မော်လမြိုင် ၊ နိုဝင်ဘာ ၁၃
မွန်ပြည်နယ်မှာ အာဏာသိမ်း စစ်ကော်မရှင်က သူတို့ ပြုလုပ်မယ့် အထွေထွေရွေးကောက်ပွဲ နီးလာပေမယ့် စစ်မှုထမ်းတပ်သားတွေ စုဆောင်းပေးဖို့ ဆက်တိုက်ဖိအားပေးနေတယ်လို့ အမည်မဖော်လိုတဲ့ အုပ်ချုပ်ရေးမှူးတွေက သံလွင်တိုင်းမ်ကို ပြောပါတယ်။
စစ်ကော်မရှင်ဟာ နိုင်ငံအနှံ့ ဖြစ်ပွားနေတဲ့ တိုက်ပွဲတွေအတွက် တပ်သားအင်အား အများအပြား လို အပ်နေသလို သူတို့ လုပ်မယ့် ရွေးကောက်ပွဲ အတွက်လည်း လုံခြုံရေး အင်အားတွေ လိုအပ်နေတာကြောင့် စစ်မှုထမ်း လူသစ်ရရှိအောင် ဖိအားပေးနေတာပါ။
အရင်က စစ်မှုထမ်း သင်တန်းအတွက် ငွေကြေးလိုအပ်သူတွေကို ငွေကြေးပေးဆောင်ကာ လူစား ထိုးအငှား ခေါ်ယူလို့ရခဲ့ပေမယ့် နောက်ပိုင်းမှာတော့ စစ်မှုထမ်း သင်တန်း ဆင်းတာနဲ့ ရှေ့တန်း စစ် မြေပြင်ကို တန်းပို့တာ၊ ထိခိုက် သေဆုံးမှုတွေလည်း များပြားတာတွေကြောင့် လူစားထိုး အငှား ခေါ်ယူရ အခက်အခဲ ဖြစ်နေတာပါ။
အမည်မဖော်လိုတဲ့ အုပ်ချုပ်ရေးမှူး တစ်ဦးကတော့ ရွေးကောက်ပွဲနီးလာပေမယ့် စစ်မှုထမ်းသင် တန်းအတွက် လူသစ်စုဆောင်းပေးဖို့ ဖိအားပေး ရှာခိုင်းနေပြီး ခြိမ်းခြောက်အကျပ်ကိုင်တာတွေလည်း ရှိနေတယ်လို့ သံလွင်တိုင်းမ်ကို ပြောပါတယ်။
“အခုက ဘယ်လိုလဲဆိုတော့ စစ်မှုထမ်းသင်တန်းအတွက် လူသစ်ကိုမရရအောင် ရှာခိုင်းတာ၊ သူတို့ ပြောတာတော့ အရင်သတ်မှတ်ထားတဲ့ လူအရေအတွက် ရအောင်ပေါ့နော်။အဲဒီထက် ပိုလည်း ရတယ်။လူသစ်မရလို့တော့ မရဘူး။ မဖြစ်မနေ ရှာပေးရမယ့် ပုံစံပေါ့။ မရလို့ ရှိရင် အရေးယူ ခံရမယ် ဘာညာပေါ့။အရင်ကတော့ အငှားခေါ်လို့ ရတယ်။ အခုက ဘယ်သူမှ မလုပ်ချင် ကြတော့ ဘယ်လို ရှာပေးရမလဲ မသိတော့ဘူး”လို့ ဆိုပါတယ်။
ဒါ့အပြင် စစ်ကော်မရှင်က လူသစ် ရှာဖွေဖို့ ဖိအားပေးလာတာကြောင့် တချို့ ရပ်ကျေး အုပ်ချုပ်ရေးမှူးတွေဟာ စစ်မှုထမ်း သင်တန်းအတွက် ဒေသတွင်းက လူငယ်တွေကို အတင်းအဓမ္မ ဖမ်းဆီးစု ဆောင်းတာ၊ ဆင့်ခေါ်စာ ပေးပို့တာအပြင် မဲနှိုက်ခိုင်းတာတွေကအစ လုပ်ဆောင်နေရတယ်လို့ သူက ဆက်ပြောပါတယ်။
