ရန်ကုန် – မတ်(၂၀)
ဒါရိုက်တာ စတီးလ်(ဒွေးမေတ္တာ)ကို စစ်ကောင်စီတပ်ဖွဲ့ဝင်တွေက သူ့ရဲ့ အိမ်မှာ လာရောက် ဖမ်းဆီးခေါ်ဆောင်သွားတယ်လို့ မိသားစုနဲ့ နီးစပ်သူတွေက သံလွင်တိုင်းမ်ကို အတည်ပြုပါတယ်။
သူ့ကို ဒီနေ့ မတ်လ(၂၀) ရက်နေ့မှာ လာရောက်ဖမ်းဆီးသွားတာဖြစ်ပြီး ဘာအမှုနဲ့ ဖမ်းဆီးတယ် ဆိုတာကိုတော့ မသိရသေးပါဘူး။
ရန်ကုန်မြို့၊ သန်လျင်မြို့နယ်မှာ ရှိတဲ့ ဒါရိုက်တာ စတီးလ် ရဲ့ နေအိမ်ကို စစ်ကောင်စီတပ်က လာရောက်ဖမ်းဆီးချိန်မှာ သူနေအိမ်မှာမရှိတဲ့အတွက် အိမ်ကို ချိတ်ပိတ်မယ်လို့ ခြိမ်းခြောက်ပြီး မိသားစုကိုအကျပ်ကိုင်ခဲ့တာကြောင့် မိသားစုကဖုန်းဆက်ပြီး ပြန်ခေါ်ပြီးနောက် ပြန်လာချိန် မှာ ဖမ်းဆီးခံလိုက်ရတာဖြစ်တယ်လို့ နီးစပ်သူတစ်ဦးက ပြောပါတယ်။
ပြီးခဲ့တဲ့ ရက်ပိုင်းက ဒါရိုက်တာ စတီးလ်ဟာ စစ်ခေါင်းဆောင်နဲ့ ပတ်သက်တဲ့ သတင်းတွေ ကိုမျှဝေတာတွေ လုပ်ခဲ့တယ်လို့သိရပါတယ်။
ဒါ့အပြင်သူဟာ အာဏာသိမ်းစစ်တပ်လက်အောက်မှာ ရုပ်ရှင်ရိုက်မှာ မဟုတ်ဘူးလို့လည်း ပြောဆိုထားသူဖြစ်ပါတယ်။
သံလွင်တိုင်းမ် အနေနဲ့ ဒါရိုက်တာ စတီးလ် ဖမ်းဆီးခံရတာနဲ့ ပတ်သက်ပြီး သန်လျင်မြို့မရဲစခန်း ကို ဆက်သွယ်မေးမြန်းခဲ့ပေမယ့် ပြန်လည်ဖြေကြားတာတော့ မရှိခဲ့ပါဘူး။
သတင်း – သံလွင်တိုင်းမ်
ဓာတ်ပုံ – Facebook