ပေကျင်း – ဧပြီ(၅)
တရုတ်နိုင်ငံက တိဗက်ရဲ့ အစိတ်အပိုင်းအဖြစ်တောင်းဆိုထားတဲ့ အငြင်းပွားဖွယ် နယ်စပ် တစ်လျှောက်မှာ အိန္ဒိယနိုင်ငံရဲ့ ဝေးလံခေါင်သီတဲ့ အာရုနာချယ် ပရာဒီ့စ် ပြည်နယ်မှာရှိတဲ့ နေရာတွေကို အမည်ပြောင်းလိုက်တာနဲ့ပတ်သက်ပြီး အိန္ဒိယနိုင်ငံက ကန့်ကွက်လိုက်ပါတယ်။
တိဗက်တောင်ပိုင်းဇန်နန်းလို့ ရည်ညွှန်းထားတဲ့ အာရုနာချယ် ပရာဒီ့စ် က နေရာ(၁၁) ခုစာရင်းကို ထုတ်ပြန်ခဲ့တယ်လို့ တရုတ်အစိုးရပိုင်သတင်းစာ ဂလိုဘယ်တိုင်းမ် သတင်းစာမှာဖော်ပြထားပါ တယ်။
နျူကလီးယားလက်နက်တွေပိုင်ဆိုင်ထားနိုင်ငံနှစ်နိုင်ငံဟာ မြောက်ဘက်ရှိ လာဒက်မှ ဆစ်ကင်မ် နဲ့ အာရုနာချယ် ပရာဒီ့စ်အရှေ့ပိုင်းအထိ ကြီးမားတဲ့ ဟိမဝန္တာတောင်တန်းတွေကို ဖြတ်ကျော်ကာ ကီလိုမီတာ (၄၀၀၀) ခန့်နယ်နိမိတ်စည်းကို ဝေမျှပိုင်ဆိုင်ထားကြတာလည်းဖြစ်ပါတယ်။
“တရုတ်ပြည်တွင်းရေးရာဝန်ကြီးဌာနသည် တရုတ်နိုင်ငံ၏ ရှီဇမ်းဒေသ၏တောင်ဘက်ပိုင်း ဇန်နန်းရှိ နေရာ ၁၁ ခု၏အမည်များကို တရုတ်စာလုံးများနှင့် တိဗက်ဘာသာဖြင့် စံနှုန်း သတ်မှတ်ထုတ်ပြန်ခဲ့ပြီး အချုပ်အခြာအာဏာနှင့် သမိုင်းကြောင်းကို အခြေခံတဲ့ လုပ်ရပ်တစ်ခုဖြစ်တယ်”လို့ ဂလိုဘယ်တိုင်းမ်သတင်းစာက ဖော်ပြထားပါတယ်။
အဲဒီနေရာတွေကို အမည်ပြောင်းရာမှာ လူနေရပ်ကွက်(၂)ခု၊တောင်ထွဋ်(၅)ခု၊မြစ်(၂)စင်းနဲ့ တခြား ဧရိယာနှစ်ခုတို့လည်း ပါဝင်ပြီး နေရာတွေရဲ့ အမည်တွေနဲ့ လက်အောက်ခံအုပ်ချုပ်ရေး ခရိုင်တွေ ကိုလည်း စာရင်းပြုစုထားတယ်လို့ သတင်းစာမှာဆိုထားပါတယ်။
တရုတ်နိုင်ငံဟာ ၂၀၁၇ ခုနှစ်ကလည်း အဲဒီနေရာ(၆)ခုကို အမည်ပြောင်းခဲ့ပြီး ၂၀၂၁ ခုနှစ်မှာ နေရာ(၁၅)ခုစာရင်းကို ထုတ်ပြန်ခဲ့ပါသေးတယ်။
ဒီလ နယူးဒေလီမှာ ကျင်းပမယ့် တရုတ်ရဲ့ အသစ်ခန့်အပ်ခံရတဲ့ ကာကွယ်ရေးဝန်ကြီး ဗိုလ်ချုပ်ကြီး လီရှန်ဖူးတက်ရောက်မယ်လို့ မျှော်လင့်ရတဲ့ SCO ကာကွယ်ရေးဝန်ကြီးများ အစည်းအဝေးမတိုင်ခင် ဒီကြေညာချက်ထွက်ပေါ်လာခဲ့တာဖြစ်ပါတယ်။
