတင်းပေါက်၊ အိမ်တိုင်တွေကအစ ချွတ်ယူရောင်းစားမှုတွေ ကျူးလွန်နေတာပါ။
စစ်ကောင်စီပူးပေါင်းအဖွဲ့က နေအိမ်တွေကို စိတ်ကြိုတ်ဖြုတ်ယူရောင်းစားမှုအပေါ် ကျေးရွာအုပ် ချုပ်ရေးအဖွဲ့ တွေကလည်း မပြောရဲကြသလို ရွာသားတွေကလည်း မြင်နေလျက်နဲ့မပြောရဲကြတဲ့အခြေအနေမှာ ရှိနေတယ်လို့ ဆိုကြပါတယ်။
နှစ်ဖက်တိုက်ပွဲတွေ ပြန်လည်ငြိမ်သက်သွားတဲ့ ချောင်းနှစ်ခွဒေသမှာ ပြီးခဲ့တဲ့နှစ် ဇူလိုင် ၂၁ ရက်နေ့ကစပြီး စစ်ကောင်စီဘက်က ဒေသခံပြည်သူတွေကို ပြန်လည်နေထိုင်နိုင်ပြီလို့ အသိပေးထားတာပါ။
ဒါပေမဲ့ ဒေသခံအများစုဟာ ကျေးရွာထဲက ကျန်ရစ်ခဲ့တဲ့ နေအိမ်တွေ အခြေအနေပြန်ကြည့်တာ၊ သန့်ရှင်းရေးလုပ်ဖို့အတွက်သာ ပြန်လာခဲ့ကြကာ မူလစစ်ရှောင်အရပ်တွေမှာသာ ဆက်လက်နေ ထိုင်နေကြပြီး ကျေးရွာထဲပြန်လည်နေထိုင်တဲ့ အိမ်ထောင်စု ၅၀ ကျော်သာရှိတယ်လို့ သိရပါတယ်။
လက်ရှိမှာတော့ ချောင်းနှစ်ခွရဲစခန်းနဲ့အနီးဝန်းကျင်မှာ စစ်ကောင်စီတပ်နဲ့ရဲအင်အား ၁၀၀ ကျော် တပ်စွဲထားပြီး နေ့စဉ်နဲ့အမျှ လက်နက်ကြီး ရမ်းသမ်းပစ်ခတ်မှုတွေ ရှိနေတာပါ။
ပြီးခဲ့တဲ့ ၂၀၂၃ ခုနှစ် နိုဝင်ဘာလကစပြီး အချိန် တစ်လခွဲကျော်ကြာမြင့်ခဲ့တဲ့ ချောင်းနှစ်ခွတိုက်ပွဲကြောင့် ဒေသခံ နေအိမ် ၁၀၀ ကျော် မီးလောင်ပျက်စီးခဲ့ပြီး လူဦးရေ ၃၀၀၀၀ ကျော် စစ်ရှောင်ခဲ့ရပါတယ်။
သတင်း – သံလွင်တိုင်းမ်
ဓာတ်ပုံ-CJ