ကျွန်းစု၊ နိုဝင်ဘာ ၁၅
တနင်္သာရီတိုင်း၊ ကျွန်းစုမြို့နယ်ထဲမှာ စစ်ကောင်စီတပ်နဲ့ ဒေသကာကွယ်ရေးပူးပေါင်းတပ်တို့ကြား တိုက်ပွဲဖြစ်ပွားနေတဲ့အတွက် ဒေသခံထောင်ချီ ထွက်ပြေးတိမ်းရှောင်နေရတယ်လို့ စစ်ရှောင်ဒေသခံတွေရဲ့ ပြောဆိုချက်တွေအရ သိရပါတယ်။
နိုဝင်ဘာ ၁၃ ရက်နေ့ကစပြီး တပ်အင်အား ၆၀ ကျော်ပါတဲ့ စစ်ကောင်စီ၊ပျူစောထီးပူးပေါင်းအဖွဲ့က စစ်ကြောင်းထိုးလာတာကြောင့် မင်းဂုတ်ရွာနဲ့မောင်းလှော်ကျေးရွာတွေအနီးမှာ ဒေသကာကွယ်ရေးပူးပေါင်းတပ်တို့ကြား နှစ်ဖက်တိုက်ပွဲ ဖြစ်ပွားခဲ့တာပါ။
အဲဒီတိုက်ပွဲကြောင့် မင်းဂုတ်၊ မောင်းလှော်၊ ပြင်ဝန်း၊ ဝါရစ်ကျေးရွာတွေက ဒေသခံ ၁၀၀၀ လောက်ဟာ မြိတ်နဲ့ ကျွန်းစုမြို့ပေါ်အပါအဝင် ဘေးလွတ်ရာကျေးရွာတွေကို ထွက်ပြေးတိမ်းရှောင်ခဲ့ရတာ ဖြစ်ပါတယ်။
ထွက်ပြေးတိမ်းရှောင်လာတဲ့ ဒေသခံအများစုဟာ ရေလမ်းကြောင်းကနေတဆင့် မြိတ်နဲ့ကျွန်းစုမြို့ကို ဝင်ရောက်လာကြပေမယ့် နေရာထိုင်ခင်းအပါအဝင် အခြေစားနပ်ရိက္ခာအတွက် အခက်အခဲတွေ ဖြစ်နေတယ်လို့ စစ်ရှောင်ဒေသခံတစ်ဦးက သံလွင်တိုင်းမ်ကို ပြောပါတယ်။
ကျွန်းစုတိုက်ပွဲအတွင်း စစ်ကောင်စီလက်အောက်ခံ ပျူစောထီးအဖွဲ့ဝင်တစ်ဦးသေဆုံးပြီး စစ်ကောင်စီတပ်ဖွဲ့ဝင်တွေလည်း ထိခိုက်ဒဏ်ရာရတာတွေ ရှိနေတယ်လို့ တော်လှန်ရေးအင်အားစုတွေထံက သိရပါတယ်။
ဒါပေမယ့် နိုဝင်ဘာ ၁၄ ရက်နေ့ ညနေပိုင်းထိ တိုက်ပွဲပြန်လည်ဖြစ်ပွားတာ မရှိပေမယ့် စစ်ကောင်စီစစ်ကြောင်း ကျေးရွာထဲ ဆက်လက်တပ်စွဲထားတဲ့အတွက် နှစ်ဖက်စစ်ရေးဆက်လက်တင်းမာနေတာ ဖြစ်ပါတယ်။
ပြီးခဲ့တဲ့ အောက်တိုဘာလ နောက်ဆုံးအပတ်ကလည်း ကျွန်းစုမြို့နယ်၊ မင်းဂုတ်ရွာက ပြည်သူ့စစ် ဒေသအခေါ် ပျူစောထီးစခန်း တိုက်ခိုက်ခံရတာကြောင့် စစ်ကောင်စီတပ်ဖွဲ့ဝင်တချို့ ထိခိုက်သေဆုံးတာတွေ ရှိခဲ့ပါတယ်။
တနင်္သာရီတိုင်းမှာ ပြီးခဲ့တဲ့ အောက်တိုဘာလအတွင်း နှစ်ဖက်တိုက်ပွဲပေါင်း ၃၄ ကြိမ်အထိ ဖြစ်ပွားထားပြီး တိုက်ပွဲတွေကြောင့် ဒေသခံတစ်သောင်းကျော် ထပ်မံစစ်ရှောင်နေရတယ်လို့ ဒေသတွင်း သုတေသနအဖွဲ့အစည်းတွေက ထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ-CJ