ထီးလင်း – အောက်တိုဘာ(၂၇)
မကွေးတိုင်း ထီးလင်းမြို့နယ်က ထန်းပင်ကုန်းရွာကို စစ်ကောင်စီတပ်သားတွေဟာတစ်ရက် တည်း နှစ်ကြိမ်တိုင် မီးရှို့နေတယ်လို့ ဒေသခံတွေက သံလွင်တိုင်းမ် ကိုပြောပါတယ်။
ဒီနေ့ အောက်တိုဘာလ(၂၇) ရက်နေ့ မနက်(၇) နာရီခွဲလောက်ကစတင်မီးရှို့နေတဲ့အင်အား(၁၀၀) ဝန်းကျင်ပါတဲ့စစ်ကြောင်းဟာ ထန်းပင်ကုန်းရွာကို အောက်တိုဘာလ(၂၆) ရက်နေ့က ရောက်ရှိ လာတာပါ။
စစ်ကောင်စီတပ်သားတွေဟာ ကျေးရွာကို မနက်အစောပိုင်းထဲက မီးရှို့ပြီးနောက် မနက် (၈) နာရီခွဲ လောက်က ပြန်လည်ထွက်ခွာသွား ကာ နေ့လည် (၁၁) နာရီခွဲဝန်းကျင်မှာရွာကိုနောက် တစ်ကြိမ် ပြန်ဝင်လာပြီး ထပ်မံ မီးရှို့နေတာဖြစ်တယ်လို့ ဒေသခံတစ်ဦးက ပြောပါတယ်။
မနက်(၇) နာရီခွဲဝန်းကျင်က ထန်းပင်ကုန်းကျေးရွာကို မီးရှို့ခဲ့ချိန်မှာ လူနေအိမ် (၁၀) လုံးလောက် မီးလောင်ပျက်စီးခဲ့တယ်လို့ သိရပြီး နေ့လည် ပိုင်းထပ်ရှို့ချိန်ရဲ့ အပျက်အစီးကို အခုချိန်ထိမသိ ရေသေးဘူးလို့သူက ပြောပါသေးတယ်။
စစ်ကောင်စီတပ်သားတွေနဲ့ ပျူစောထီးပူးပေါင်းစစ်ကြောင်းဟာ ဂန့်ဂေါခရိုင်အတွင်းမှာ နေ့စဉ် စစ်ကြောင်းထိုးနေပြီး ဓားစာခံဖမ်းဆီးတာ၊ နေအိမ်တွေကိုမီးရှို့တာနဲ့ ဒေသခံတွေပိုင်ဆိုင်တဲ့ ပစ္စည်းတွေကို ခိုးယူဖျက်ဆီးတာတွေလုပ်ဆောင်နေတယ်လို့ သိရပါတယ်။
ဒါ့အပြင် ဓားစာခံအနေနဲ့ ဖမ်းဆီးရမိထားတဲ့ ပြည်သူတွေကိုလည်း သတ်ဖြတ်တာတွေရှိနေတဲ့ အတွက် စစ်ကြောင်းတစ်လျှောက်က ကျေးရွာတွေမှာ တိမ်းရှောင်နေရတဲ့ ပြည်သူ တစ်သောင်း ကျော်ရှိနေတယ်လို့ သိရပါတယ်။
မြန်မာနိုင်ငံမှာ စစ်တပ်အာဏာသိမ်းပြီးနောက်ပိုင်း လက်နက်ကိုင် ပဋိပက္ခဖြစ်စဉ်တွေကြောင့် ထွက်ပြေးတိမ်းရှောင်နေရတဲ့ ပြည်တွင်းစစ်ဘေးရှောင်ဒုက္ခသည် (၁.၆) သန်းကျော်ရှိလာပြီလို့ ISP- Myanmar က အောက်တိုဘာလ(၂၅) ရက်နေ့မှာ သတင်းထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ – CJ