မော်လမြိုင် ၊ ဩဂုတ် ၁၆
မွန်ပြည်နယ်မှာ ဩဂုတ်လ (၁၅)ရက်နေ့ ညပိုင်းကစပြီး မိုးအဆက်မပြတ် ရွာသွန်းနေတာကြောင့် မြို့နယ် တချို့မှာ ရေကြီးရေလျှံမှုတွေ စတင် ဖြစ်ပေါ် နေတယ်လို့ ကူညီဆောင်ရွက်ပေးနေတဲ့ ပရဟိတအဖွဲ့တွေက ပြောပါတယ်။
လက်ရှိမှာတော့ ပြည်နယ်အတွင်းက မြို့နယ်တွေ ဖြစ်တဲ့ မော်လမြိုင်၊ ပေါင်၊ ကျိုက်မရောနဲ့ မုဒုံ မြို့နယ်တွေမှာတော့ ကားလမ်းရေကျော်တာတွေ၊ ရပ်ကွက်တချို့ ရေကြီးရေလျှံမှု ဖြစ်ပေါ်တာတွေနဲ့ မြေနိမ့်ပိုင်း နေအိမ်တွေထဲ ရေဝင်ရောက်တာတွေ ဖြစ်ပေါ်နေတာပါ။
မော်လမြိုင်မြို့နယ်မှာတော့ မြေနိမ့်ပိုင်း ရပ်ကွက်တွေ ဖြစ်တဲ့ သာယာအေး၊ သီရိမြိုင်၊ ဇေယျာမြိုင်၊ ရွှေပြည်အေးနဲ့ ဇေယျာသီရိ ရပ်ကွက်တွေမှာ ရေနစ်မြုပ်နေသလို နေအိမ်တချို့လည်း ရေဝင်ရောက်လာတာကြောင့် နီးစပ်ရာကို ရွေ့ပြောင်းနေရပါတယ်။
ပေါင်မြို့နယ်ရှိ ဇင်ကျိုက်မြို့မှာလည်း ရေကြီးရေလျှံမှု ဖြစ်ပေါ်နေတာကြောင့် လမ်းမကြီးအပိုင်း တချို့ ရေနစ်မြုပ်နေပြီး ကား၊ ဆိုင်ကယ် သွားလာရာမှာ အခက်အခဲ မရှိစေဖို့ ကူညီ ဆောင်ရွက် ပေးနေရတယ်လို့ ပရဟိတ အဖွဲ့တွေက ပြောပါတယ်။
ကျိုက်မရောမြို့နယ်မှာလည်း အတ္ထရံမြစ်ဘေးရှိ ကျေးရွာတချို့မှာ ရေစတင် ဝင်ရောက်လာတာကြောင့် ကျေးရွာနေ ပြည်သူတွေအနေနဲ့ အမြင့်ပိုင်းရှိ ဘေးလွတ်ရာနေရာတွေမှာ ရေဘေးရှောင် နေရသလို မြို့အတွင်းရှိ ရပ်ကွက် တချို့မှာလည်း ရေဝင်ရောက်မှု ရှိလာတယ်လို့ ဒေသခံတွေက ပြောပါတယ်။
မုဒုံမြို့နယ်မှာတော့ မုဒုံ-သံဖြူဇရပ် လမ်းပိုင်းရှိ နှီးပဒေါ ကျေးရွာ အနီးမှာ ကားလမ်းမ ရေကျော်မှု ဖြစ်ပေါ် နေတာကြောင့် လမ်းပိတ်ဆို့မှု ဖြစ်ပေါ်ခဲ့သလို ကမာဝက်မြို့ရှိ ရပ်ကွက် တချို့မှာလည်း ရေကြီးရေလျှံမှုတွေ ဖြစ်ပေါ်နေတယ်လို့ ကူညီဆောင်ရွက် ပေးနေတဲ့ ပရဟိတ အဖွဲ့တွေက ပြောပါတယ်။
ပြည်နယ်အတွင်း ရေကြီးရေလျှံမှု ဖြစ်ပေါ်နေတဲ့ နေရာတွေက ရေဘေးသင့် ပြည်သူတွေဟာ ကိုယ့်အစီအစဉ်နဲ့ကို နီးစပ်ရာ နေရာတွေကို ရွေ့ပြောင်းနေထိုင် နေရပြီး ပရဟိတအဖွဲ့တွေက စားသောက်စရာတွေ ကူညီဆောင်ရွက်ပေးတာ ရှိတယ်လို့ သိရပါတယ်။
မွန်ပြည်နယ်ဟာ မိုးတွင်း ကာလမှာ မိုးရေချိန် မြင့်မားတာကြောင့် နှစ်စဉ်နီးပါး ရေကြီးရေလျှံမှုတွေ တောင်ပြို မြေပြိုမှုတွေနဲ့ လေပြင်း တိုက်ခတ်တာတွေ မကြာခဏ ဆိုသလို ဖြစ်ပွားနေတာကြောင့် ပြည်သူတွေ အနေနဲ့ သတိထား နေထိုင်ကြဖို့ ပရဟိတ အဖွဲ့တွေက တိုက်တွန်းထားပါတယ်။
သတင်း-သံလွင်တိုင်းမ်