ဘရပ်ဆဲလ်၊ ဇန်နဝါရီ ၂၁
ပြီးခဲ့တဲ့နှစ် ဇူလိုင်လက သဘောတူညီခဲ့တဲ့ အမေရိကန် ကုန်သွယ်ရေး သဘောတူခွင့်ပြုမှုကို ဆိုင်းငံ့ရေး ဥရောပလွှတ်တော်က စီစဉ်နေကြောင်း ဥရောပ နိုင်ငံတကာ ကုန်သွယ်ရေးကော်မတီနဲ့ နီးစပ်တဲ့ သတင်းရင်းမြစ်က ပြောပါတယ်။
အဲဒီလို ဆိုင်းငံ့ကြောင်းကို ပြင်သစ်နိုင်ငံ စတရာ့စ်ဘော့ဂ်မြို့မှာ ဇန်နဝါရီ ၂၁ ရက် ကြေညာသွားမယ်လို့ အဲဒီ သတင်းရင်းမြစ်က ပြောပါတယ်။
အခုလို လုပ်ရပ်ကြောင့် အမေရိကန်နဲ့ ဥရောပကြား ကုန်သွယ်ရေးဆိုင်ရာ တင်းမာမှုတွေကို နောက်ထပ် မြင့်တက်လာစေမှာ ဖြစ်ပါတယ်။
အမေရိကန်သမ္မတ ဒေါ်နယ် ထရန့်က ဂရင်းလန်းကို ရယူရေး အရှိန်မြှင့် ကြိုးပမ်းနေပြီး အဲဒီကိစ္စနဲ့ ပတ်သက်လို့ အခွန်အသစ်တွေ ကောက်ခံမယ်လို့ ပြီးခဲ့တဲ့ သီတင်းပတ်ကုန်ရက်က ခြိမ်းခြောက်ထားပါတယ်။
အဲဒီလို မတိုးသာ မဆုတ်သာ အခြေအနေကြောင့် ဘဏ္ဍာရေးဈေးကွက်တွေ လှုပ်လှုပ်ခတ်ခတ် ဖြစ်သွားခဲ့ပြီး ကုန်သွယ်ရေး စစ်ပွဲ ဖြစ်လာနိုင်တယ်ဆိုတဲ့ ပြောဆိုမှုတွေ ပြန်ထွက်ပေါ်လာခဲ့ပါတယ်။
အမေရိကန်ရဲ့ ကုန်သွယ်ရေးဆိုင်ရာ အစီအစဉ်တွေကြောင့် လက်တုံ့ပြန်မှုတွေ ရှိလာနိုင်တယ်ဆိုတဲ့ ပြောဆိုမှုတွေလည်း ထွက်ပေါ်လာပါတယ်။
အတ္တလန္တိတ် နှစ်ဖက်စလုံးမှာ ဇန်နဝါရီ ၂၀ ရက်က အစု ရှယ်ယာတန်ဖိုးတွေ လျော့ကျသွားခဲ့ပါတယ်။
ဥရောပ စတော့ရှယ်ယာ ဈေးကွက်တွေလည်း နှစ်ရက်ဆက်တိုက် တန်ဖိုးလျော့ကျခဲ့ပြီး အမေရိကန်မှာလည်း အစုရှယ်ယာ တန်ဖိုးတွေ လျော့ကျခဲ့ပါတယ်။
ပြီးခဲ့တဲ့ ဇူလိုင်လက စကော့တလန်ရှိ ဒေါ်နယ်ထရန့်ရဲ့ ဂေါက်ကွင်းမှာ နှစ်ဖက် သဘောတူညီမှု တစ်ရပ် ရယူခဲ့ပြီးနောက်ပိုင်း အမေရိကန်နဲ့ ဥရောပကြား ကုန်သွယ်ရေးဆိုင်ရာ တင်းမာမှုတွေ လျော့ကျသွားခဲ့ပါတယ်။
