မော်လမြိုင်၊ ဒီဇင်ဘာ ၁၅
တနင်္သါရီတိုင်းဒေသကြီး ပုလောမြို့နယ် KNU တပ်မဟာ ၄ ထိန်းချုပ်နယ်မြေ ဒူးရင်းပင်ရှောင်ကျေးရွာနဲ့ အနီးပတ်ဝန်းကျင်ကျေးရွာတွေမှာ အင်အား ၃၀၀ နီးပါးရှိတဲ့ စစ်ကောင်စီတပ်ဖွဲ့တွေ တပ်စွဲထားတယ်လို့ ဒေသခံတွေထံမှ သိရပါတယ်။
ဒီဇင်ဘာလ ၁၃ ရက်နေ့မှာ အင်အားတိုးချဲ့လာတဲ့စစ်ကောင်စီတပ်ဖွဲ့တွေက ဒူးရင်းပင်ရှောင်ကျေးရွာရှိ ဘုရားကျောင်းဝင်းနှင့် လမ်းမကြီးဘေးရှိ အနီးအနားကျေးရွာတွေမှာ အင်အား (၃၀၀)နီးပါးနဲ့ ဝင်ရောက်တပ်ဆွဲထားတာလို့ ဒေသခံတစ်ဦးက ပြောပါတယ်။
” ပုလောကုန်နဲ့ ဂျက်ဂါးရွာတွေဘက်မှာ အစကတည်းက တပ်စွဲထားတာရှိတယ်၊ အင်အားက ရာဂဏန်းတောင် မရှိဘူး၊ အခု လွန်ခဲ့တဲ့ တစ်ရက်နှစ်ရက်လောက် စစ်သားတွေ ထပ်ရောက်လာပြီးတော့ မနေ့ကဆိုရင် တပ်မဟာ ၄ နယ်မြေ ဒူးရင်းပင်ရှောင်ရွာနဲ့ပတ်ဝန်းကျင်ရွာတွေ ဘက်ကို စစ်သားတွေ ဝင်သွားတယ်၊ အဲဒီဘက်မှာလဲ တပ်စွဲထားတယ်၊ စစ်သားအားလုံး ၃၀၀ နီးပါးလောက်တော့ရှိတယ်၊ သူတို့ တပ်စွဲထားတာ။” ဟု ၎င်းက ပြောသည်။
အဆိုပါကျေးရွာတွေမှာ တပ်စွဲထားတဲ့ စစ်ကောင်စီတပ်ဖွဲ့တွေက လမ်းသွားလမ်းလာပြည်သူတွေကို စစ်ဆေးမေးမြန်းနေတာနဲ့ ရွာအဝင်အထွက်ကို တားမြစ်ပိတ်ပင်မှုရှိနေတာကြောင့် ဒေသခံတွေသွားလာရေးအခက်ကြုံနေရတယ်လို့ ဆိုပါတယ်။
ယခုလို KNU တပ်မဟာ ၄ နယ်မြေထဲ အင်းအားတိုးချဲ့ဝင်ရောက်လာတဲ့ စစ်ကောင်စီတပ်ဖွဲ့တွေက ၎င်းတို့ တပ်ဖွဲ့ဝင်သုံးဦးမှာ လက်နက်နဲ့အတူ ထွက်ပြေးတိမ်းရှောင်နေတာကို သတင်းရလို့ ဝင်ရောက်ရှာဖွေတာဖြစ်တယ်လို့ ဒေသခံတွေ ပြောပါတယ်။
ပြီးခဲ့တဲ့ ဒီဇင်ဘာ ၁၁ ရက်နေ့က ဒူးရင်းပင်ရှောင်ကျေးရွာပတ်ဝန်းကျင်မှာ ဒေသခံ PDF ၊ KNU ပူးပေါင်းတပ်ဖွဲ့နဲ့ စစ်ကောင်စီတပ်တို့ ပစ်ခတ်မှုဖြစ်ပွါးရာမှ စစ်ကောင်ဘက်က ၃ ဦး ကျဆုံးခဲ့ပါတယ်။
သတင်း – သံလွင်တိုင်းမ်