ကျိုက်ထိုမြို့မရဲစခန်းက ရဲနှစ်ဦးကို စစ်တပ်ဖမ်းဆီးနှိပ်စက်

ကျိုက်ထို၊ မေ ၁၀

မွန်ပြည်နယ် ကျိုက်ထိုမြို့မရဲစခန်းက ရဲနှစ်ဦးဟာ ပြည်သူ့ကာကွယ်ရေးတပ်ဖွဲ့ PDF တွေထံ သ တင်းပေးနေတယ်ဆိုတဲ့ စွပ်စွဲချက်နဲ့ စစ်ကောင်စီတပ် ဖမ်းဆီးပြီး ရိုက်နှက်နှိပ်စက်တာတွေ လုပ် ဆောင်နေတယ်လို့ ရဲတပ်ဖွဲ့ အသိုင်းအဝိုင်းကနေ စုံစမ်းသိရှိရပါတယ်။

ကျိုက်ထိုမြို့မရဲစခန်းက နယ်ထိန်းရဲတပ်ကြပ် စိုးရာဇာနဲ့ ယာဉ်ထိန်းရဲ ဝဏ္ဏစိုးတို့ကို စစ်ကောင်စီတပ်က ပြီးခဲ့တဲ့ မေ ၅ ရက်နေ့မှာ ရဲစခန်းအတွင်း ဝင်ရောက်ဖမ်းဆီးသွားခဲ့တာပါ။

ရဲတပ်ဖွဲ့ဝင်တွေရဲ့ ပြောပြချက်အရ ဖမ်းဆီးခံလိုက်ရတဲ့ ရဲနှစ်ဦးအား စစ်ကောင်စီတပ် စစ်ဆေးစဉ် သထုံခရိုင်အတွင်းက PDF တွေထံ စစ်သတင်းပေးတာ၊ စစ်ကောင်စီနဲ့ပတ်သက်ဆက်နွယ်မှု ရှိနေတဲ့သူတွေကို အမည်စာရင်းပေးပို့တာ၊ PDF တွေနဲ့ အပြန်အလှန်ပြောဆိုထားတာတွေ စစ်ဆေးတွေ့ရှိခဲ့တယ်လို့ ဆိုပါတယ်။

ဖမ်းဆီးသွားတဲ့ ရဲနှစ်ဦးကို စစ်ကြောရေးမှာ ဖမ်းဆီးနှိပ်စက် စစ်ဆေးမှုတွေ ပြုလုပ်နေတယ်လို့ သိရပေမယ့် ဘယ်တပ်မှာ ဖမ်းဆီးထားလဲဆိုတာ မသိရသေးဘူးလို့ အမည်မဖော်လိုတဲ့ ရဲတပ်ဖွဲ့ဝင်တစ်ဦးက သံလွင်တိုင်းမ်ကို ပြောပါတယ်။

ရဲနှစ်ဦး ဖမ်းဆီးခံရတာနဲ့ပတ်သက်ပြီး စစ်ဆေးပေါ်ပေါက်ချက်အရ နောက်ထပ်ဖမ်းဆီးခံရမယ့် ရဲတပ်ဖွဲ့ဝင်တွေလည်း ရှိလာနိုင်တယ်လို့ ဆိုပါတယ်။

လက်ရှိမှာတော့ စစ်ကောင်စီတပ် ဖမ်းဆီးထားတဲ့ ရဲနှစ်ဦးကို ရဲတပ်ဖွဲ့ဥပဒေတွေအပြင် အကြမ်း ဖက်မှု တိုက်ဖျက်ရေး ဥပဒေတွေနဲ့ပါ အမှုဖွင့်ဖို့ စီစဉ်နေတယ်လို့ သိရပါတယ်။

မွန်ပြည်နယ်မှာ အာဏာသိမ်းကာလအတွင်း စစ်ကောင်စီလက်အောက်မှာ တာဝန်မထမ်းချင်တာကြောင့် ရဲတပ်ဖွဲ့ဝင်ရာနဲ့ချီ CDM ပြုလုပ်ထားသလို CDM မလုပ်ဘဲ စခန်းအတွင်းကနေ ဖရဲသီးလုပ်ဆောင်နေတဲ့ ရဲတပ်ဖွဲ့ဝင်တွေလည်း ရှိနေတာပါ။

အမျိုးသားညီညွတ်ရေးအစိုးရ NUG ရဲ့ အချက်အလက်တွေအရ အာဏာသိမ်းကာလအတွင်း CDM ပြုလုပ်ထားတဲ့ ရဲနဲ့စစ်သား ၁၈၀၀၀ ထက်မနည်း ရှိတယ်လို့ သိရပါတယ်။

သတင်း – သံလွင်တိုင်းမ်

ဓာတ်ပုံ-CJ