ဒေသခံ တစ်ဦးကလည်း စစ်မှုထမ်းအတွက် အုပ်ချုပ်ရေးမှူးတွေက ကယ်ရီသမားကအစ ပိုက်ဆံပေးပြီး စည်းရုံးနေသလို အတင်းအဓမ္မတပ်သား စုဆောင်းတဲ့အတွက်လည်း လူငယ်တွေ ထွက်ပြေးတာတွေ ရှိလာတယ်လို့ သံလွင်တိုင်းမ်ကို ပြောပါတယ်။
“ဒီဘက်ခြမ်းမှာတော့ ကယ်ရီသမားတွေကို ပိုက်ဆံပေးပြီး စည်းရုံးပြီးတော့ လုံခြုံရေးပဲ လိုက်ရမယ်တို့ ဘာတို့ အဲဒီလိုမျိုးရှိတယ်။ သူတို့က လူသစ်ရှာတယ် ဆိုတာက ပြောမယ်ဆို မြန်မာနိုင်ငံမှာရှိတဲ့ လူငယ်တွေရဲ့ ဘဝကို သူတို့ ဖျက်ဆီးတာနဲ့ ရိုက်ချိုးနေတာနဲ့ တူတူပါပဲ။ အတင်းအဓမ္မ တပ်သား စုဆောင်းတဲ့အတွက် တချို့ လူငယ်တွေဆိုရင် နိုင်ငံခြား ထွက်တာ များပါတယ်။ တချို့ လူငယ်တွေ ကြတော့ စာရင်းပါတယ်။ အဲဒီစာရင်းမှာပါပြီး ဆိုတာနဲ့ ထွက်ပြေးကြတယ်”လို့ ဆိုပါတယ်။
ဒေသတွင်းမှာတော့ စစ်ကော်မရှင် လက်အောက်ခံတွေဟာ လူငယ်တွေကို ညဘက်အချိန်တွေမှာ ဖမ်းဆီးတာ၊ ဆိုင်ကယ် အမျိုးသား နှစ်ယောက် မစီးရ နေရာမှာ နှစ်ယောက်စီးပါက ဖမ်းဆီးတာအပြင် အလုပ်သွားအလုပ်ပြန်ကအစ ဖမ်းဆီးပြီး စစ်မှုထမ်း တပ်သားသစ် စုဆောင်းနေတာပါ။
အခုလို စစ်ကော်မရှင်က အကြောင်း အမျိုးမျိုး ပြကာ လူငယ်တွေကို ဖမ်းဆီးပြီး တပ်သားသစ် စုဆောင်းမှု များလာတာကြောင့် လူငယ် အများစု အိမ်နီးချင်းနိုင်ငံတွေကို ထွက်ခွာမှု မြင့်တက်နေပြီး တချို့ တရားမဝင် လမ်းကြောင်းတွေကတဆင့် သွားရောက်တဲ့ အတွက် မကြာခဏ ဆိုသလို ဖမ်းဆီးခံရမှုတွေ ရှိနေပါတယ်။
သံလွင်တိုင်းမ်က ပြုစုထားတဲ့ အချက်အလက်တွေအရ မွန်ပြည်နယ်မှာ စစ်ကော်မရှင်ရဲ့ ပြည်သူ့ စစ်မှုထမ်းသင်တန်း အပတ်စဉ် ၁ ကနေ အပတ်စဉ် ၁၈ အထိ ဒေသတွင်းက စစ်မှုထမ်း အကြုံးဝင်တဲ့ လူငယ် ၃၃၀၀ ထက်မနည်း စစ်သားစုဆောင်းခံထားရပါတယ်။
သတင်း – သံလွင်တိုင်းမ်
ဓာတ်ပုံ-MOI