မော်လမြိုင် ၊ မတ် (၁၃)
လာမယ့် အစည်းအဝေးမှာ PPST ရဲ့ နိုင်ငံရေးဦးတည်ချက် (၇)ရပ်အပေါ် နိုင်ငံရေးလမ်းပြမြေပုံ အဆိုပြုချက် ၈ ချက်ကို ဆွေးနွေးအတည်ပြုသွားမယ်လို့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ဦးဆောင်မှုအလုပ်အဖွဲ့ ခေါင်းဆောင် နိုင်အောင်မင်းက ပြောပါတယ်။
မတ်လ ၁၁ ရက်နေ့ကနေ ၁၂ ရက်နေ့ထိ နှစ်ရက်တာ ကျင်းပခဲ့တဲ့ အပစ်ရပ် ၁၀ ဖွဲ့နဲ့ ဖွဲ့စည်းထားတဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ရဲ့ အစည်းအဝေး နိဂုံးချုပ်မိန့်ခွန်းမှာ နိုင်အောင်မင်းက ပြောဆိုခဲ့တာပါ။
ဒါ့အပြင် PPST ရဲ့ လိုအပ်တဲ့ စုဖွဲ့မှုအသစ်စာတမ်းကိုလည်း လာမယ့် ပုံမှန်အစည်းအဝေးမှာ ရှင်းလင်းတင်ပြနိုင်ဖို့အတွက် ဆုံးဖြတ်ချက် ချမှတ်နိုင်ခဲ့တယ်လို့ ဆိုပါတယ်။
ဒီအစည်းအဝေးမှာ မြန်မာနိုင်ငံကို လာရောက်မယ့် အာဆီယံအထူးကိုယ်စားလှယ်နဲ့ တွေ့ဆုံရေးအတွက် လိုအပ်တဲ့ပြင်ဆင်မှုတွေ ဆက်လက်ပြုလုပ်သွားဖို့ သဘောထားချမှတ်နိုင်ခဲ့တယ်လို့ နိုင်အောင်မင်းက ဆိုပါတယ်။
အာဆီယံအထူးကိုယ်စားလှယ်လည်း ဖြစ်တဲ့ ကမ္ဘောဒီးယား နိုင်ငံခြားရေး ဝန်ကြီး ပရက်ဆော့ခွန်းဟာ လာမယ့် မတ်လ ၂၀ ရက်နေ့ကနေ ၂၃ ရက်နေ့ထိ သုံးရက်တာ မြန်မာနိုင်ငံကို လာရောက်ဖို့ ရှိနေတာပါ။
အာဆီယံအထူးကိုယ်စားလှယ်ရဲ့ မြန်မာပြည်ခရီးစဉ်မှာ အပစ်ရပ် လက်မှတ်ထိုးထားတဲ့ တိုင်းရင်းသားလက်နက်ကိုင် ၁၀ ဖွဲ့နဲ့ တွေ့ဆုံဖို့ရှိတယ်လို့ PPST က မတ် ၁၁ ရက်နေ့မှာ ထုတ်ပြန်ထားပါတယ်။
သတင်း – သံလွင်တိုင်းမ်