အိန္ဒိယအစိုးရဟာ တရုတ်ရဲ့ပြောဆိုချက်တွေကို ပယ်ချခဲ့ပြီး အာရုနာချယ် ပရာဒီ့စ်ဟာ အိန္ဒိယ နိုင်ငံရဲ့ မရှိမဖြစ်အစိတ်အပိုင်းဖြစ်တယ်လို့ တုန့်ပြန်ထားပါတယ်။
“ဒီလို အစီရင်ခံစာတွေကို ကျွန်တော်တို့ တွေ့ခဲ့ရပါတယ်။ ဒါဟာ တရုတ်နိုင်ငံရဲ့ ကြိုးပမ်းမှု ပထမဆုံးအကြိမ်တော့ မဟုတ်ပါဘူး။ ဒါကို ပြတ်ပြတ်သားသား ငြင်းဆိုပါတယ်။ အာရုနာချယ် ပရာဒီ့စ်ဟာ အိန္ဒိယရဲ့ မရှိမဖြစ်၊ ခွဲထုတ်လိုက်လို့မရနိုင်တဲ့ အစိတ်အပိုင်းတစ်ခုအဖြစ် အမြဲရှိနေမှာပါ။ ဖန်တီးထားတဲ့ နာမည်တွေကို သတ်မှတ်ပေးဖို့ ကြိုးပမ်းမှုတွေနဲ့ ဒီအဖြစ်မှန်က မပြောင်းလဲပါဘူး” လို့ အိန္ဒိယပြည်ပရေးရာဝန်ကြီးဌာနက ပြောထားပါတယ်။
၂၀၂၀ ခုနှစ်အတွင်း ထိန်းချုပ်မှုမျဉ်းတစ်လျှောက် ဟိမဝန္တာလာဒက်မြို့မှာ သူတို့ရဲ့တပ်တွေ တိုက်ပွဲဖြစ်ပွားခဲ့ပြီး အိန္ဒိယမှ စစ်သားအယောက်(၂၀)နဲ့ တရုတ်က (၄) ဦးသေဆုံးခဲ့တဲ့ ဖြစ်စဉ် ကြောင့် နှစ်နိုင်ငံကြား သံတမန်ဆက်ဆံရေးမှာ ရပ်တန့်နေခဲ့တာလည်း ဖြစ်ပါတယ်။
၁၉၆၂ ခုနှစ်စစ်ပွဲကို ဆင်နွှဲကတည်းက အစပျိုးခဲ့တဲ့ အချိန်ကစပြီး နှစ်ဘက်တာဝန်ရှိသူတွေဟာ ငြိမ်းချမ်းရေးနဲ့ တည်ငြိမ်ရေး ပြန်လည်ထူထောင်ရေးအတွက် အကြိမ်ကြိမ်ဆွေးနွေမှုတွေ ပြုလုပ်ခဲ့ပေမယ့် နယ်နိမိတ်နဲ့ ပတ်သက်တဲ့ အငြင်းပွားဖွယ်ရာ ပြဿနာတွေ ကျန်ရှိနေဆဲ ဖြစ်တယ်လို့သိရပါတယ်။
တရုတ်ပြည်သူ့လွတ်မြောက်ရေးတပ်မတော်က တပ်ဖွဲ့ဝင်တွေနဲ့ အိန္ဒိယစစ်သားတွေဟာ ပြီးခဲ့တဲ့ နှစ် ဒီဇင်ဘာလမှာ အာရုနာချယ် ပရာဒီ့စ်မှာရှိတဲ့ ယန်ဇီဒေသကို တရုတ်တပ်ဖွဲ့ဝင်တွေ ဝင်ရောက် လာပြီးနောက် ဝါး၊တုတ်တွေနဲ့ တိုက်ခိုက်မှုတွေ ဖြစ်ပွားခဲ့ပြီး အငြင်းပွားနေတဲ့ နယ်စပ်မှာ လက်ရှိ အနေအထားကို ပြောင်းလဲဖို့ ကြိုးပမ်းခဲ့တယ်လို့ အိန္ဒိယဘက်ကပြောထားပါတယ်။
Ref: The National News