မော်လမြိုင် ၊ အောက်တိုဘာ (၂၀)
မွန်ပြည်နယ်မှာ Stay at Home သတ်မှတ်ထားတဲ့ မြို့နယ်တွေက ဈေးတွေမှာ ကိုဗစ်ရောဂါပိုး တွေ့ရှိမှုနှုန်း ၅ ရာခိုင်နှုန်း အောက်ရောက်မှ ပြန်လည် ဖွင့်လှစ်ရောင်းချခွင့်ပေးအပ်သွားမယ်လို့ စစ်ကောင်စီ လက်အောက်ခံ ပြည်နယ် ကျန်းမာရေးဦးစီးဌာန တာဝန်ရှိသူတွေက ပြောပါတယ်။
လက်ရှိမှာတော့ Stay at Home မြို့နယ်တွေက ဈေးသူဈေသားတွေကို ကိုဗစ်ရောဂါပိုး ရှိ မရှိ စစ်ဆေးဖို့နဲ့ တွေ့ရှိမှုနှုန်း ပြန်လည် တင်ပြပေးဖို့ ကျန်းမာရေးဦးစီးဌာနက ညွှန်ကြားထားတယ်လို့ မော်လမြိုင် အမှတ် (၁) ဈေးကော်မတီ တာဝန်ရှိသူ တစ်ဦးက ပြောပါတယ်။
“ကျွန်တော်တို့ အမှတ် (၁) ပြည်သူဈေမှာက နှာခေါင်းတို့ဖတ်ယူတာ (၂) ကြိမ်ရှိပြီး။ ပထမအကြိမ်က လူ (၂၀၀) ကျော်လောက်စစ်ခဲ့တယ်။ ဒုတိယအကြိမ်က လူ (၁၀၀) ကျော်ကို စစ်ဆေးခဲ့တယ်ပေါ့လေ။ အဲ့ဒါနဲ့ကျန်းမာရေးဌာနကပြောတာက လူများများနဲ့နောက်ထပ်တစ်ကြိမ်လောက် ပြန်စစ်ပေးပါလားလို့ ပြောလာတော့ ဈေးကော်မတီကနေ လူစာရင်းတွေလိုက်လံကောက်ခံနေပါတယ်” လို့ ဆိုပါတယ်။
မွန်ပြည်နယ်အတွင်းက Stay at Home သတ်မှတ်ထားတဲ့ မြို့နယ်တွေရှိ ဈေးတွေမှာတော့ ဆေးဝါးနဲ့ အခြေခံစားသောက်ကုန်တွေကိုသာ ဖွင့်လှစ်ရောင်းချခွင့်ပေးအပ်ထားပြီး တခြားကုန်ပစ္စည်းတွေကိုတော့ ဈေးရောင်းချခွင့် ကန့်သတ်ထားတာ ဖြစ်ပါတယ်။
အဲဒီလို အခြေအနေကြောင့် ဈေးတွေအပေါ် မှီခိုလုပ်ကိုင်နေတဲ့ အလုပ်သမား ထောင်နဲ့ချီပြီး မိသားစု စားဝတ်နေရေး အခက်အခဲ ဖြစ်နေတာပါ။
မွန်ပြည်နယ်မှာတော့ မော်လမြိုင်၊သထုံနဲ့ သံဖြူဇရပ်အပါအဝင် မြို့နယ် ၅ မြို့နယ်ကို နေအိမ်အတွင်း နေထိုင်ကြဖို့ Stay at Home သတ်မှတ်ထားတာပါ။
သတင်း – သံလွင်တိုင်းမ်