မန္တလေး – နိုဝင်ဘာ(၁၆)
မကွေးတိုင်းနဲ့ စစ်ကိုင်းတိုင်းက ကက်သလစ်ဘာသာဝင်တွေနဲ့ ဓမ္မမိတ်ဆွေတွေကြုံတွေ့နေရတဲ့ ဆင်းရဲဒုက္ခတွေကို စာနာထောက်ထားမျှဝေခံစားတဲ့အနေနဲ့ ခရစ္စမတ် ပျော်ပွဲရွှင်ပွဲတွေ မပြုလုပ် ကြဖို့ မန္တလေး ကက်သလစ်ဂိုဏ်းချုပ်ဆရာတော်က ညွှန်ကြားလိုက်ပါတယ်။
မန္တလေးကက်သလစ်ခရစ်ယာန်ဂိုဏ်းချုပ်သာသနာအတွင်းမှာရှိတဲ့ ဘုန်းတော်ကြီးတွေ၊ သီလရှင် တွေသာသနာ့အကျိုးတော်ဆောင်တွေနဲ့ လူငယ်တွေကို ခရစ္စမတ်ပွဲတော်၊ နှစ်သစ်ကူးပွဲတွေနဲ့ ပတ်သက်ပြီး အခုလို အသိပေးလိုက်တာပါ။
ခရစ္စမတ်ကယ်ရယ်သီချင်းသီဆိုတာနဲ့ ခရစ္စမတ်ဓမ္မတေးသီးချင်းတွေကို အသံချဲ့စက်(Sound-box) တွေနဲ့ဖွင့်ပြီးပွဲခံတာ၊လူစုလူဝေးနဲ့ ပြုလုပ်တဲ့ ပျော်ပွဲရွှင်ပွဲ မိတ်ဆုံစားပွဲ ဧည့်ခံပွဲတွေ ကျင်းပတာ၊ ဘုရားရှိခိုးကျောင်းတွေခေါင်းလောင်းစင်တွေ၊ကျောင်းခန်းပရဝုဏ်တွေ၊ဘုန်းကြီးကျောင်းတွေ၊သီလရှင်ကျောင်းတွေမှာ ပုံမှန်နှစ်တွေလို မီးအလှဆင်တန်ဆာတွေနဲ့ ပြင်ဆင်တာ၊ ပွဲတော်မြတ်နဲ့ ပတ်သက် ပြီး မိမိတို့ မိသားစုရဲ့ ဘယ်လိုပုံရိပ်မျိုးကိုမဆို လူမှုကွန်ရက်စာမျက်တွေမှာ ဖော်ပြတာတွေကို မကွေးနဲ့ စစ်ကိုင်းတိုင်းအတွင်းက ကက်သလစ်ဘာသာဝင်တွေရဲ့ ဆင်းရဲဒုက္ခတွေကို စာနာထောက် ထားတဲ့အနေနဲ့ မပြုလုပ်ကြဖို့ မှာကြားလိုက်တယ်လို့ ထုတ်ပြန်ချက်မှာဖော်ပြထားပါတယ်။
ဒါပေမယ့် နိုဝင်ဘာလ(၂၇) ရက်နေ့မှာ စတင်မယ့် ခရစ်တော်ဘုရားမွေးနေ့တော်အတွက် ပြင်ဆင်ရာ အာဒ်ဝင်တူးအချိန်ကာလဖြစ်တဲ့ ပထမအာဒ်ဝင်တူး တနင်္ဂနွေနေ့ကစပြီး အာပတ်ဖြေတာ၊ မစ္ဆားနာယူ တာ၊ဘုရားဝတ်ပြုတာ၊ ဆုတောင်းတာ၊ ကျမ်းစာဖတ်တာ၊ တရားနာယူတာ၊ခရစ်ယာန်တရားထိုင်တာ၊ ပုတီးစိပ်တာ၊ဒုက္ခရောက်နေသူတွေကို ကူညီတာ လှူဒါန်းတာ နဲ့ ခရစ္စမတ်နိုဗီနာပြုလုပ်တာ စတဲ့ မြင့်မြတ်ရာတွေကို ကက်သလစ်သာသနာ့ ညွှန်ကြားချက်(2022-2023 ORDO,pg – 43-44) တွေနဲ့ အညီမပြတ်မကွက်လုပ်ဆောင်ကြဖို့ ဆရာတော်က ညွှန်ကြားထားပါတယ်။
မြန်မာနိုင်ငံကို စစ်တပ်အာဏာသိမ်းပြီးနောက်ပိုင်း ပျော်ပွဲရွှင်ပွဲတွေနဲ့ သက်ဆိုင်ရာပွဲတော်တွေကို တာဝန်ရှိသူတွေနဲ့ စစ်အာဏာရှင်တော်လှန်နေသူတွေဟာ သူတို့ရဲ့ ယုံကြည်တဲ့ အယူဝါဒတွေကို သက်ဆိုင်ရာနေရာမှာပဲ အကျဉ်းချုပ် ပြုလုပ်နေတာဖြစ်ပါတယ်။
သတင်း – သံလွင်တိုင်းမ်