မော်လမြိုင်၊ အောက်တိုဘာ(၂၈)
မွန်ပြည်နယ်မှာ လာမယ့်ပွင့်လင်းရာသီကစပြီး ခရီးသွားဧည့်သည် ဝင်ရောက်မှုများအောင်လုပ်ဖို့နဲ့ ခရီးသွားနေရာအသစ်တွေ ဖော်ဆောင်ဖို့ စစ်ကောင်စီဘက်က ဖိအာပေးလာတယ်လို့ ဟိုတယ်နဲ့ခရီးသွားလုပ်ငန်းရှင်တွေက သံလွင်တိုင်းမ်ကို ပြောပါတယ်။
စစ်ကောင်စီခန့် မွန်ပြည်နယ်ဝန်ကြီးချုပ် ဦးအောင်ကြည်သိန်း ဦးဆောင်တဲ့ ပြည်နယ်စစ်ကောင်စီဟာ ခရီးသွားကဏ္ဍ ဖွံ့ဖြိုးရေးအတွက်ဆိုပြီး ဟိုတယ်နဲ့ခရီးသွားလုပ်ငန်းရှင်တွေကို ပြီးခဲ့တဲ့လပိုင်းတွေကစပြီး မကြာခဏခေါ်ယူဖိအားပေးတာတွေ လုပ်ဆောင်နေပါတယ်။
ဟိုတယ်နဲ့ခရီးသွားလုပ်ငန်းရှင်တွေနဲ့ တွေ့ဆုံစဉ်မှာ စစ်ကောင်စီက နယ်မြေတည်ငြိမ်အေးချမ်းပြီး စည်ကားနေကြောင်း ပုံဖော်နိုင်ဖို့နဲ့ ခရီးသွားကဏ္ဍမြှင့်တင်ဖို့ ဖိအားပေးပြောဆိုတာတွေ ရှိနေတာပါ။
ခရီးသွားဧည့်လမ်းညွန်တစ်ဦးကတော့ ခရီးသွားကဏ္ဍဖွံ့ဖြိုးအောင်လုပ်ဖို့ စစ်ကောင်စီဘက်က ဖိ အားပေးပြောဆိုနေပေမယ့် လုံခြုံရေးအပါအဝင် ညမထွက်ရအမိန့် ကန့်သတ်ချက်တွေကြောင့် ခရီးသွားကဏ္ဍ ဖွံ့ဖြိုးဖို့မရှိနိုင်ဘူးလို့ ပြောပါတယ်။
“သူတို့ကတော့ မွန်ပြည်နယ်ကို အဓိကထားပြီးတော့ ခရီးသွားကဏ္ဍဖွံ့ဖြိုးချင်တယ်။ သူတို့ခေါ်ဆွေးနွေးတဲ့အပိုင်းက နယ်စပ်ပေါက်တွေဖွင့်ရင် လုံခြုံမလားအဲဒီလိုမေးတယ်ပေါ့။ နယ်စပ်ပေါက်တွေ ဖွင့်တဲ့အခါကျရင် မြဝတီဘက်ခြမ်းက ဧည့်သည်တွေဝင်လာရင်တော့ အဆင်ပြေတယ်။ သူတို့က လုံခြုံရေးပေးလို့ ရှိရင်တော့ ကျွန်တော်တို့မှာ နည်းနည်းခက်ခဲတယ်။ ဧည့်သည်တွေဆင်းတဲ့အခါသူတို့လုံခြုံရေးကိုတွေ့ရင် နှစ်ဖက်ကတင်းမာမှုရှိတဲ့ အခါကျတော့ ကျွန်တော်တို့ သူတို့လုံခြုံရေးနဲ့ မဆင်းနိုင်ဘူး။ ကျွန်တော်တို့ လုံခြုံရေးမလိုချင်ဘူး။ လုံခြုံရေးကိုတွေ့လိုပဲ ကျွန်တော်တို့မှာ ပြဿနာတွေတက်နေတာ အများကြီး။ အခက်အခဲဆုံးက ဒီမာရှယ်လောပဲ။ အချိန်အကန့်အသတ်ရယ်၊ တံ တားတွေပိတ်တာရယ်၊ တံတားအမှီဖြတ်ရတာတို့၊ လမ်းကြောင်းမှာ အိပ်ရတာတို့က မလုံခြုံတော့ဘူး။ ဒီအခက်အခဲက တော်တော်ကြီးတယ်။ မာရှယ်လောမရုပ်မချင်းကတော့ ခရီးသွားကဏ္ဍဖွံ့ဖြိုးမှုဟာ လွတ်လွတ်လပ်လပ်သွားလို့မရဘူး”လို့ ပြောပါတယ်။
ဒါ့အပြင် ခရီးသွားလာရာမှာလည်း စစ်ကောင်စီရဲ့ တင်းကျပ်တဲ့ စစ်ဆေးမှုတွေကြောင့် လိုရာခရီးကို အချိန်မီမရောက်ဘဲ ကြန့်ကြာမှုရှိသလို စစ်ဆေးရေးဂိတ်တွေမှာ ငွေကြေးမတရားကောက်ခံမှုတွေကြောင့် ခရီးသွားကဏ္ဍဖွံ့ဖြိုးဖို့ ထင်သလောက် ဖြစ်လာမှာမဟုတ်ဘူးလို့ သူကဆက်ပြောပါတယ်။
