ဘီးလင်း၊ ဇန်နဝါရီ(၂၈)
မွန်ပြည်နယ်၊ ဘီးလင်းမြို့နယ်၊ ဒေါက်ရပ်ကျေးရွာ ရန်ကုန်-မော်လမြိုင်ကားလမ်းပေါ်မှာ စစ်ကောင်စီယာဉ်တန်း မိုင်းဆွဲတိုက်ခိုက်ခံရတာကြောင့် စစ်ကောင်စီတပ်ဖွဲ့ဝင် ၃ ဦး သေဆုံးပြီး ၁ ဦး ဒဏ်ရာရရှိခဲ့တယ်လို့ ဒေသခံတွေက သံလွင်တိုင်းမ်ကို ပြောပါတယ်။
ဇန်နဝါရီ ၂၇ ရက်နေ့ မနက် ၁၀ နာရီလောက်မှာ ကျိုက်ထိုဘက်ကနေ သထုံမြို့နယ်ထဲ မောင်းဝင်လာတဲ့ ကား ၁၀ စီးပါ စစ်ကောင်စီယာဉ်တန်းကို ကရင်အမျိုးသားလွတ်မြောက်ရေးတပ်မတော် KNLA ပူးပေါင်းတပ်ဖွဲ့က မိုင်းဆွဲတိုက်ခိုက်ခဲ့တာပါ။
မိုင်းဆွဲတိုက်ခိုက်ခံရပြီးနောက် စစ်ကောင်စီတပ်နဲ့ KNLA ပူးပေါင်းတပ်တို့ကြား နှစ်ဖက်အပြန်အလှန် ပစ်ခတ်မှုဖြစ်ပွားခဲ့သလို စစ်ကောင်စီအခြေစိုက်တပ်ရင်းတွေကနေ လက်နက်ကြီးနဲ့ အဆက်မပြတ် ပစ်ခတ်ခဲ့တာပါ။
အဲဒီနောက်ပစ်ခတ်မှုပြီးနောက် စစ်ကောင်စီတပ်ဟာ ဒေါက်ရပ်ကျေးရွာအတွင်း ဝင်ရောက်လာပြီးနောက် ဒေသခံနေအိမ် ၃ လုံးကို မီးရှို့ဖျက်ဆီးခဲ့သလို နေအိမ်တစ်လုံးကိုလည်း လက်နက်ကြီးနဲ့ ပစ်ခတ်ဖျက်ဆီးသွားခဲ့တယ်လို့ ဆိုပါတယ်။
အဲဒီတိုက်ခိုက်မှုကြောင့် ရန်ကုန် – မော်လမြိုင် ကားလမ်း လမ်းပိတ်ဆို့မှုဖြစ်ပွားခဲ့ပြီး မွန်းလွဲပိုင်းလောက်မှာသာ လမ်းပြန်ပွင့်သွားခဲ့တယ်လို့ သိရပါတယ်။
ပြီးခဲ့တဲ့ ဇန်နဝါရီ ၁၀ ရက်နေ့ကလည်း ဒေါက်ရပ်ကျေးရွာ ရန်ကုန်-မော်လမြိုင်ကားလမ်းပေါ်မှာ စစ်ကောင်စီယာဉ်တန်းမိုင်းဆွဲခံရတာကြောင့် စစ်ကား ၂ စီး ပျက်စီးခဲ့သလို စစ်ကောင်စီတပ်ဖွဲ့ဝင် ၇ ဦးထက်မနည်း ထိခိုက်သေဆုံးခဲ့တာပါ။
သတင်း – သံလွင်တိုင်းမ်