မော်လမြိုင် ၊ ဒီဇင်ဘာ (၃)
ကရင်အမျိုးသားအစည်းအရုံး(KNU) ဖာပွန်ခရိုင်ထဲက စစ်ကောင်စီ တပ်စခန်း ၁၁ ခုကို တပ်က စွန့်ခွာသွားကြတယ်လို့ ကရင်ငြိမ်းချမ်းရေး အထောက်အကူအပြုကွန်ယက် (KPSN)က ထုတ်ပြန်ပါတယ်။
စစ်တပ်စခန်းတွေကို ကရင်အမျိုးသားလွတ်မြောက်ရေးတပ်မတော် KNLA က ပြောက်ကျားတိုက်ခိုက်မှုနဲ့ ထောက်ပံ့ရေးလမ်းကြောင်း ပိတ်ဆို့ဖြတ်တောက်မှုတွေကြောင့် စွန့်ခွာထွက်ပြေးသွားကြတာ ဖြစ်ပါတယ်။
အဲဒီထဲမှာတော့ စစ်ကောင်စီတပ်စခန်း ၂ ခုကို ကရင်အမျိုးသားလွတ်မြောက်ရေးတပ်မတော် KNLA က သိမ်းယူနိုင်ခဲ့ပါတယ်။
ဒါ့အပြင် အောက်တိုဘာလကုန်အထိ ဖာပွန်ခရိုင်ထဲကို စစ်ကောင်စီတပ်က တပ်ပြေး ၂၈ ဦး လာရောက် ခိုလှုံခဲ့တယ်လို့ ကရင်ငြိမ်းချမ်းရေး အထောက်အကူအပြုကွန်ယက် (KPSN)က ထုတ်ပြန်ထားပါတယ်။
စစ်ကောင်စီတပ်ကနေ ထွက်ပြေးလာတဲ့ တပ်သား ကိုဇော်လွင်ဦးကတော့ စစ်ကောင်စီတပ်ထဲမှာ အများစုက ပြေးချင်တဲ့လူနဲ့ တောခိုချင်တဲ့လူတွေက များနေပြီး တပ်ထဲမှာ လစာအပြည့်အဝမပေးတဲ့အပြင် အမိန့်နာခံမှုတွေလည်းမရှိတော့ဘူးလို့ ဆိုပါတယ်။
“တပ်ထဲက ပြေးဖို့က လူအများကြီးပါ ။ စည်းကမ်းချက်တွေကတော့ ပိုတင်းကြပ်ထားတယ်။ စခန်းထဲက တော်ရုံမပေးထွက်ဘူး ၊ ပြေးမှာစိုးလို့။ စခန်းမှာ လူတစ်ရာရှိရင် (၉၉)ယောက်က ပြေးမယ့်လူတွေချည်းပဲ” လို့ ပြောပါတယ်။
ဖာပွန်ခရိုင်ထဲက သိမ်းဆည်းရမိတာနဲ့ စွန့်ခွာသွားတဲ့ စစ်ကောင်စီတပ်စခန်းအများစုဟာ ထိုင်းနယ်စပ်ချင်းထိစပ်နေတဲ့ သံလွင်မြစ်တလျှောက် ဖာပွန်ခရိုင်အရှေ့ပိုင်းမှာဖြစ်တယ်လို့ KPSN ရဲ့ ထုတ်ပြန်ထားတဲ့အစီရင်ခံစာမှာ ပါရှိပါတယ်။
လတ်တလော ကေအဲန်ယူထိန်းချုပ်နယ်မြေဖြစ်တဲ့ ဖာပွန်ခရိုင် တပ်မဟာ ၅ နယ်မြေအတွင်းမှာ ကရင်အမျိုးသားလွတ်မြောက်ရေးတပ်မတော် KNLAနဲ့ စစ်ကောင်စီတပ်တို့အကြား တိုက်ပွဲတွေ နေ့စဉ်လိုလိုဖြစ်ပွားနေပြီး စစ်ကောင်စီဘက်က နယ်မြေမကျွမ်းကျင်မှုကြောင့် ထိခိုက်ကျဆုံးမှုတွေ ပိုမိုများပြားလာခဲ့တယ်လို့ တပ်မဟာ ၅ ပြောရေးဆိုခွင့်ရှိသူ ဒုဗိုလ်မှူးကြီးစောကလယ်ဒိုက ပြောဆိုထားပါတယ်။
သတင်း – သံလွင်တိုင်းမ်