လက်ရှိမှာတော့ စစ်ကောင်စီဟာ မွန်ပြည်နယ်ရဲ့ အထင်ကရ ကျိုက်ထီးရိုးဘုရားပွဲတော်နဲ့ ကျိုက်က္ခမီဘုရားပွဲတွေကိုလည်း စည်ကားသိုက်မြိုက်စွာကျင်းပဖို့ နည်းလမ်းမျိုးစုံသုံးပြီး ကြိုးပမ်းပြင်ဆင်တာတွေ လုပ်ဆောင်နေတာပါ။
ဟိုတယ်လုပ်ငန်းရှင်တစ်ဦးကတော့ မွန်ပြည်နယ်ရဲ့ နယ်မြေအများစုမှာ အေးချမ်းတည်ငြိမ်မှု မရှိသေးတာကြောင့် ခရီးသွားဝင်ရောက်မှု မြင့်မားအောင် လုပ်ဆောင်မယ့် စစ်ကောင်စီရဲ့ အစီအစဉ်ဟာ အောင်မြင်နိုင်မှာ မဟုတ်ဘူးလို့ ထောက်ပြပါတယ်။
“မွန်ပြည်နယ်ထဲမှာလည်း တစ်မြို့နယ်နဲ့ တစ်မြို့နယ်တော့ မတူဘူးပေါ့လေ။ မော်လမြိုင် အနေအ ထားကတော့ နည်းနည်းအေးချမ်းတယ်။ မော်လမြိုင်၊ မုဒုံလောက်ကတော့ သွားလာလှုပ်ရှားတာ အလုပ်လုပ်တာ အဆင်ပြေတာပေါ့။ ဥပမာ (၁၂)နာရီထိ သွားလာခွင့်ရှိတော့ ကောင်းတာပေါ့။ ဥပမာ-ရေးမြို့နယ်ဆိုရင် ည (၆)၊ မနက်(၆)နာရီဆိုတော့ ဘာမှလုပ်လို့ မရတာ။ ဘာလုပ်ငန်းမှလည်း အဆင်မပြေနိုင်ဘူး။ ကျိုက်မရောတို့၊ ကျိုက်ထိုတို့၊ ဘီးလင်းတို့ဆိုရင်လည်း မအေးချမ်းဘူး။ မအေးချမ်းတော့ လူတွေသွားလာလှုပ်ရှားဖို့ သိပ်မလွယ်ဘူးပေါ့။ အလုပ်လုပ်ရတာ အခက်ခဲများများတာပေါ့၊ ဘာလုပ်ငန်းပဲဖြစ်ဖြစ် ခရီးသွားလုပ်ငန်းနဲ့ ဝန်ဆောင်မှုလုပ်ငန်းတွေ အားလုံးကလည်း မကောင်းဘူးပေါ့”လို့ ပြောပါတယ်။
တဖက်မှာတော့ စစ်ကောင်စီဟာ မွန်ပြည်နယ်အတွင်း ခရီးသွားဝင်ရောက်မှု များလာစေဖို့အတွက်ဆိုပြီး ဟိုတယ်နဲ့ခရီးသွားလုပ်ငန်းတွေ ပြန်ဖွင့်ခိုင်းတာ၊ သမိုင်းဝင်စေတီ၊ အဆောက်အဦးနဲ့ ဂူတွေကို ဆွဲဆောင်မှု ရှိအောင်လုပ်ဖို့ ရပ်ကွက်ကျေးရွာတွေမှာလည်း ပျော်ပွဲရွှင်ပွဲတွေနဲ့ အလှူပွဲတွေ ပြုလုပ်ဖို့ ညွှန်ကြားထားပါတယ်။
စစ်ကောင်စီက ခရီးသွားဝင်ရောက်မှုများဖို့ စီစဉ်နေတဲ့ မွန်ပြည်နယ်ရဲ့ ကျိုက်ထို၊ သထုံ၊ ဘီးလင်း၊ပေါင်၊ ကျိုက်မရောမြို့နယ်တို့မှာ မကြာခဏပစ်ခတ်မှုတွေ ရှိနေသလို ရေးမြို့နယ်ဆိုရင် စစ်အုပ်ချုပ်အရေးအဖြစ် ကြေညာထားတာပါ။
မီးခိုးတိတ်စက်ရုံလို့ တင်စားကြတဲ့ မွန်ပြည်နယ်ရဲ့ ခရီးသွားကဏ္ဍဟာ ကိုဗစ်ကပ်ရောဂါနဲ့အတူ စစ်တပ်အာဏာသိမ်းမှုကြောင့် အကျပ်အတည်းနဲ့ ရင်ဆိုင်နေရသလို ခရီးသွားလုပ်ငန်းအများစု နာလန်ပြန်ထူဖို့ အခက်ကြုံနေရပါတယ်။
အာဏာသိမ်းကာလမတိုင်မီက နှစ်စဉ်ပြည်တွင်းပြည်ပ ခရီးသွားဧည့်သည် ၃ သန်းနီးပါး ဝင်ရောက်နေတဲ့ မွန်ပြည်နယ်ဟာ အာဏာသိမ်ကာလအတွင်းမှာ ခရီးသွားဝင်ရောက်မှု သိသိသာသာကျဆင်းမှုနဲ့ ကြုံနေရတာ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-TLT