တွက်ခြေမကိုက်လို့ မွန်ပြည်နယ်က ရော်ဘာခြံအများစု လုပ်ငန်းပိတ်သိမ်း

မော်လမြိုင် ၊ မေ ၁၀

မွန်ပြည်နယ်မှာ အပူချိန်ပြင်းထန်မှုနဲ့အတူ ရော်ဘာအထွက်နှုန်း သိသိသာသာ လျော့ကျလာတာကြောင့် ရော်ဘာခြံအများစု ရာသီမကုန်ခင်မှာပဲ ခြံပိတ်သိမ်းတာတွေ ရှိလာတယ်လို့ ရော်ဘာလုပ် ငန်းရှင်တွေက သံလွင်တိုင်းမ်ကို ပြောပါတယ်။

ပြည်နယ်အတွင်းမှာ ရော်ဘာခြံလုပ်ငန်းကို နှစ်စဉ် စက်တင်ဘာလကနေ ဇွန်လအလယ်ထိ လုပ် ကိုင်ကြပေမယ့် ဒီနှစ်မှာတော့ အထွက်နှုန်း လျော့ကျလာတဲ့အတွက် ဧပြီနောက်ဆုံးအပတ်ကစပြီး ရော်ဘာခြံတွေ ပိတ်သိမ်းတာတွေ ရှိလာတာပါ။

ရော်ဘာခြံတွေဟာ အပူချိန်ကြောင့် ရော်ဘာအထွက်နှုန်း ကျဆင်းလာတာ၊ လုပ်သားစရိတ်တွေ၊ သယ်ယူပို့ဆောင်ရေး စရိတ်တွေအပြင် အထွေထွေကုန်ကျစရိတ်ကြီးမြင့်မှုကြောင့် ဝင်ငွေနဲ့ထွက်ငွေမကိုက်လို့ ခြံပိတ်သိမ်းလာကြတာ ဖြစ်ပါတယ်။

“၃ ပုံ ပုံ ၂ ပုံ နီးပါးလောက် လျော့သွားတယ်။ ခြံရှင်တွေလည်း မကိုက်တော့ဘူးလေ။ မကိုက်တဲ့ ခြံတွေကတော့ နားလိုက်ပြီ။ ဒါပေမယ့် တချို့တွေကျတော့လည်း မကိုက်ပေမယ့်လည်း လုပ်သားကို ငဲညှာတဲ့ ခြံရှင်တွေကျန်မယ်။ နောက်ပြီးတော့ အထွက်နှုန်းကောင်းတဲ့ ခြံတွေကျန်မယ်။ အဲဒီလောက်ပဲ ကျန်တော့တယ်”လို့ ရော်ဘာလုပ်ငန်းရှင်တစ်ဦးက ပြောပါတယ်။

ရော်ဘာအထွက်နှုန်း ကျဆင်းမှုဟာ အပူချိန်ပြင်းထန်မှုနဲ့အတူ ရာသီအစကတည်းက သွင်အားစုဓာတ်မြေသြဇာဈေးနှုန်း အဆမတန် ဈေးနှုန်းကြီးမြင့်မှုကြောင့် မထည့်နိုင်တော့တဲ့ အခြေအနေနဲ့လည်း အဓိကသက်ဆိုင်နေတယ်လို့ ရော်ဘာလုပ်ငန်းရှင်တွေက ဆိုကြပါတယ်။

ရော်ဘာလုပ်ငန်းရှင် တစ်ဦးကလည်း ရော်ဘာအထွက်နှုန်း ကျဆင်းမှုဟာ စီးပွားရေး တွက်ခြေမကိုက်တဲ့အထိ လျော့ကျလာပြီး ဈေးကွက်မှာလည်း ထိုက်သင့်တဲ့ ရော်ဘာဈေး မရနေဘူးလို့ သံ လွင်တိုင်းမ်ကို ပြောပါတယ်။

“အထွက်နှုန်းက ထက်ဝက်နီးပါးလောက် ပြန်လျော့တယ်လို့ ပြောရမယ်။ တွက်ခြေမကိုက်တဲ့အခါကျတော့ အစေးလှီး လုပ်သားနဲ့ ကျွန်တော်တို့ ခြံရှင်နဲ့ ခွက်ချိန်စနစ်နဲ့ သွားတဲ့အခါကျတော့ အစေးလှီးလုပ်သားက သူ့ရဲ့ ရရှိတဲ့နှုန်းက မကိုက်တဲ့အခါကျလို့ရှိရင် သူတို့မခြစ်တော့ဘဲနဲ့ နားလိုက်ရတဲ့ ခြံတွေလည်းရှိပါတယ်။ ရော်ဘာရောင်းချမှုနှုန်းက တော်တော်လေး နည်းလာတယ်။ နည်းလာပေမယ့်လည်း ဈေးနှုန်းက ထိုက်သင့်သလောက် မတက်လာသေးဘူးပေါ့”လို့ ဆိုပါတယ်။

ရော်ဘာဈေးကွက်ထဲမှာတော့ Local 3 မှိုင်းခံပြား တစ်ပေါင်ကို ကျပ် ၁၉၀၀ ဝန်းကျင် ရရှိနေပေမယ့် အထွက်နှုန်း သိသိသာသာ ကျဆင်းလာတာကြောင့် အရင်လို လာရောက်ရောင်းချတဲ့ တောင် သူတွေ မရှိသလောက် နည်းပါးလာတယ်လို့ ရော်ဘာအဝယ်ဒိုင်တွေထံက သိရပါတယ်။

လက်ရှိမှာတော့ ရော်ဘာတွေကို စက်ရုံတွေကတဆင့် တရုတ်နိုင်ငံက အဓိကဝယ်ယူမှုတွေ များနေပေမယ့် ထိုင်းနိုင်ငံဘက်ခြမ်းကတော့ အရင်လိုဝယ်ယူမှု မရှိတော့ဘဲ အနည်းငယ်လောက်သာ ဝယ် ယူမှုရှိတယ်လို့ ဆိုပါတယ်။

ရော်ဘာစိုက်ဧက ၅ သိန်းကျော် ပိုင်ဆိုင်ထားတဲ့ မွန်ပြည်နယ်ဟာ နိုင်ငံအတိုင်းအတာအရ ရော်ဘာအများဆုံးစိုက်ပျိုးတဲ့ ပြည်နယ်တစ်ခုဖြစ်ပြီး နှစ်စဉ်ရော်ဘာတန်ချိန် တစ်သိန်းကျော် ထွက်ရှိနေတာ ဖြစ်ပါတယ်။

သတင်း – သံလွင်တိုင်းမ်

ဓာတ်ပုံ-CJ