ကျိုက်ထို၊ ဇွန် ၂၈
မွန်ပြည်နယ် ကျိုက်ထိုမြို့ ကော့စနိုင်ရပ်ကွက်မှာ စစ်ကောင်စီတပ် ဖမ်းဆီးသွားတဲ့ လူမှုကူညီရေးအသင်းဝင် တွေအပါအဝင် ဒေသခံရှစ်ဦးဟာ နှစ်ပတ်ကျော်ကြာတဲ့အထိ သတင်းအစအနမရဘဲ ပျောက်ဆုံးနေတယ်လို့ မိသားစုနဲ့နီးစပ်သူတွေထံက သိရပါတယ်။
စစ်ကောင်စီတပ်ဟာ ပြီးခဲ့တဲ့ ဇွန် ၁၃ ရက်နေ့နဲ့ ၁၄ ရက်နေ့တို့မှာ ကော့စနိုင်လူမှုကူညီရေးအသင်းဝင်လေးဦးနဲ့ သူတို့ရဲ့ မိတ်ဆွေအမျိုးသားလေးဦးကို ပြည်သူ့ကာကွယ်ရေးတပ်ဖွဲ့ PDF ထောက်ပို့စွပ်စွဲချက်တွေနဲ့ နေအိမ်မှာ အင်အားအလုံးအရင်းနဲ့ ဝင်ရောက်ဖမ်းဆီးသွားခဲ့တာပါ။
သူတို့တွေကို ဘယ်မှာဖမ်းဆီးထိန်းသိမ်းထားလဲဆိုတာ ကျိုက်ထိုမြို့နယ်အခြေစိုက် တပ်မ ၄၄ ဌာနချုပ်နဲ့ ကျိုက်ထိုမြို့မရဲစခန်းထံ မိသားစုဘက်က နေ့စဉ်နဲ့အမျှ သွားရောက်မေးမြန်းတာတွေ လုပ်ဆောင်ပေမယ့် စစ်ကောင်စီဘက်က ပြန်လည်ဖြေဆိုတာ မရှိပါဘူး။
ဒါ့အပြင် သူတို့အတွက် စားစရာနဲ့ အဝတ်အထည်တွေ သွားရောက်ပို့ဆောင်မှုကိုလည်း စစ်ကောင်စီဘက်က လက်မခံတာကြောင့် သူတို့ရဲ့ အသက်အန္တရာယ်အတွက် စိုးရိမ်ပူပန်မှုတွေ ရှိနေတယ်လို့ မိသားစုနဲ့နီးစပ်သူ တွေက သံလွင်တိုင်းမ်ကို ပြောပါတယ်။
ဖမ်းဆီးခံထားရတဲ့သူတွေထဲမှာ ကော့စံနိုင်လူမှုကူညီရေးအသင်းအဖွဲ့ဝင်တွေဖြစ်ကြတဲ့ ဦးမြအောင်နဲ့ မချစ်စု ရတနာတို့ သားအဖနှစ်ဦး၊ ကိုချမ်းသာအောင်၊ ဦးစိုးလှိုင်၊ သူတို့ရဲ့မိတ်ဆွေအမျိုးသားလေးဦး ပါဝင်ပါတယ်။
ပြီးခဲ့တဲ့ မေ ၂၈ ရက်နေ့ကလည်း ကျိုက်ထိုမြို့ ကောစ့နိုင်ရပ်ကွက်မှာ အရက်ထိုင်နေတဲ့သူတွေ လူငယ်တွေ ပစ်ခတ်ဖမ်းဆီးခံရတာကြောင့် တစ်ဦးသေဆုံးပြီး လေးဦးဖမ်းဆီးခံခဲ့ရပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ ဇွန် ၂၆ ရက်နေ့ထုတ် အစီရင်ခံစာရ အာဏာသိမ်းကာလအတွင်း နိုင်ငံတဝန်းမှာ လူပေါင်း ၂၆၀၀၀ ဖမ်းဆီးခံခဲ့ရပြီး အဲဒီထဲမှာ ၂၀၀၀၀ ကျော် ဆက်လက်ထိန်းသိမ်းခံထားရပါတယ်။
သတင်း – သံလွင်တိုင်းမ်
ဓာတ်ပုံ-ကော့စနိုင်လူမှုကူညီရေးအသင်း