မော်လမြိုင် စက်တင်ဘာ ၁၅
မွန်ပြည်နယ်မှာ စက်တင်ဘာ ၁ ရက်နေ့မှ ၁၄ ရက်နေ့ထိ ၂ပတ်တာကာလအတွင်း ကိုဗစ်အတည်ပြုလူနာ ၁၇၄၂ ဦး ထပ်မံတွေ့ရှိခဲ့သလို သေဆုံး ၁၄၃ ဦးရှိကြောင်း စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ထားပါတယ်။
ရောဂါပိုး တွေ့ရှိမှုအရ ချောင်းဆုံမြို့နယ်ဟာ ကိုဗစ်လူနာသစ် ၃၈၁ ဦးနဲ့ အများဆုံး ပိုးတွေ့ရှိခဲ့သလို ရေးမြို့နယ်က ကိုဗစ်လူနာ ၂၈၈ ဦးနဲ့ ဒုတိယအများဆုံး ပိုးကူးစက်ခံလိုက်ရတာ ဖြစ်ပါတယ်။
သေဆုံးမှုအနေနဲ့ မုဒုံမြို့နယ်က ၂၇ ဦး၊ ရေးမြို့နယ်က ၂၁ ဦး၊ မော်လမြိုင်မြို့နယ်က ၁၉ ဦး၊ ချောင်းဆုံမြို့နယ်က ၁၈ ဦး၊ ပေါင်မြို့နယ်က ၁၆ ဦး၊ ကျိုက်မရောမြို့နယ်က ၁၁ ဦး၊ သံဖြူဇရပ်မြို့နယ်က ၁၀ ဦး၊ သထုံမြို့နယ်က ၈ ဦး၊ ဘီးလင်းမြို့နယ်က ၇ ဦးနဲ့ကျိုက်ထိုမြို့နယ်က ၃ ဦး၊ စုစုပေါင်း ၁၄၃ ဦး သေဆုံးခဲ့ပါတယ်။
ရောဂါဖြစ်ပွားမှုနဲ့ သေဆုံးနှုန်းဟာ ပြီးခဲ့တဲ့ကာလတွေနဲ့ နှိုင်းယှဉ်ရင် သိသိသာသာ ကျဆင်းလာတာ ဖြစ်ပါတယ်။
“အဓိကက ကာကွယ်ဆေးကိုတွေထိုးလိုက်တာလည်းပါမယ်။ နောက်ရောဂါဖြစ်ပွားမှုနှုန်းက အမြင့်ဆုံးအချိန်ရောက်ပြီးမှ ပြန်ကျလာတယ်လို့လည်းသုံးသပ်လို့ရပါတယ်” လို့ ကိုဗစ်အရေးကူညီနေသူ တစ်ဦးက ဆိုပါတယ်။
မွန်ပြည်နယ်အတွင်းမှာ ပြီးခဲ့တဲ့ ဇွန်လ ၂၈ ရက်ကနေ သြဂုတ်လ ၃၁ ရက်အထိကို ကိုဗစ်လူနာ ၁၁၇၅၃ ဦးထိရှိပြီး အဲဒီထဲမှာ ကိုဗစ်လူနာ ၁၀၅၇ ဦး သေဆုံးထားတယ်လို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ထားပါတယ်။
သတင်း- သံလွင်တိုင်းမ်
Photo Credit – Mawlamyine Rescue Team