ထရန့်က ကနဦးမှာ ဥရောပ ကုန်စည်တွေအပေါ် အခွန် ၃၀ ရာခိုင်နှုန်း ကောက်ခံမယ်လို့ ပြောထားပေမယ့် အဲဒီ သဘောတူညီမှုကြောင့် အခွန် ၁၅ ရာခိုင်နှုန်းသို့ လျှော့ချခဲ့ပါတယ်။
အပြန်အလှန်အနေနဲ့ ဥရောပက အမေရိကန်မှာ ရင်းနှီးမြှုပ်နှံမှုတွေ ပိုမို လုပ်ဆောင်ဖို့ သဘောတူညီခဲ့တာ ဖြစ်ပါတယ်။
အဲဒီ သဘောတူညီမှု တရားဝင် ဖြစ်လာစေရေး ဥရောပလွှတ်တော်ရဲ့ ခွင့်ပြုချက် လိုအပ်ပါတယ်။
ဒါပေမဲ့ ထရန့်က ဂရင်းလန်းအပေါ် အခွန်တိုးကောက်မယ်လို့ ခြိမ်းခြောက်ခဲ့ပြီးနောက် အခုလို အခြေအနေမှာ သဘောတူညီချက်ကို အကောင်အထည်ဖော်ဖို့ မဖြစ်နိုင်ဘူးလို့ ဥရောပ လွှတ်တော်အဖွဲ့ဝင် တချို့က ပြောပါတယ်။
နိုင်ငံတကာ ကုန်သွယ်ရေးဆိုင်ရာ ဥရောပ လွှတ်တော်ကော်မတီ ဥက္ကဋ္ဌ ဘားချ်လန်းက မိမိတို့မှာ အခြား နည်းလမ်း မရှိဘဲ ဂရင်းလန်းအပေါ် အခွန်ကောက်မယ်ဆိုတဲ့ ခြိမ်းခြောက်မှုတွေကြောင့် သဘောတူညီမှုကို ရပ်ဆိုင်းထားဖို့ပဲ လုပ်ဆောင်နိုင်လိမ့်မယ်လို့ ပြောပါတယ်။
အီးယူအဖွဲ့ဝင် တစ်နိုင်ငံရဲ့ နယ်နိမိတ်ဆိုင်ရာ ပေါင်းစည်းမှုနဲ့ အချုပ်အခြာ အာဏာကို ခြိမ်းခြောက်ပြီး တော့ အကြပ်ကိုင်နေတာဟာ အီးယူ-အမေရိကန် ကုန်သွယ်ရေး တည်ငြိမ်မှုနဲ့ အနာဂတ်ကို အမေရိကန်က အားလျော့အောင် လုပ်ဆောင်နေတာ ဖြစ်တယ်လို့ သူက ဖြည့်စွက် ပြောပါတယ်။
အမေရိကန်က ထိပ်တိုက်မတွေ့ဆုံဘဲ ပူးပေါင်းဆောင်ရွက်လာတဲ့ အချိန်အထိ နှစ်ဖက် ကုန်သွယ်ရေး သဘောတူညီမှုကို ဆိုင်းငံ့ထားမှာ ဖြစ်ကြောင်း ဘားချ်လန်းက ဆိုတာပါ။
အခုလို ဆုံးဖြတ်ချက်ကြောင့် အီးယူအနေနဲ့ အမေရိကန်ရဲ့ အခွန်တိုးမြှင့်မှုတွေနဲ့ ရင်ဆိုင်လာရင် လက်တုံ့ပြန်သွားမှာလားဆိုတဲ့ မေးခွန်း ထွက်ပေါ်လာပါတယ်။
အီးယူအနေနဲ့ လက်တုံ့ပြန်ရေး နည်းလမ်းတွေကို စဉ်စားထားသင့်ကြောင်း တိုက်တွန်းထားသူတွေထဲမှာ ပြင်သစ်သမ္မတ မက်ကရွမ်လည်း ပါဝင်နေပါတယ်။
Ref:BBC