ဘီးလင်း၊ ဇန်နဝါရီ ၁၄
မွန်ပြည်နယ် ဘီးလင်းမြို့နယ် ဝင်းတာပန်ကျေးရွာအခြေစိုက် စစ်ကောင်စီရဲ့ ဝင်းတာပန်စခန်းတိုက် ပွဲဟာ အချိန်တစ်လကြာတဲ့အထိ ဆက်လက်ဖြစ်ပွားနေပြီး နှစ်ဖက်ထိခိုက်သေဆုံးတာတွေ ရှိနေတယ်လို့ KNU သထုံခရိုင်က သိရပါတယ်။
အင်အား ၆၀ ကျော် တပ်စွဲနေထိုင်တဲ့ စစ်ကောင်စီ၊ BGF ပူးပေါင်းတပ်စခန်းဖြစ်တဲ့ ဝင်းတာပန်စခန်းကို ပြီးခဲ့တဲ့ဒီဇင်ဘာ ၁၃ ရက်နေ့ကစလို့ ကရင်အမျိုးသားကာကွယ်ရေးတပ် KNDO နဲ့ တော်လှန် ရေး အင်အားစုပူးပေါင်းအဖွဲ့တွေက ဝင်ရောက်တိုက်ခိုက်ခဲ့တာပါ။
အဲဒီတိုက်ခိုက်မှုကြောင့် နှစ်ဖက်တိုက်ပွဲတွေဟာ ဇန်နဝါရီ ၁၃ ရက်နေ့အထိ ဆက်လက်ဖြစ်ပွားနေပြီး စစ်ကောင်စီစခန်းကို ဝိုင်းဝန်ပိတ်ဆို့ပြီး ရိက္ခာဖြတ်တောက်ထားတယ်လို့ KNU သထုံခရိုင် တာ ဝန်ရှိသူတစ်ဦးက သံလွင်တိုင်းမ်ကို ပြောပါတယ်။
တိုက်ပွဲကာလအတွင်း စစ်ကောင်စီတပ်ကနေ လေကြောင်းတိုက်ခိုက်မှု သုံးကြိမ်ထက်မနည်း လာရောက်ပြုလုပ်သွားသလို ဒီဇင်ဘာနောက်ဆုံးအပတ်ကလည်း လေယာဉ်နဲ့ ရိက္ခာတွေအပြင် ခဲယမ်းတချို့ လာချသွားတဲ့အတွက် ပူးပေါင်းတပ်ဖွဲ့တွေက သိမ်းဆည်းခဲ့ပါတယ်။
အချိန်တစ်လကျော်ကြာဖြစ်ပွားနေတဲ့ နှစ်ဖက်တိုက်ပွဲအတွင်း တော်လှန်ရေးအင်အားစုပူးပေါင်းတပ်ဖွဲ့ဘက်က ၇ ဦး ထိခိုက်ဒဏ်ရာရရှိထားပြီး စစ်ကောင်စီဘက်က ထိခိုက်သေဆုံးမှု များနိုင်ပေမယ့် အရေအတွက် အတိအကျ စုံစမ်းနေဆဲ ဖြစ်တယ်လို့ ဆိုပါတယ်။
ဝင်းတာပန်စခန်းဟာ ကရင်အမျိူးသားကာကွယ်ရေးတပ် KNDO ရဲ့ ထိန်းချုပ်နယ်မြေအတွင်း တည်ရှိနေတာဖြစ်ပြီး စစ်ကောင်စီရဲ့ မဆုတ်တမ်းခံစစ် တပ်စခန်းတစ်ခုလည်း ဖြစ်ပါတယ်။
ဝင်းတာပန်စခန်းတိုက်ပွဲအတွင်း စစ်ကောင်စီတပ်ရဲ့ လက်နက်ကြီးနဲ့လေကြောင်းတိုက်ခိုက်မှုတွေကြောင့် ဒေသခံ ၂၀၀၀ နီးပါး ထွက်ပြေးတိမ်းရှောင်နေရပြီး လက်ရှိအချိန်အထိ နေရပ်မပြန်ရသေးပါဘူး။
သတင်း – သံလွင်တိုင်းမ်
ဓာတ်ပုံ-KNU